«بالبال تاستار ەجەلگى تۇركىلەردىڭ جەرلەۋ جانە ەسكە الۋ داستۇرلەرىنىڭ ماڭىزدى بولىگى بولعان. ولار كوبىنەسە ەرجۇرەك باتىرلار مەن جاۋىنگەرلەردى بەينەلەگەن. ال ايەل بەينەسىندەگى بۇل بالبال تاس – سول داۋىردە ايەلدىڭ دە قوعامدا ەرەكشە ورىن العانىنىڭ ايعاعى. وسى تاستىڭ كومەگىمەن ءبىز VI–VII عاسىرلارداعى تۇركى قوعامىنداعى ايەل مارتەبەسىن, رۋحاني مادەنيەتىن جانە انالىق وبرازدىڭ قادىرىن تەرەڭ ۇعىنا الامىز» دەيدى الماتى وبلىسى «اناعا قۇرمەت» مۋزەيىنىڭ مەڭگەرۋشىسى گۇلنار ءابىش.
«اناعا قۇرمەت» مۋزەيىندەگى ەڭ قۇندى جادىگەردى «قۇرمەت», «وتان» وردەندەرىنىڭ يەگەرى, قازاقستاننىڭ ەڭبەك سىڭىرگەن قايراتكەرى, سۋرەتشى اماندوس اقاناەۆ بيىلعى قىركۇيەك ايىندا ارنايى تابىس ەتكەن. ونەر تارلانى مۋزەي جۇمىسىنا وڭ باعاسىن بەرە كەلە, انا تاقىرىبىن ارقاۋ ەتكەن بىرنەشە قۇندى كارتيناسىن سىيعا تارتقان. سونىمەن قاتار جەكە قورىنداعى تەڭدەسى جوق, وتە سيرەك كەزدەسەتىن ايەل بەينەسىندەگى بالبال تاستى تابىستاعانىن مۋزەي قىزمەتكەرلەرى ايرىقشا ماقتان تۇتادى.
ء«بىر كۇنى ماعان حابارلاسقان تانىسىم وسىنداي ەرەكشە بالبال تاس تابىلعانىن ايتتى. كورگەن ساتتە-اق ونىڭ تاريحي جانە رۋحاني ماڭىزىن ءتۇسىندىم. الايدا ول كەزدە ونى الۋعا مۇمكىندىگىم بولمادى. سوعان قاراماستان, ءوزىمنىڭ بىرنەشە قىمبات
تۋىندىلارىمدى ساتىپ, وسى بالبال تاستى الۋعا شەشىم قابىلدادىم. بۇل مەن ءۇشىن جاي عانا تاس ەمەس ەدى, ول انانىڭ رۋحىن, ايەلدىڭ ماڭگىلىك مەيىرىمىن بەينەلەيتىن قاسيەتتى بەلگى سەكىلدى كورىندى.
وسى جادىگەر مەنىڭ شەبەرحانامدا 15 جىلدان استام ۋاقىت بويى ساقتالدى. كەيىن «اناعا قۇرمەت» مۋزەيى اشىلعانىن ەستىپ, وسى تاستى مۇراجايعا سىيعا تارتتىم. بۇل – مەنىڭ اناما دەگەن العىسىم مەن قۇرمەتىمنىڭ بەلگىسى. انام دا شەبەر ەدى. ءوز قولىمەن جاساعان بىرنەشە جۇمىستى دا مۋزەيگە تاپسىردىم. وسى ارقىلى مەن انالاردىڭ ەڭبەگىن, رۋحىن جانە ولاردىڭ ادامزات تاريحىنداعى ورنىن ۇلىقتاعىم كەلدى», دەيدى قۇندى جادىگەردى تابىستاعان قىلقالام شەبەرى اماندوس اتىبەك ۇلى.
وسى كۇنى بويى 1 مەتر, سالماعى 500 كەلىلىك ايەل بەينەسىندەگى كونە جادىگەر «اناعا قۇرمەت» مۋزەيىنىڭ الدىنان ويىپ ورىن العان.
الماتى وبلىسى
