فوتو: Polisia.kz
العاشقى جاعداي اقمولا وبلىسىنىڭ بۇلاندى اۋدانىندا تىركەلدى. قازان ايىندا ماكينسك قالاسىنىڭ 44 جاستاعى تۇرعىنى پوليتسياعا جۇگىنىپ, بۇرىن بىرگە جۇرگەن ەر ادام بىرنەشە اي بويى ونى ۇنەمى مازالاپ جۇرگەنىن ايتقان. ايەلدىڭ سوزىنشە, 38 جاستاعى ازامات ءارتۇرلى نومىرلەردەن تەلەفون شالۋمەن قاتار, جۇمىس ورنىنا, ءۇيىنىڭ ماڭىندا جانە قوعامدىق ورىنداردا اڭدىپ جۇرگەن. بۇل ارەكەتتەر تەك قولايسىزدىق تۋدىرىپ قانا قويماي, ايەلدىڭ ءوز قاۋىپسىزدىگى ءۇشىن الاڭداۋىنا سەبەپ بولعان.
تەكسەرۋ بارىسىندا ۋچاسكەلىك ينسپەكتورلار ەر ادامعا قاتىستى قورعانىس نۇسقاماسىن شىعارعانى جانە سوتتىڭ وعان جابىرلەنۋشىگە جاقىنداۋعا تىيىم سالعانى انىقتالدى. الايدا ول بۇل تالاپتاردى ەلەمەي, ارەكەتىن جالعاستىرعان. وسىدان كەيىن جابىرلەنۋشى ونى قىلمىستىق جاۋاپكەرشىلىككە تارتۋدى سۇراپ, پوليتسياعا قايتادان ارىز بەرگەن.
ارىز نەگىزىندە پوليتسيا ءبولىمىنىڭ تەرگەۋشىسى بەكزات بولپانوۆ سوتقا دەيىنگى تەرگەۋدى باستادى. تەرگەۋ بارىسىندا پوليتسەيلەر جابىرلەنۋشىدەن جانە كۇدىكتىدەن جاۋاپ الىپ, وقيعاعا كۋا بولعان ادامداردى انىقتادى. كۇدىكتى ءوزىنىڭ ارەكەتتەرىن قارىم-قاتىناستى قايتا قالپىنا كەلتىرۋ نيەتىمەن جاساعانىن مالىمدەگەنىمەن, كەيىن زاڭسىز ەكەنىن مويىندادى.
كەيىننەن جابىرلەنۋشى ءىستى توقتاتۋ تۋرالى ءوتىنىش ءتۇسىرىپ, پروكۋرورمەن كەلىسىلگەن شەشىم بويىنشا تەرگەۋ اياقتالعان.
