فوتو: ۇكىمەت
مەملەكەت باسشىسىنىڭ اۋىل شارۋاشىلىعى سالاسىن دامىتۋ جانە وزىق اگروتەحنولوگيالاردى ەنگىزۋ بويىنشا قويعان تاپسىرمالارىن جۇزەگە اسىرۋدى كوزدەيتىن جوبانىڭ ماقساتى – القاپتا ماقتا وسىرۋدەن باستاپ دايىن كيىم وندىرۋگە دەيىن ءوندىرىستىڭ تولىق تسيكلىن قالىپتاستىرۋ. ناتيجەسىندە وتىرار اۋدانى مەن ارىس قالاسىندا 60 مىڭ گەكتار سۋارمالى جەر الاڭىندا ورتالىق ازياداعى ءىرى ماقتا ءوسىرۋ كەشەنىن قۇرۋ جوسپارلانىپ وتىر. 1,4 مىڭنان استام تۇراقتى جانە 300-دەن استام ۋاقىتشا جۇمىس ورنى اشىلادى.
ينۆەستور – قىتايلىق Xinjiang Lihua (Group) Co., Ltd. كومپانياسى. جوبانى جۇزەگە اسىرۋدىڭ ءبىرىنشى كەزەڭىندە 58 ملرد تەڭگەدەن استام ينۆەستيتسيا كوزدەلگەن, شەتەلدىك ينۆەستيتسيالاردىڭ جالپى كولەمى 200 ملرد تەڭگەدەن اسادى, بۇل تۋرالى بۇرىن ولجاس بەكتەنوۆ پەن Xinjiang Lihua باسشىسى چجان تسيحايدىڭ كەلىسسوزدەرى بارىسىندا ۋاعدالاستىقتارعا قول جەتكىزىلگەن بولاتىن.
بۇرىن-سوڭدى مۇنداي اۋقىمدا قولدانىلماعان تەحنولوگيالىق شەشىمدەردى ەنگىزۋ كوزدەلىپ وتىر: تامشىلاتىپ سۋارۋدىڭ تيىمدىلىگى جوعارى جۇيەسى بار 196 سورعى ستانساسىن, 500 شاقىرىمنان استام سۋارۋ جانە تاراتۋ ارنالارىن, 3 ءىرى سورعى كەشەنىن جانە 3 ترانسفورماتورلىق قوسالقى ستانسانى, تىڭايتقىشتاردى ينتەگراتسيالانعان ادىسپەن بەرۋ جۇيەسىن, سونداي-اق الەمدىك جەتەكشى وندىرۋشىلەردىڭ زاماناۋي اۋىل شارۋاشىلىعى تەحنيكاسىن – جوعارى قۋاتتى تراكتورلاردى, ماقتا جيناۋ ماشينالارىن, بۇرىككىشتەر جانە مامانداندىرىلعان قۇرىلىس تەحنيكاسىن پايدالانۋ.
سونىمەن قاتار كەشەن اۋماعىندا پوليەتيلەندى قايتا وڭدەۋ جانە تامشىلاتىپ سۋارۋعا ارنالعان قۇرال مەن يىلگىش قۇبىرلاردى شىعارۋ بويىنشا جەلى قۇرىلادى, بۇل يمپورتقا تاۋەلدىلىكتى ازايتۋعا جانە ماقتا وسىرۋدەن باستاپ يىرىلگەن ءجىپ, ماتالار مەن كيىمدەردى شىعارۋعا دەيىنگى تۇيىق وندىرىستىك تسيكلدى قالىپتاستىرۋعا مۇمكىندىك بەرەدى. بۇگىندە قازاقستاندا جىل سايىن 70-75 مىڭ توننا ماقتا تالشىعى وندىرىلەدى, ونىڭ 85%-ى ەكسپورتتالادى.
جوبانى جۇزەگە اسىرۋ ەل ىشىندە تەرەڭ قايتا وڭدەۋ ۇلەسىن ۇلعايتۋعا, قوسىلعان قۇنى جوعارى دايىن توقىما ونىمدەرىن شىعارۋدى كەڭەيتۋگە مۇمكىندىك بەرەدى, بۇل تۇتاستاي العاندا وتاندىق توقىما ونەركاسىبىنىڭ وندىرىستىك بازاسىن نىعايتادى, ەكسپورتتىق الەۋەتتى ارتتىرادى, سونداي-اق شاعىن جانە ورتا بيزنەستى – لوگيستيكانى, تەحنيكانى جوندەۋدى جانە اۋىل شارۋاشىلىعى ونىمدەرىن قايتا وڭدەۋدى دامىتۋ ءۇشىن درايۆەر بولادى.
اۋىل شارۋاشىلىعى مينيسترلىگىنىڭ مالىمەتىنشە, ماقتا ءداستۇرلى تۇردە وتاندىق ماقتا ءوسىرۋ ورتالىعى بولىپ سانالاتىن تۇركىستان وبلىسىنىڭ ەگىس القاپتارىنىڭ 15,9%-ىن الىپ جاتىر. بيىل 144,5 مىڭ گەكتار القاپقا داقىل ەگىلدى, ونىڭ ىشىندە 50 مىڭ گا – تامشىلاتىپ سۋارۋدى قولدانۋ ارقىلى. 2025 جىلى ورتاشا ونىمدىلىگى 29,6 تس/گا بولاتىن 428 مىڭ توننا ءشيتتى ماقتا جينالدى – بۇل سوڭعى 18 جىلداعى ەڭ جوعارى كورسەتكىش. بۇنداي جەتىستىككە سۋدى ۇنەمدەيتىن تەحنولوگيالاردى بەلسەندى ەنگىزۋ, جانە اۋىلشارۋاشىلىق داقىلدارىنىڭ ونىمدىلىگىن ارتتىرۋدى قامتاماسىز ەتۋدىڭ ناتيجەسىندە قول جەتكىزىلدى.
