جيناقتىڭ تۇساۋكەسەرىنە ەلىمىزدىڭ زيالى قاۋىم وكىلدەرى, سەنات دەپۋتاتتارى, جوعارى وقۋ ورىندارىنىڭ رەكتورلارى, مادەنيەت جانە ادەبيەت قايراتكەرلەرى, عىلىم سالاسىنىڭ جەتەكشى ماماندارى قاتىستى.
ءىس-شارانى جۇرگىزگەن مەملەكەتتىك سىيلىقتىڭ لاۋرەاتى نۇرلان ورازالين جاڭا كىتاپتىڭ قۇرىلىمدىق ەرەكشەلىكتەرىنە, اۆتوردىڭ ومىرلىك تاجىريبەسىنە جانە ەڭبەكتىڭ قوعامدىق ماڭىزدىلىعىنا توقتالىپ, شىعارمانىڭ تاۋەلسىزدىك جىلدارى مەن ەل دامۋىنىڭ كۇردەلى كەزەڭدەرىن تۇسىنۋدە قۇندى دەرەك ەكەنىن اتاپ ءوتتى. مودەراتور رەتىندە ول وقىرمانعا كىتاپتىڭ نەگىزگى يدەيالارىن, مازمۇندىق سالماعىن جانە اۆتوردىڭ ازاماتتىق ۇستانىمىن تانىستىرۋعا باسىمدىق بەردى.
وقىرمانعا جول تارتقان "تايتالاس-تاعدىر" ەڭبەگى – ءبىر ادامنىڭ قىزمەت جولىن بايانداۋمەن شەكتەلمەيتىن, ەلىمىزدىڭ تاۋەلسىزدىك كەزەڭىندەگى الەۋمەتتىك, ساياسي جانە رۋحاني وزگەرىستەردىڭ ۇدەرىسىن كورسەتەتىن كەڭ تىنىستى شىعارما. اۆتور ۇزاق جىلدار بويى ءتۇرلى مەملەكەتتىك جانە قوعامدىق مىندەتتەردى اتقارا ءجۇرىپ كورگەن وقيعالارىن, ەلدىك مۇددە جولىنداعى كۇردەلى شەشىمدەر مەن جاۋاپكەرشىلىك ساتتەرىن, قوعامداعى وزگەرىستەردى ءوز كوزقاراسىمەن جەتكىزەدى. زامانداس تۇلعالارمەن پىكىر الماسۋلارى, ءتۇرلى تاريحي كەزەڭدەردەگى قىزمەتتىك تاجىريبەلەرى جانە سول ۋاقىتتىڭ قوعامدىق احۋالى كىتاپتىڭ نەگىزگى ارقاۋىن قۇرايدى.
اۆتور ۇلتتىق قۇندىلىقتار, ازاماتتىق جاۋاپكەرشىلىك, مەملەكەتتىك قىزمەت مادەنيەتى, ءبىلىم مەن عىلىم سالاسىنىڭ ماڭىزى سەكىلدى ماسەلەلەردى تالداپ, ولاردى قازىرگى زامانمەن بايلانىستىرا پايىمداعان.
تۇساۋكەسەرگە قاتىسقان زيالى قاۋىم وكىلدەرى ەڭبەكتىڭ تاريحي-تانىمدىق جانە تاربيەلىك ماڭىزىنا نازار اۋدارىپ, ونىڭ تاۋەلسىزدىك جىلدارىنداعى ماڭىزدى كەزەڭدەردى زەردەلەۋگە جول اشاتىنىن اتاپ ءوتتى.
كىتاپتا باياندالعان وقيعالار مەن وي-تولعامدار جاس بۋىنعا, بولاشاق زەرتتەۋشىلەرگە جانە جالپى ۇلتتىق تاريحقا قىزىعۋشىلىق تانىتاتىن وقىرمانعا قۇندى دەرەككوز بولا الاتىنى ايتىلدى.
«تايتالاس-تاعدىر» – تاريحشىلار مەن ساياساتتانۋشىلارعا, قوعامتانۋشىلارعا, مادەنيەتتانۋشىلارعا, ءبىلىم بەرۋ سالاسىنىڭ وكىلدەرىنە, سونداي-اق ەل دامۋى مەن رۋحاني ورلەۋىنە قىزىعۋشىلىق بىلدىرەتىن كەڭ اۋديتورياعا ارنالعان ەڭبەك. شىعارمادا جەكە تاعدىردىڭ ەلدىك دامۋ جولىمەن استاسۋى, قوعامدىق ويدىڭ قالىپتاسۋىنا اسەر ەتكەن كەزەڭدەر مەن تۇلعالار تۋرالى پايىمدار كورىنىس تاپقان», دەيدى ءىس-شاراعا كەلگەن عالىمدار.
ەل دامۋىنىڭ نەگىزگى كەزەڭدەرىن تۇسىنۋگە مۇمكىندىك بەرەتىن دەرەكتىك ءارى كوركەم-پۋبليتسيستيكالىق ەڭبەك تاۋەلسىزدىك ءداۋىرىنىڭ ساياسي, الەۋمەتتىك جانە رۋحاني ۇدەرىستەرىن سارالاۋدا ماڭىزدى ءرول اتقارادى. كىتاپ وقىرمانىن ويلانۋعا, وتكەنگە جاڭاشا كوزقاراسپەن قاراۋعا جانە بولاشاققا سىندارلى جاۋاپكەرشىلىكپەن وي تۇيۋگە شاقىرادى.
