كونفەرەنتسيانىڭ ماقساتى – بيولوگيالىق قاۋىپسىزدىك سالاسىنداعى وزەكتى ماسەلەلەردى تالقىلاۋ, جاڭا قاۋىپتەرگە قارسى عىلىمي نەگىزدەلگەن تاسىلدەردى ۇسىنۋ جانە حالىقارالىق ىنتىماقتاستىقتى نىعايتۋ. پلەنارلىق وتىرىستا مەملەكەتتىك ورگانداردىڭ وكىلدەرى, حالىقارالىق ۇيىمدار مەن عىلىمي-زەرتتەۋ ينستيتۋتتارىنىڭ ماماندارى بايانداما جاسادى.
باس دەمەۋشىلەر: Zalma LTD.,Boehringer Ingelheim
باعدارلاما 4 نەگىزگى سەكتسيانى قامتىدى. وندا ەپيدەميولوگيالىق جانە ەپيزووتيالىق جاعدايدى, سىرتقى جانە باسىم ىشكى بيولوگيالىق قاۋىپ كوزدەرىن مونيتورينگىلەۋ, جۇقپالى اۋرۋلار قوزدىرعىشتارىن انىقتاۋعا ارنالعان دياگنوستيكالىق قۇرالداردى ازىرلەۋدىڭ زاماناۋي تاسىلدەرى, ينفەكتسيالىق اۋرۋلارعا قارسى يممۋنوبيولوگيالىق پرەپاراتتاردى جاساۋدىڭ تەحنولوگيالىق ترەندتەرى, سونداي-اق ميكروورگانيزمدەردىڭ دارىگە توزىمدىلىك ماسەلەلەرى تالقىلاندى. بارلىعى 70-تەن استام عىلىمي جۇمىس ۇسىنىلدى.
سپيكەرلەر سوڭعى جىلدارى الەمدە ينفەكتسيالىق اۋرۋلاردىڭ تارالۋى, جاڭا پاتوگەندەردىڭ پايدا بولۋى, انتيبيوتيكتەرگە ءتوزىمدى شتامداردىڭ كوبەيۋى جاھاندىق قاۋىپسىزدىككە تونگەن قاتەر ەكەنىن اتاپ ءوتتى. وسىعان بايلانىستى ەلىمىزدە 2023 جىلدان جۇزەگە اسىرىلىپ جاتقان بيولوگيالىق قاۋىپسىزدىكتى قامتاماسىز ەتۋ شارالارىن جەتىلدىرۋدىڭ عىلىمي-تەحنيكالىق باعدارلاماسىنىڭ ناتيجەلەرى تانىستىرىلدى. باعدارلاما شەڭبەرىندە بىرقاتار جاڭا دياگنوستيكالىق جانە پروفيلاكتيكالىق قۇرالدار ازىرلەنىپ, قاۋىپتى ينفەكتسيالاردىڭ تارالۋ اتلاسى دايىندالدى.
سونىمەن بىرگە «بيولوگيالىق قاۋىپسىزدىك» كونسورتسيۋمىنىڭ عىلىمي ونىمدەرى ۇسىنىلعان كورمە ۇيىمداستىرىلدى. قاتىسۋشىلار وتاندىق عىلىمي ازىرلەمەلەردىڭ وندىرىستىك دەڭگەيدە قولدانۋعا دايىن ەكەنىن اتاپ ءوتتى.
حالىقارالىق ساراپشىلار بيولوگيالىق قاۋىپسىزدىك سالاسىندا عىلىمي ۇيىمدار, ۋنيۆەرسيتەتتەر مەن جەتەكشى زەرتحانالار اراسىنداعى سەرىكتەستىكتىڭ ماڭىزىن ەرەكشە اتاپ ءوتتى. جاس زەرتتەۋشىلەردىڭ حالىقارالىق تاجىريبە الماسۋىنا جاعداي جاساۋ قاجەتتىلىگى دە كوتەرىلدى.
وسىلايشا, كونفەرەنتسيا عىلىمي ىنتىماقتاستىقتى كەڭەيتۋگە, جاڭا كاسىبي بايلانىستار ورناتۋعا جانە قازاقستاننىڭ بيولوگيالىق قاۋىپسىزدىك جۇيەسىن دامىتۋعا ماڭىزدى ۇلەس قوستى.
