جوبانىڭ اتاۋى – «GeoJet». دروننىڭ بىرنەشە ۇلگىسى بار. ارقايسىسى ءوز ولشەمى مەن تەحنيكالىق ەرەكشەلىكتەرىنە قاراي ناقتى مىندەتكە بەيىمدەلگەن. سونىڭ ىشىندەگى ەڭ ىقشامى – ديامەترى نەبارى 23 سانتيمەتر بولاتىن «GeoJet Sphere». سفەرا ءپىشىندى شاعىن درون ادام اياعى جەتپەيتىن, ادامنىڭ ءوزى تۇسە المايتىن كۇردەلى كەڭىستىكتەرگە ارنالعان. تار شاحتالارعا, وپىرىلىپ تۇسكەن تۋننەلدەرگە, قۇلاعالى تۇرعان قۋىستارعا ەندى شاعىن روبوتتىڭ كۇشىمەن بارلاۋ جۇرگىزىلەدى.
ءىرى «GeoJet» اپپاراتتارى ۇزىن تۋننەلدەر مەن كەڭ كەن قازبالارىندا ۇشۋعا بەيىمدەلگەن. بارلىق مودەل 8K فورماتىنداعى ۋلترا-جوعارى كامەرالارمەن جابدىقتالعان. ولار جەراستى كەڭىستىگىن جان-جاقتى قامتىپ, 360 گرادۋسقا دەيىن پانورامالىق ءتۇسىرىلىم جۇرگىزە الادى. ءۇش ولشەمدى كارتا جاساۋعا قولدانىلاتىن LiDAR لازەرلىك سكانەرى – جوبانىڭ ەڭ كۇردەلى ءارى قۇندى قۇرىلىمىنىڭ ءبىرى. بەينەكادر بىردەن سىرتقا تارايدى: وپتيكالىق-تالشىقتى بايلانىس بۇل ۇدەرىستى جىلدام ءارى جوعالتۋسىز قامتاماسىز ەتەدى.
– ءبىزدىڭ دروندار قازبالاردى تەكسەرۋ, ۆيزۋالدى باقىلاۋ جۇرگىزۋ, جاسىرىن جارىقشاقتار مەن قۋىستاردى انىقتاۋ ماقساتىندا جاسالعان. قابىرعالاردىڭ ىشىندە كوزگە كورىنبەيتىن كەمشىلىكتەر بولادى, كوپ جاعدايدا وپىرىلۋدىڭ سەبەبى – ءدال سولار. اقاۋلار الدىن الا انىقتالسا, ادام ءومىرىن ساقتاپ قالۋعا بولادى, – دەيدى جوبانىڭ باس ينجەنەرى سەرگەي مۋراۆيوۆ.
تاجىريبەلىك كەزەڭ دە ءوز ناتيجەسىن كورسەتىپ ۇلگەردى. «GeoJet» اپپاراتتارى وڭىردەگى تەمىر كەنى شاحتاسىندا سىناقتان ءوتتى. ۇشۋ بارىسىندا دروندار ۆيزۋالدى باقىلاۋدى, ءفوتوتۇسىرىلىمدى, جەراستى قۋىستارىن تسيفرلىق سكانەرلەۋدى تولىق ورىندادى. شاحتا كەڭىستىگى – كەز كەلگەن تەحنيكاعا سىن. مۇندا اۋا قىسىمى جوعارى, GPS-سيگنال مۇلدە جوق, كورىنەتىن ايماق شەكتەۋلى.
– شەكتەۋلى كەڭىستىكتە ۇشۋ – درونداردىڭ ەڭ كۇردەلى مىندەتتەرىنىڭ ءبىرى. سوعان قاراماستان, ءبىزدىڭ قۇرىلعىلار تۇراقتى جۇمىس ىستەدى. جارتىلاي اۆتوماتتى باسقارۋ رەجىمى بار, جاساندى ينتەللەكت داتچيكتەردەن كەلەتىن دەرەكتەردى تالداپ, ۇشۋدى ناقتى ۋاقىتتا تۇراقتاندىرادى, – دەيدى جوبانى باسقارۋشى ۆيتالي پۋچكوۆ.
كەيبىر قۇرامداس بولىكتەر, مىسالى, كومىرتەكتى رامالار قاراعاندىدا شىعارىلادى: مودەل تۇرىنە قاراي ولار جەرگىلىكتى جەردە باسىلىپ دايىندالادى نەمەسە شەتەلدەن جەتكىزىلىپ, كەيىن وسىندا وڭدەلەدى. قوزعالتقىشتار, LiDAR جۇيەلەرى مەن پروتسەسسورلار شەتەلدىك كومپانيالاردان الىنادى. جوبا اياسىنداعى سىناقتار, باعدارلامالىق قامتاماسىز ەتۋ, قۇراستىرۋ, تولىقتاي رەتتەۋ ۇدەرىستەرى وڭىردە جۇزەگە اسىرىلىپ جاتىر.
بۇل ەلىمىزدەگى وندىرىستىك قاۋىپسىزدىك مادەنيەتىنىڭ جاڭا دەڭگەيگە كوتەرىلۋىنە باعىتتالعان قادام. جەراستى جۇمىستارىندا ادام ءومىرىن تاۋەكەلگە تىكپەي, روبوتتىق جۇيەلەردى قولدانۋ – دامىعان مەملەكەتتەردىڭ باستى قاعيداتى. ەندى وسى ءۇردىس ەلىمىزدە دە قارقىن الا باستادى.
قازىر ازىرلەۋشىلەر «GeoJet» توپتاماسىن نارىققا شىعارۋعا قام جاساپ جاتىر. ەگەر جوبا ويداعىداي جۇزەگە اسسا, وتاندىق دروندار تاۋ-كەن وندىرىسىندە عانا ەمەس, توتەنشە جاعداي قىزمەتىندە, قۇرىلىس سالاسىندا, قۇتقارۋ وپەراتسياسىندا دا كەڭىنەن قولدانىس تابۋى مۇمكىن.
قاراعاندى وبلىسى
