فوتو: depositphotos.com
بۇگىننەن باستاپ ەلىمىزدە ىسكە قوسىلعان اۆتوليزينگتىڭ جاڭا باعدارلاماسى بويىنشا ونەركاسىپ جانە قۇرىلىس مينيسترلىگى جىلدىق شەكتى مولشەرلەمەنى بۇرىنعى 45%-دان 36%-كە دەيىن تومەندەتتى.
Qazaqstan Media سايتىنىڭ حابارلاۋىنشا, اۆتوليزينگ – اۆتونەسيەدەن وزگەشە فورمات. كولىك العاشقى جارناسىز, نەسيەسىز, بىراق ۇزاق مەرزىمگە جالعا بەرىلەدى. كەلىسىمشارت اياقتالعان سوڭ تۇتىنۋشىدا ەكى تاڭداۋ بار:
- كولىكتى ليزينگ كومپانياسىنا قايتا تاپسىرۋ;
- نەمەسە قالعان قارىزىن تولىق وتەپ, كولىكتى ساتىپ الۋ.
ليزينگتىڭ نەگىزگى ەرەكشەلىگى – كولىك بارلىق تولەمدەر اياقتالعانعا دەيىن ليزينگ كومپانياسىنىڭ مەنشىگىندە بولادى. ال تۇتىنۋشى كولىكتى پايدالانعانىمەن, وعان قاتىستى بارلىق تاۋەكەلدەر ءۇشىن جاۋاپتى. ياعني, كولىك زاقىمدانسا, ۇرلانسا نەمەسە جويىلسا – شىعىندى ءوزى وتەيدى. سول سەبەپتى كليەنتتەر مىندەتتى تۇردە ساقتاندىرۋ راسىمدەۋى ءتيىس.
شارت تالاپتارىنا سايكەس, تولەم ەكى ايدان ارتىق كەشىكسە, ليزينگ كومپانياسى كولىكتى قايتارىپ الۋعا قۇقىلى.
جاڭا اۆتوليزينگ وتانداستارىمىزعا كولىك الۋ مۇمكىندىگىن ارتتىرۋعا باعىتتالعان ءارى بۇل تەتىك نارىقتاعى باسەكەنى دە كۇشەيتەدى دەپ كۇتىلىپ وتىر.
