وسىلايشا, بيىلعى ون ءبىر اي ىشىندە وبلىستىڭ 10 اۋدانىنىڭ ىشىنەن 8 اۋدان مەن 1 قالادا 42 سايلاۋ ناۋقانى ۇيىمداستىرىلدى. ولاردىڭ 39-ى – اكىمدەردىڭ وكىلەتتىك مەرزىمىنىڭ اياقتالۋىنا, ۇشەۋى مەرزىمىنەن بۇرىن توقتاتىلۋىنا بايلانىستى وتكىزىلدى. وسىلاي سايلانعان اكىمنىڭ ءبىرى – كوكسۋ اۋدانىنا قاراستى بالپىق اۋىلدىق وكرۋگىنىڭ اكىمى تولەگەن قوجابەكوۆ.
«حالىقتىڭ پىكىرى قاشاندا ماڭىزدى. وسى اۋىلدىڭ ازاماتى بولعان سوڭ باعىمدى تاعى ءبىر رەت سىناپ كورەيىن دەدىم. اۋىل تۇرعىندارى قولدادى. قازىر وكرۋگىمىز ەرەكشە دامىپ كەلەدى. جول ماسەلەسى دە شەشىمىن تاپتى. كوگىلدىر وتىن كەلدى. حالىقتىڭ ارىز-ءوتىنىشى قالىس قالىپ جاتقان جوق», دەيدى اۋىل اكىمى.
سايلاۋ ۇدەرىسىنە وبلىستىق, 9 اۋداندىق جانە قالالىق اۋماقتىق سايلاۋ كوميسسيالارى مەن 98 ۋچاسكەلىك كوميسسيا جۇمىلدىرىلىپ, جالپى 632 مۇشەدەن تۇراتىن ۇيىمداستىرۋ قۇرىلىمى جۇمىس ىستەدى. سايلاۋشىلار تىزىمىنە 82 269 ادام ەنگىزىلىپ, ونىڭ 66 831-ءى داۋىس بەرۋگە كەلدى. ناتيجەسىندە, قاتىسۋ كورسەتكىشى 81,2 پايىزدى قۇراپ, اۋىلدىق جەرلەردەگى ساياسي بەلسەندىلىكتىڭ ءالى دە جوعارى ەكەنىن كورسەتكەن.
«ودان بولەك, وڭىردە ۇمىتكەرلەردى ۇسىنۋ كەزەڭى دە تارتىستى ءوتتى. 42 وكرۋگ بويىنشا بارلىعى 151 كانديدات ۇسىنىلىپ, ولاردىڭ 84,6 پايىزى – ءوزىن-ءوزى ۇسىنعان ازاماتتار بولدى. ال ساياسي پارتيالار تاراپىنان 23 ۇمىتكەر تىركەلدى, ونىڭ 21-ءى «Amanat» پارتياسىنان, ەكەۋى – قازاقستان حالىق پارتياسىنان. جالپى العاندا, ءبىر ورىنعا ورتاشا ەسەپپەن 3,6 كانديداتتان كەلىپ, سايلاۋدىڭ باسەكەلەستىك دەڭگەيى ايتارلىقتاي جوعارى بولدى. ەڭ كوپ ۇمىتكەر اقسۋ اۋدانىنىڭ اقسۋ اۋىلدىق وكرۋگىندە تىركەلىپ, ول جەردە ءبىر ورىنعا التى ادام تالاستى. ال ەڭ تومەن باسەكەلەستىك دەڭگەيى 8 اۋداننىڭ 22 وكرۋگىندە بايقالدى, ارقايسىسىندا 3 ۇمىتكەردەن عانا ۇسىنىلدى», دەيدى جەتىسۋ وبلىسىنىڭ اۋماقتىق سايلاۋ كوميسسياسىنىڭ توراعاسى تيمۋر داۋتوۆ.
ونىڭ ايتۋىنشا, 30 ناۋرىزدا پانفيلوۆ اۋداندىق ءماسليحاتىندا شىعىپ قالعان ورىنعا 1 دەپۋتات سايلاندى. سايلاۋعا 2 اۋماقتىق سايلاۋ كوميسسياسى, 1 وكرۋگتىك سايلاۋ كوميسسياسى, 3 ۋچاسكەلىك سايلاۋ كوميسسياسى, بارلىعى 39 كوميسسيا مۇشەسى قاتىستى. سايلاۋشىلار تىزىمىندەگى سانى – 5 370, داۋىس بەرۋگە قاتىسقاندار – 3 942. بۇل وتە جاقسى كورسەتكىش سانالادى.
ونىڭ ايتۋىنشا, ۇمىتكەرلەردىڭ بىرقاتارى ءارتۇرلى سەبەپتەرمەن سايلاۋ ۇدەرىسىنەن شەتتەتىلدى. بارلىعى 25 كانديدات تىزىمنەن الىنىپ, ولاردىڭ 12-ءسى مەملەكەتتىك قىزمەت تۋرالى زاڭ تالاپتارىنا سايكەس كەلمەگەن. تاعى 9 ادام ءوز ەركىمەن باس تارتقان, ونىڭ ىشىندە جەتەۋى تىركەۋدەن كەيىن ءوتىنىش بەرگەن. ۇشەۋى قۇجاتتار توپتاماسىن تولىق تاپسىرماعاندىقتان وتكىزىلمەي قالسا, بىرەۋىنىڭ سايلاۋشىلار قولى جالعان بولىپ شىققان. ال ءبىر ۇمىتكەر ۇگىت جۇرگىزۋ ءتارتىبىن بۇزعانى ءۇشىن تىزىمنەن شىعارىلدى. ناتيجەسىندە, سايلاۋعا 128 كانديدات قاتىسقان. بۇل – ءبىر ورىنعا ورتاشا 3,05 ۇمىتكەردەن كەلەتىن دەڭگەي.
«باسەكەلەستىگى ەڭ جوعارى وكرۋگ تاعى دا اقسۋ اۋدانىنىڭ اقسۋ اۋىلدىق وكرۋگى بولدى, مۇندا ءتورت كانديدات باق سىنادى. ال ەڭ تومەن باسەكەلەستىك قاراتال اۋدانىنداعى باستوبە جانە ەسكەلدى اۋدانىنىڭ تولەنگۇت اۋىلدىق وكرۋگتەرىندە تىركەلدى, بۇل اۋىلداردا ارقايسىسىندا ەكى ۇمىتكەردەن عانا ۇسىنىلدى», دەيدى جەتىسۋ وبلىسىنىڭ اۋماقتىق سايلاۋ كوميسسياسىنىڭ مۇشەسى سامات بەيسەنوۆ.
بيىلعى اۋىل اكىمدەرىن سايلاۋ جەرگىلىكتى باسقارۋ جۇيەسىندەگى دەموكراتيالىق ۇدەرىستەردىڭ ودان ءارى دامىپ كەلە جاتقانىن كورسەتكەن ماڭىزدى ساياسي وقيعا بولدى. قوعامدىق بەلسەندىلىك تە, ۇمىتكەرلەردىڭ سانى دا جەرگىلىكتى ءوزىن-ءوزى باسقارۋعا دەگەن قىزىعۋشىلىقتىڭ كۇشەيگەنىن بايقاتادى.
جەتىسۋ وبلىسى
