فوتو: istockphoto.com
ىشكى ىستەر مينيسترلىگىنىڭ مالىمەتىنشە, الاياقتار زەينەتكەرگە ەسەپتەگىشتىڭ تەكسەرىلىپ, پلومبالاناتىنىن ايتىپ, 1414 سەرۆيسىنەن كەلگەن كودتى ايتۋدى سۇراعان. زەينەتكەر كورسەتىلگەن كودتى ايتىپ, وزىندە ءبىر بانكتە ۇلكەن دەپوزيت بار ەكەنىن حابارلاعان. كەيىننەن ولار زەينەتكەرگە بانك اتىنان قوڭىراۋ شالىپ, اقشانى قاۋىپسىز شوتقا اۋدارۋ قاجەتتىگىن جەتكىزەدى.
ودان كەيىن كۋرەر كەلەتىنىن, وعان اقشانى بەرۋ كەرەكتىگىن تۇسىندىرەدى. زەينەتكەر ەش ويلانباستان دەپوزيتىنەن 24 ملن تەڭگە الىپ, 800 مىڭ تەڭگە كوميسسيانى تولەپ, ۇيىنە ورالىپ ءارى قارايعى نۇسقاۋلاردى كۇتەدى. ارتىنشا, قۇربىسىنا قوناققا بارىپ ءمان-جايدى ايتقاندا, دوسى كۇدىكتەنىپ, ۋچاسكەلىك ينسپەكتورعا حابارلاسقان.
«قازىرگى ۋاقىتتا الاياقتىق دەرەگى بويىنشا تەرگەۋ باستالدى. قوڭىراۋ شالعانداردىڭ ابونەنتتىك نومىرلەرى انىقتالىپ, كۇدىكتىلەر ىزدەستىرىلىپ جاتىر», دەدى پاۆلودار وبلىسى پد كيبەرقىلمىسپەن كۇرەس باسقارماسىنىڭ باستىعى اسحات ابەتجانوۆ.
زەينەتكەردىڭ ايتۋىنشا, پوليتسيانىڭ جەدەل ارەكەتتەرى مەن قۇربىسىنىڭ ساقتىعى ارقاسىندا الاياقتاردان قۇتىلىپ كەتكەن.
«بارلىعى تەلەفون قوڭىراۋىنان باستالدى, ءارى قاراي ءتۇس سەكىلدى بولدى. تەك پوليتسيانىڭ جەدەل ارەكەتتەرى مەن قۇربىمنىڭ ساقتىق كورسەتكەنىنىڭ ارقاسىندا ۇلكەن سومانى ۇرلاتپاي, اقشامدى قايتارۋعا مۇمكىندىك تۋدى», دەيدى ليديا فەدوروۆنا.
پوليتسيا قىزمەتكەرلەرى ازاماتتارعا ەشبىر مەملەكەتتىك ورگان اقشانى ساقتاۋ ءۇشىن المايتىنىن جانە كۋرەر جىبەرمەيتىنىن ەسكەرتتى.
