فوتو: اقوردا
«بارىڭىزگە بەلگىلى, ەلدەگى وزگەرىستەردىڭ ارقاسىندا مەملەكەتتىك قىزمەتكە مۇلدە جاڭا ادامدار كەلىپ جاتىر. وسى ورايدا, پرەزيدەنتتىك جاستار كادرلىق رەزەرۆىن ەرەكشە اتاپ وتكەن ءجون. رەزەرۆكە قوسىلۋعا ءوتىنىش بەرگەن 30 مىڭعا جۋىق ۇمىتكەردىڭ ىشىنەن 450 ادام ىرىكتەلىپ الىندى. ولاردىڭ 72%-ى باسشىلىق قىزمەتكە تاعايىندالدى.
كادرلار قۇرامىن جاڭارتۋ ۇدەرىسى بيلىكتىڭ بۇكىل تارماعىندا جانە بارلىق دەڭگەيدە جۇرگىزىلىپ جاتىر. بۇل – ۋاقىت تالابى. بىراق وسىنداي جاۋاپتى جۇمىستا ساياسي ناۋقانشىلدىققا جول بەرمەۋ كەرەك. ەڭ الدىمەن, ءتيىمدى ۇسىنىس ايتىپ, پايدالى باستامالار كوتەرەتىن, باتىل شەشىم قابىلداي الاتىن ازاماتتاردى, ياعني كاسىبي تۇرعىدان بىلىكتى مامانداردى مەملەكەتتىك قىزمەتكە كوپتەپ تارتۋ قاجەت. ءبىز وسى ماڭىزدى جۇمىستى جالعاستىرا بەرەمىز», دەدى قاسىم-جومارت توقاەۆ.
پرەزيدەنت اۋىلداردىڭ دامۋىن ءاردايىم الدىڭعى قاتارعا قوياتىنى بەلگىلى. ايتا كەتەيىك, ق.توقاەۆتىڭ العاشقى جارلىعى اۋىلدى دامىتۋعا ارنالعان ەدى.
«اۋىل – ءتول وركەنيەتىمىزدىڭ التىن قازىعى. اۋىلدى وركەندەتۋ – بارشاعا ورتاق پارىز. مەملەكەت بۇل ماسەلەگە ەرەكشە جاۋاپكەرشىلىكپەن قارايدى. وزدەرىڭىز بىلەسىزدەر, 2022 جىلى حالىققا ۇسىنعان سايلاۋ الدىنداعى باعدارلامادا اۋىل ماسەلەسىنە ايرىقشا نازار اۋداردىم.
العاشقى جارلىعىم دا اۋىلدى دامىتۋعا ارنالدى. سوعان سايكەس قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسى ازىرلەندى.
قازىرگى تاڭدا وسى قۇجاتقا ساي ناقتى جۇمىس اتقارىلىپ جاتىر. جۋىردا عانا اۋىل ەڭبەككەرلەرىنىڭ ەكىنشى فورۋمىن وتكىزىپ, وسى سالاداعى وزەكتى ماسەلەلەردى قارادىق. ال بۇگىن اۋىل-ايماقتاردىڭ دامۋ باعدارىن ايقىندايمىز. بۇل – مەملەكەتتىڭ الدىندا تۇرعان ستراتەگيالىق مىندەتتىڭ ءبىرى», دەدى مەملەكەت باسشىسى.
