رۋسلان جاپاروۆ «شىعىس» كەنىشىندە 2012 جىلدان بەرى ەڭبەك ەتەدى. باستاپقىدا قويما شارۋاشىلىعى ۋچاسكەسىندە ماتاۋشى بولىپ جۇمىس ىستەدى. 2014 جىلدان بەرى تەحنولوگيالىق كەشەن ۋچاسكەسىندە. كەنىشكە جۇمىسقا كىرگەنىنە 13 جىل بولعان, سونىڭ 11 جىلى وسى ۋچاسكەدە ءوتىپ كەلەدى.
ونىڭ قىزمەتتىك مىندەتى – تسيكلدى-اعىندى ارشۋ كەشەنىنىڭ جۇمىسىن قامتاماسىز ەتۋ. قاراپايىم تىلمەن ايتساق, روتورلى تەحنيكا وندىرگەننەن كەيىن كوتەرگىش كونۆەيەر ارقىلى كەلىپ تۇسكەن ءونىمدى جىلجىمالى لەنتامەن قويماعا قاتتاۋعا جەتكىزۋ. ارىپتەستەرىمەن بىرگە وسى ۇدەرىستى قاداعالاپ, جابدىقتارعا قىزمەت كورسەتەدى, تاسىمال ۇدەرىسىنىڭ ۇزىلمەۋى جولىندا تەر توگەدى.
جۇمىس كۇنى كونۆەيەر جابدىقتارىنىڭ جۇمىسقا دايىندىعىن, ياعني تەحنيكانىڭ پايدالانۋ نۇسقاۋلىعىنا سايكەستىگىن تەكسەرۋدەن باستالادى. ءار كەنشىنىڭ ەڭبەك قاۋىپسىزدىگى, سونداي-اق جۇمىس ورنىنىڭ ەڭبەك, ءورت قاۋىپسىزدىگى تالاپتارىنا ساي بولۋى دا ەستەن شىعارۋعا بولمايتىن ماڭىزدى ماسەلە. ءتيىستى اقپاراتتى تاپسىرۋ-قابىلداۋ جۋرنالىنا جازۋ جۇمىسى بار. وسىنىڭ ءبارى قاپ-قارا شاڭ-توزاڭنىڭ ورتاسىندا وتەدى.
كونۆەيەر ەكىنىڭ ءبىرى رۋلىنە وتىرا بەرەتىن جەڭىل كولىك, ءتىپتى تراكتور دا ەمەس. وعان ارنايى ءبىلىم كەرەك. تەحنيكالىق سيپاتتاماسىن, پايدالانۋ تالاپتارىن, اسپاپتار كورسەتكىشىنىڭ ءمانىن تولىعىمەن ءبىلۋ قاجەت. ون جىلدان اسا ۋاقىت رۋسلان وسى مىندەتتى تياناقتى اتقارىپ كەلەدى. كاسىبىنە ادالدىعى مەن ۇجىمىنداعى تاتۋلىق, بىرلىكتى ارتتىرۋعا قوسىپ جۇرگەن ۇلەسى ءۇشىن كاسىپورىن باسشىلىعى تاراپىنان ءتۇرلى ماراپاتقا يە بولعان.
رۋسلاننىڭ ەرەكشە ءبىر قىرى – كەنىشتىڭ قوعامدىق جۇمىسىنان سىرت قالعان ەمەس. جىل سايىن ناۋرىز مەيرامىنداعى مەرەكەلىك ءىس-شارالاردىڭ بەل ورتاسىندا جۇرەدى. بيىلعى ناۋرىزدا دا تۇنگى اۋىسىمنان شىققانىنا قاراماستان قازاقى شاپان, تۇلكى تىماعىن كيىپ, مەرەكە كورىگىن قىزدىردى. كاسىپوداق ۇيىمى ۇيىمداستىرعان اسىق اتۋ سايىسىندا ءبىرىنشى ورىندى جەڭىپ الدى. وعان قوسا ەكىباستۇز قالالىق اسىق اتۋ جارىسىندا دا جەڭىمپاز اتانىپ, قازان ايىندا استانا قالاسىندا «Qazaqmetal kasipodagy» تاۋ-كەن مەتاللۋرگيا سالالىق كاسىپوداعى وتكىزگەن «ەڭبەك اتلەتى – 2025» سايىسىنان «سۇرمەرگەن ويىنشى» اتالىمىمەن ورالدى.
