فوتو: دسم ءباسپاسوز قىزمەتى
دەنساۋلىق ساقتاۋ مينيسترلىگى حابارلاعانداي, جەدەل جاردەمگە جەدەلدىلىكتىڭ ءبىرىنشى ساناتى بويىنشا تۇسكەن قوڭىراۋلار سانى 356 مىڭنان استى, بۇل وتكەن جىلعى كورسەتكىشتەن 0,5%-عا كوپ. ەكىنشى ساناتتاعى شاقىرتۋلار 1,8%-عا ءوسىپ, 2,1 ميلليوننان استام شاقىرتۋدى قۇرادى. ءۇشىنشى ساناتتاعى شاقىرتۋلاردىڭ ۇلەسى وزگەرىسسىز قالىپ, ەسەپتى كەزەڭدە 1,9 ميلليوننان ءسال اسقان. ال ءتورتىنشى ساناتتاعى شۇعىل ارەكەت ەتۋدى تالاپ ەتپەيتىن شاقىرتۋلاردىڭ ۇلەسى ازايدى.
بيىل ەمحانالار جانىنداعى ءموبيلدى بريگادالارعا تۇسكەن ءتورتىنشى ساناتتاعى شاقىرتۋلار سانى 1,08 ميلليون بولدى, بۇل وتكەن جىلمەن سالىستىرعاندا 23,2%-عا از. سونىمەن قاتار, جەدەل جاردەم ستانتسيالارىنىڭ بريگادالارى ءتورتىنشى سانات بويىنشا 1 183 590 شاقىرتۋدى ورىندادى.
ەسكە سالا كەتەيىك, ءتورتىنشى دەڭگەيدەگى (تومەن شۇعىلدىقتاعى) شاقىرتۋلارعا مەديتسينالىق-سانيتارلىق العاشقى كومەك كورسەتۋ (مساك) ۇيىمدارىنىڭ جانىنداعى ءموبيلدى بريگادالار جۇمىس كۇندەرى ساعات 8:00-دەن 20:00-گە دەيىن قىزمەت كورسەتەدى. قالعان ۋاقىتتا مۇنداي شاقىرتۋلاردى جەدەل مەديتسينالىق جاردەم ستانتسيالارىنىڭ بريگادالارى ورىندايدى.
«رەسپۋبليكا بويىنشا جەدەل جاردەم قىزمەتى 20 دەربەس ستانتسيادان, 96 قالالىق قوسالقى ستانتسيادان جانە 212 اۋداندىق بولىمشەدەن تۇرادى. ولاردىڭ قۇرامىندا 1 618 شۇعىل شىعۋ بريگادالارى جۇمىس ىستەيدى. ونىڭ 258-ءى (16%) مامانداندىرىلعان دارىگەرلىك بريگادالار, ال 1 360-ى (84%) فەلدشەرلىك بريگادالار», دەپ ناقتىلادى مينيسترلىك.
قالالىق بولىمشەلەردە 999 بريگادا, اۋداندىق بولىمشەلەردە 619 بريگادا قىزمەت كورسەتەدى. سونىمەن بىرگە, ءتورتىنشى ساناتتاعى شاقىرتۋلارعا قىزمەت كورسەتۋ ءۇشىن مساك ۇيىمدارىنىڭ جانىنان قوسىمشا 580 ءموبيلدى بريگادا جۇمىلدىرىلعان.
