Guardian باسىلىمىنا New South Wales پوليتسياسىنىڭ مالىمەتىنشە, 36 جاستاعى ديلنوزا يسرايلوۆا مەن 44 جاستاعى اليشەريحوجا يسرايلوۆ «الاياقتىق جولمەن قارجىلىق ارتىقشىلىق الۋ» بابى بويىنشا ايىپتالىپ, Barangaroo اۋدانىنداعى كازينو اۋماعىندا قاماۋعا الىنعان.
بەيسەنبى كۇنى كازينو قىزمەتكەرلەرى ايەلدىڭ ۇستىندەگى Mickey Mouse بەينەسى بار جەيدەگە بەكىتىلگەن شاعىن قۇپيا كامەرانى بايقاپ قالعان.
«كازينو قىزمەتكەرلەرى پوليتسياعا حابار بەردى. وقيعا ورنىنا كەلگەن وفيتسەرلەر ايەل مەن ونىڭ 44 جاستاعى كۇيەۋىن ۇستادى», دەلىنگەن پوليتسيانىڭ مالىمدەمەسىندە.
تەرگەۋ بارىسىندا ەرلى-زايىپتىلاردان ماگنيتتەلگەن شاعىن زوندتار, باتارەيالار جانە كامەرا قىزمەتىن جاسىرىن اتقارۋعا مۇمكىندىك بەرەتىن قوسىمشا قۇرىلعىسى بار تەلەفون, سونداي-اق ارنايى جاسالعان اينا-تىركەمە تاركىلەنگەن.
پوليتسيا ولاردىڭ 2025 جىلدىڭ قازان ايىندا قازاقستاننان سيدنەيگە كەلگەنىن, سول كۇنى-اق Crown مۇشەلىگىنە تىركەلۋگە ءوتىنىش بەرگەنىن حابارلادى.
قازان مەن قاراشا ايلارى ارالىعىندا ولار كازينوعا بىرنەشە رەت بارىپ, جالپى 1,18 ملن دوللار ۇتىپ, قاۋىپسىزدىك قىزمەتىنىڭ كۇدىگىن تۋدىرعان.
ء«موبيلدى تەلەفوندار ارقىلى ۇستەلدەگى ويىن كارتالارىن جاسىرىن ءتۇسىرىپ, ولار تەرەڭ ورنالاسقان قۇلاققاپتار ارقىلى سىرتتان نۇسقاۋ الىپ وتىرعان. وسىلايشا كارتالىق ويىنداردا الداپ جەڭىسكە جەتكەن», دەپ مالىمدەدى NSW پوليتسياسى.
پوليتسيا Kent Street كوشەسىندەگى ولاردىڭ جالعا العان پاتەرىن ءتىنتۋ كەزىندە ءتۇرلى ويىن قۇرالدارى, باعالى اشەكەيلەر جانە 2 000 ەۋرو تاپقان.
ەرلى-زايىپتى جۇپ جۇما كۇنى جەرگىلىكتى سوتقا جەتكىزىلدى. ولار كەپىلگە بوساتۋدى سۇراماعان, سوت كەپىلدى اۆتوماتتى تۇردە قابىلدامادى.
ديلنوزا يسرايلوۆانىڭ ءىسى اقپاندا قارالادى. ال اليشەريحوجا يسرايلوۆ 11 جەلتوقساندا Downing Centre سوتىنا شىعۋى ءتيىس.
ۇيىمداسقان قىلمىسقا قارسى كۇرەس باسقارماسىنىڭ باسشىسى پيتەر فو مالىمدەگەندەي, پوليتسيا مەن كازينو قاۋىپسىزدىك قىزمەتىنىڭ ۇيلەسىمدى جۇمىسى مۇنداي قۇقىق بۇزۋشىلىقتاردى انىقتاۋعا مۇمكىندىك بەرەدى.
ء«بىزدىڭ دەتەكتيۆتەر كازينونىڭ قاۋىپسىزدىك قىزمەتىمەن تىعىز جۇمىس ىستەيدى. مۇنداي سەرىكتەستىك ويىن يندۋسترياسىنىڭ تازالىعىن قامتاماسىز ەتۋ ءۇشىن وتە ماڭىزدى», دەدى ول.