– كورشى-قولاڭمەن دە تاتۋ-ءتاتتى تۇرامىز. جۇمىستان بوس كەزدە ءتۇرلى ءىس-شارانى بىرلەسىپ ۇيىمداستىرامىز. ناۋرىز مەيرامىندا ءوزىم تۇراتىن كوپقاباتتى ءۇيدىڭ اۋلاسىنا قازاقى ءۇي تىگىلىپ, ساماۋىر قويىلىپ, قازان كوتەرىلەدى. كيىز ۇيدە كورشىلەر ناۋرىز مەيرامىندا عانا ەمەس, رامازان ايىندا دا مارە-سارە بولىپ جيىلىپ, اۋىزاشار بەرىسەدى. جيىنداردان بالالار دا قالىس قالماي, ءتۇرلى ويىن وينايدى. ولارعا ونەگە كورسەتۋ – ەرەسەكتەردىڭ مىندەتى, – دەيدى ول.
رۋسلان – كوپبالالى اكە. بيىل ءبىلىم-يننوۆاتسيا ليتسەيىن بىتىرگەن تۇڭعىشى ءادىل ءىت ماماندىعى بويىنشا مەملەكەتتىك گرانتقا قول جەتكىزىپ, استانادا ءبىلىم الىپ جاتىر. وتاعاسى كومىر قازىپ, وتباسىن اسىراۋ قامىمەن جۇرگەندە جارى گۇلميرا ۇيدە بالا تاربيەسىمەن اينالىسادى. بەرەكەلى وتباسى «شىعىس» كەنىشىنىڭ باسشىلىعى ۇسىنعان تۇرعىن ءۇي باعدارلاماسىنىڭ يگىلىگىن كورىپ, بالالارى ءۇش بولمەلى پاتەردە اسىر سالىپ ءوسىپ كەلەدى.
اڭگىمە ۇستىندە رۋسلان ارعى اتاسى, تۇركىستاندا جەرلەنگەن مىرزاعۇل باتىردىڭ باسىنا بارىپ زيارات ەتۋگە نيەتتەنىپ جۇرگەنىن ايتتى. باباسى ەل مەن جەردى جاۋدان قورعاسا, بەرگى اتالارى دا وسال ەمەس, ارقايسىسى ەڭبەك باتىرى دەۋگە تۇرارلىق تۇلعالار. ءوز اتاسى باداش جاپاروۆ ۇزاق جىلدار باياناۋىل وڭىرىندە شوپان بولىپ, مال شارۋاشىلىعىنداعى ادال ەڭبەگىمەن اتى شىققان. ارعى اتاسى جاپار دا ءوز زامانىنىڭ اتاقتى قويشىسى بولعان.
– بەلگىلى جازۋشى ءازىلحان نۇرشايىقوۆ اتام جاپاردىڭ شاڭىراعىندا بولىپ, ءدام تاتىپ, اتام مەن اجەم تۋرالى ءوزىنىڭ «الىستاعى اۋداندا» اتتى وچەركىندە جازىپ كەتكەن, – دەيدى ول.
ءدال قازىر رۋسلان الاي-دۇلەي جەلمەن ۇيىتقىعان شاڭ استىندا ءجۇر, كومىر توزاڭىنان ءجۇزى كورىنبەيدى. ءبىز رۋسلان سياقتى جانكەشتى جۇمىسشىلار قازىپ جەتكىزگەن كومىردىڭ ارقاسىندا «جىلى ۇيدە جۇت جوق» دەپ, ىستىق شايدان ۇرتتاپ قويىپ, الاڭسىز وتىرمىز.
پاۆلودار وبلىسى,
ەكىباستۇز قالاسى
