«قاۋىپسىز قالا» ءۇش جىلدىق جوباسى اياسىندا پاۆلوداردا 14 قاراشادان باستاپ كوشە قيىلىسىندا ورناتىلعان اپپاراتتىق-باعدارلامالىق كەشەندەر جۇمىس ىستەي باستادى. جوسپار بويىنشا قالا كوشەلەرىندە العاشقى 100 اپپاراتتىق-باعدارلامالىق كەشەن (ابك) ىسكە قوسىلدى. سونداي-اق قوعامدىق ءتارتىپتى باقىلايتىن 3 مىڭ جالپى بەينەباقىلاۋ كامەراسى بىرتىندەپ جۇيەگە جالعانىپ جاتىر.
«وبلىستا جالپى سانى 420 ابك ورناتۋ كوزدەلگەن ەدى. سونىڭ 240 داناسى پاۆلوداردا ورناتىلدى. العاشقى 100-ءى ىسكە كىرىستى. كولىك جۇرگىزۋشىلەر جول ەرەجەسىن بۇزباي, ابايلاپ جۇرگەنى ابزال. سەبەبى ابك-ءنىڭ بارلىعى پوليتسيانىڭ جەدەل باسقارۋ ورتالىعىنا جالعانعان. ءارى ىشكى ىستەر مينيسترلىگىنە, پروكۋراتۋرا ورگاندارىنا تىكەلەي كورسەتىلىم جۇرگىزىلەدى. سوندىقتان جول ەرەجەسىن بۇزعان كولىك يەلەرىنە پوليتسيا ورگاندارى تاراپىنان ايىپپۇل كەلە باستاۋى مۇمكىن», دەپ حابارلادى وڭىرلىك تسيفرلىق تەحنولوگيالار باسقارماسىنىڭ باسشىسى اعىباي ءامىرين.
باسقارما باسشىسىنىڭ ايتۋىنشا, ءار كوشە قيىلىسىندا 5-تەن 10-عا دەيىن الگىندەي ابك بار. ولاردىڭ سانى جولدىڭ ەكى نەمەسە ودان دا كوپجولاقتى بولۋىنا بايلانىستى الدىن الا بەلگىلەنىپ ورناتىلعان. قازىرگى ۋاقىتتا ەلىمىزدىڭ اۆتوجولدارىنداعى اۆتوماتتى بەينەباقىلاۋ جۇيەلەرىندە ەڭ ءجيى تىركەلەتىن زاڭ بۇزۋشىلىق – جۇرگىزۋشىلەر تاراپىنان جىلدامدىقتى شامادان تىس اسىرۋ. ابك اۋەلگى كەزەكتە جىلدامدىقتى اسىرعانداردى, باعدارشامنىڭ قىزىل تۇسىنە وتكەندەردى, تىيىم سالىنعان جول جولاعىن باسقانداردى, باسقا دا زاڭ بۇزۋشىلىقتاردى تىركەيدى.
بۇعان دەيىن جاۋاپتى باسقارما بارلىق كامەرا بيىلعى 1 قاراشادا ىسكە قوسىلۋى مۇمكىن ەكەنىن ايتقان. بىراق جۇيەلەردى مەردىگەر كومپانيا بەلگىلى سەبەپتەرمەن كەش ورناتۋعا ءماجبۇر بولعان.
«بەينەباقىلاۋ جۇيەسى بويىنشا جوبانى ۇتىپ العان «Antarium Group» جشس-دان بولەك, الدىنداعى كونكۋرسقا تاعى 3 كومپانيا قاتىسقان. ولار كونكۋرس ناتيجەلەرىمەن كەلىسپەي, ءبىزدى سوتقا بەردى. سالدارىنان سوت ءىسى ءبىراز ۋاقىتقا ۇلاسىپ, الماتى سوتى جابدىقتاردى ورناتۋ جۇمىسىنا تىيىم سالىپ قويدى. وسى جاقىندا عانا سوتتىڭ وڭ شەشىمى شىعارىلىپ, جۇمىس قاۋىرت تۇردە قايتا جالعاستى. مەردىگەردىڭ جوبانى كەش تاپسىرۋىنىڭ ءوز سەبەبى بار. ءبىز كامەرالاردى ورناتقانى ءۇشىن مەردىگەرگە اقشا تولەمەيمىز. تەك سەرۆيستىك قىزمەت كورسەتكەنى ءۇشىن جۇيە تولىق ىسكە قوسىلىپ جۇمىس ىستەي باستاعاندا عانا تولەي باستايمىز. جالپى, «Antarium Group» جشس-مەن
3 جىلعا سەرۆيستىك مودەل بويىنشا جالپى سوماسى 8,5 ملرد تەڭگەگە شارت جاسالدى», دەيدى ا.ءامىرين.
بارلىق بەينەكامەرا وڭىرلىك پوليتسيا دەپارتامەنتى مەن توتەنشە جاعدايلار دەپارتامەنتىنىڭ ۇسىنىسىمەن بەلگىلى ءبىر كوشە قيىلىستارىنا, كوشە بويلارىنا ورناتىلعان. ولاردى قۋات كوزىنە قوسۋ كەزىندە بىرقاتار ماسەلە تۋىنداعان. جەرگىلىكتى ەنەرگيا تاراتۋشى ۇيىم تەحنيكالىق شارتتاردى كەزەڭ-كەزەڭىمەن بەرىپ, سوعان وراي بۇگىندە كەيبىر كوشەدەگى كامەرالار ءالى دە قۋات كوزىنە جالعانباعانى انىقتالدى.
«كامەرالار مەن ابك-ءنى سەرتيفيكاتتاۋ ءىسى ءالى دە جالعاسىپ جاتىر. ءاربىر كامەرا سەرتيفيكاتتاۋدان وتەدى, تەكسەرىلەدى. جاۋاپتى كوميتەتكە بارلىق كامەرا جىبەرىلگەن, ولاردى قاراۋ ءبىراز ۋاقىتتى الادى. اي سوڭىنا دەيىن بەينەكامەرالار ءتيىستى تەكسەرۋدەن وتكىزىلىپ, سەرتيفيكاتتار بەرىلەدى دەپ كۇتىلىپ وتىر», دەيدى باسقارما باسشىسى.
بيلىك وكىلدەرى پاۆلودار قالاسىنداعى بارلىق 240 ابك مەن قوعامدىق قاۋىپسىزدىكتى باقىلاۋعا ارنالعان 3 مىڭ بەينەباقىلاۋ كامەراسى قاراشا ايىنىڭ سوڭىندا تولىق ىسكە قوسىلادى دەپ ۋادە ەتىپ وتىر.
پاۆلودار وبلىسى
