رەدج سپيرس سول جىلى انگلياعا وليمپيادا ويىندارىنا ىرىكتەۋ جارىسىنا قاتىسۋ ءۇشىن بارعان. سپورتتاعى بولاشاعىنان ۇلكەن ءۇمىت كۇتتىرگەن جاس جىگىت انگليادا ءبىراز ۋاقىت دايىندالعانىمەن, جارىسقا وتە المايدى. قالتاسىندا كوك تيىن جوق, ەلگە قايتا ۇشۋعا مۇمكىندىگى بولماعان سپيرس توسىن شەشىمگە بارادى. ول اۋسترالياعا «اۆياپوشتامەن» ورالۋ جوسپارىن قۇرادى.
دوسىنىڭ كومەگىمەن اعاشتان 150×90×75 سانتيمەتر كولەمىندەگى جاشىك جاسايدى. ىشىنە اۋا كىرەتىن تەسىكتەر, سۋ مەن تاماققا ارنالعان ىدىس, جىلى كيىم جانە قالتالىق دارەت شەلەك ورنالاستىرادى. ءسويتىپ, ءوز-ءوزىن جۇك رەتىندە «وراپ», «اقىسىن العان كەزدە تولەنەدى» (cash on delivery) دەگەن بەلگىمەن جولداپ جىبەرەدى.
ۇشۋ بارىسىندا سپيرس بىرنەشە رەت جاشىكتەن شىعىپ, اياق-قولىن جازعان. ال ەڭ قاۋىپتى ءسات بومبەيدەگى (قازىرگى مۋمباي) ارالىق ايالدامادا بولىپتى. مۇندا جۇكشىلەر جاشىكتى كۇن استىندا بىرنەشە ساعات بويى قالدىرعان. ونىڭ ۇستىنە سپيرس سول ساتتە جاشىك ىشىندە توڭكەرىلىپ, باسىمەن تومەن قاراپ جاتقان. كەيىن ول بۇل ءساتتى ەسكە الىپ:
«مەن ءتىپتى ەسىمدى جوعالتىپ الا جازدادىم. بىراق امان قالدىم. مەنىڭ بار ماقساتىم – ۇيگە جەتۋ ەدى», دەپ ايتقان.
بىرنەشە كۇندىك اۋىر ساپاردان كەيىن سپيرس پەرت قالاسىنداعى اۋەجايعا جەتكىزىلەدى. ول جەردە باگاج قويماسىنداعى قابىرعانى تەسىپ, ەشكىمگە بايقالماي قاشىپ شىعادى. بىرنەشە ساعات وتكەن سوڭ, ەركىندىككە شىققان «جولاۋشى» ەڭ الدىمەن دوستارىنا حابارلاسىپ, ءوز ەلىندە جۇرگەنىن جەتكىزەدى.
ەگەر انگلياداعى كومەكشىسى ءۇنسىز قالعان بولسا, بۇل وقيعا ەشكىمگە بەيمالىم كۇيدە قالار ەدى. الايدا ول رەدجتەن حابار الا الماي, مازاسىزدانىپ, جۋرناليستەرگە بولعان جايتتى ايتىپ بەرەدى. سول ساتتەن باستاپ سپيرس الەمدىك سەنساتسياعا اينالادى. گازەتتەر ونى «ادام-پوشتا», «جاشىكتەگى ساياحاتشى» دەپ اتاپ, فوتوسىن ءبىرىنشى بەتكە شىعارادى.
ونىڭ باتىلدىعىنا تاڭدانعاندار كوپ بولدى. كەيبىرى مۇنى ەرلىك دەپ باعالاسا, ەندى ءبىرى اقىماقتىق پەن تاۋەكەلدىڭ شەگى دەدى.
رەدج سپيرس كەيىن دە ءبىراز جىل ەل نازارىندا ءجۇردى. الايدا ول ءوزىن باتىر دەپ ساناماعان. ءبىر سۇحباتىندا: «مەن جاي عانا ۇيگە جەتكىم كەلدى. سول ساتتە باسقا امال جوق ەدى», دەگەن بولاتىن. ۋاقىت وتە كەلە ونىڭ بۇل وقيعاسى كوپتەگەن دەرەكتى فيلم مەن تەلەباعدارلامالاردا كورسەتىلىپ, ەرەكشە ادام توزىمدىلىگى مەن تاپقىرلىقتىڭ ۇلگىسى رەتىندە ايتىلادى.
