نۇرجان نۇرجىگىتوۆ اۋىل شارۋاشىلىعىندا سۋدى ءتيىمدى باسقارۋ جانە پايدالانۋ باعىتىندا سۋ رەسۋرستارى جانە يرريگاتسيا مينيسترلىگىنىڭ اتقارىپ جاتقان جۇمىسى جونىندە بايانداما جاسادى.
بيىل قابىلدانعان جاڭا سۋ كودەكسىنە سايكەس, وزدىگىنەن سۋ پايدالانۋعا جول بەرمەۋ جانە سۋ نىساندارىندا, سۋ قورعاۋ ايماقتارى مەن بەلدەۋلەرىندە شارۋاشىلىق قىزمەتتى شەكتەۋ تالاپتارىن ساقتاۋ جونىندەگى باقىلاۋ كۇشەيتىلدى. باسسەيندىك ينسپەكتسيالارعا جەدەل ارەكەت ەتۋگە مۇمكىندىك بەرەتىن قاداعالاۋ وكىلەتتىكتەرى بەرىلدى.
يرريگاتسيالىق كوندومينيۋم ينستيتۋتى نورماتيۆتىك تۇردە بەكىتىلدى. ول سۋارۋ جانە كوللەكتورلىق-درەناجدىق جەلىلەردىڭ ءتيىستى جاعدايدا بولۋىن قامتاماسىز ەتىپ, فەرمەرلەردىڭ ينفراقۇرىلىمدى جوندەۋ جانە رەكونسترۋكتسيالاۋ شىعىندارىن ازايتۋعا مۇمكىندىك بەرەدى. قوسىمشا قولداۋ شاراسى رەتىندە اۋىل شارۋاشىلىق قاجەتتىلىكتەرى ءۇشىن كولەمى 2 ملن تەكشە مەترگە دەيىن ەرىگەن, نوسەر جانە تاسقىن سۋدى جينايتىن قويمالار سالۋعا رۇقسات بەرەتىن نورما ەنگىزىلدى.
سۋ ۇنەمدەۋ تەحنولوگيالارىن ەنگىزۋدى ىنتالاندىرۋ ماقساتىندا مەملەكەتتىك قولداۋ تەتىكتەرى قايتا قارالدى: ۇڭعىما بۇرعىلاۋ جانە سۋ ۇنەمدەيتىن جابدىق ساتىپ الۋعا جۇمسالعان شىعىنداردىڭ وتەماقى ۇلەسى 50%-دان 80%-عا دەيىن ارتتى. سونداي-اق سۋدى سۋبسيديالاۋ ديففەرەنتسيالانىپ, ونىڭ مولشەرى تىكەلەي سۋ ۇنەمدەۋ جۇيەلەرىن قولدانۋعا بايلانىستى بەلگىلەندى.
وسى ماقساتتارعا قول جەتكىزۋ ءۇشىن 2026-2028 جىلدارعا ارنالعان رەسپۋبليكالىق بيۋدجەتتەن ينۆەستيتسيالىق سۋبسيديالارعا 214 ملرد تەڭگەدەن استام, ال سۋارۋ سۋىنىڭ قۇنىن سۋبسيديالاۋعا 13,5 ملرد تەڭگە كولەمىندە ترانسفەرتتەر قاراستىرىلعان.
«جالپى العاندا, مەملەكەت قولداۋ كورسەتىپ وتىرعان سۋ سالاسىنا كەشەندى كوزقاراس اۋىل شارۋاشىلىعى سەكتورىن تۇراقتى دامىتۋعا جانە سۋمەن قامتاماسىز ەتۋگە مۇمكىندىك بەرەدى دەپ سەنەمىز. بۇل – ۇلتتىق قاۋىپسىزدىك پەن ازاماتتاردىڭ ءال-اۋقاتىنىڭ ماڭىزدى قۇرامداس بولىگى. ال جەرگىلىكتى اتقارۋشى ورگانداردان بارلىق قاتىسۋشىنىڭ جۇمىسىن ناقتى ۇيلەستىرۋ, ءىس-شارالاردى ۋاقىتىلى ورىنداۋ, بولىنگەن قاراجاتتى ءتيىمدى جانە ماقساتتى پايدالانۋ, سونداي-اق جۇمىستاردىڭ ساپاسىن تۇراقتى باقىلاۋ تالاپ ەتىلەدى. تەك جەرگىلىكتى دەڭگەيدە جاۋاپكەرشىلىكپەن جۇمىس اتقارعاندا عانا ءبىز قويىلعان ماقساتتارعا جەتە الامىز», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
