فوتو: gov.kz
فورۋم ۇلتتىق سەرىكتەستەر مەن بيزنەس وكىلدەرىنىڭ قولداۋىمەن بۇۇ-نىڭ قازاقستانداعى وكىلدىگى جانە بۇۇ جاھاندىق شارتىنىڭ ورتالىق ازيا جەلىسى ۇيىمداستىرعان جوعارى دەڭگەيلى ايماقتىق الاڭعا اينالدى. ءىس-شارانىڭ باستى ماقساتى ءوڭىر ەلدەرىنىڭ ەكونوميكاسىن جاڭعىرتۋدى, جاسىل تەحنولوگيالاردى ەنگىزۋدى جانە قوعامنىڭ الەۋمەتتىك ءال-اۋقاتىن ارتتىرۋدى جۇيەلى تۇردە ۇيلەستىرۋ بولدى.
جيىندا ورتالىق ازياداعى يننوۆاتسيالار مەن جاسىل ترانسفورماتسيانى جەدەلدەتۋدەگى جەكە سەكتوردىڭ ماڭىزى اتاپ ءوتىلدى. سونىمەن بىرگە قازاقستان, قىرعىزستان, وزبەكستان, تاجىكستان جانە تۇرىكمەنستان كومپانيالارىن بايلانىستىراتىن جاڭا ايماقتىق حاب رەتىندە بۇۇ جاھاندىق شارتىنىڭ ورتالىق ازيا جەلىسى تانىستىرىلدى. بۇل الاڭ ءوڭىردىڭ جاۋاپتى بيزنەسىن ءبىر ارناعا توعىستىرىپ, حالىقارالىق ستاندارتتارعا ساي ىنتىماقتاستىق ورناتۋعا جول اشادى.
ەلىمىزدە ەكولوگيانى قورعاۋ, الەۋمەتتىك جاۋاپكەرشىلىك جانە كورپوراتيۆتىك باسقارۋ ساپاسىن ارتتىرۋعا باعىتتالعان ESG قاعيداتتارىن قولداناتىن كومپانيالاردىڭ سانى 150-دەن استى. بۇل بيزنەس قاۋىمداستىقتىڭ ورنىقتى دامۋ ماقساتتارىنا قوسقان ناقتى ۇلەسىن كورسەتەدى.
فورۋمدا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ۆيكتوريا شەگاي, بۇۇ قازاقستانداعى تۇراقتى وكىلى رادنااراگچا سارانگو جانە باسقا دا رەسمي تۇلعالار ءسوز سويلەدى. ۆيكتوريا شەگاي حالىقارالىق ەڭبەك ۇيىمىنىڭ 26 نەگىزگى كونۆەنتسياسىنىڭ راتيفيكاتسيالانعانىن, بۇۇ مۇگەدەكتەردىڭ قۇقىقتارى تۋرالى فاكۋلتاتيۆتىك حاتتاما قابىلدانعانىن جانە ەڭبەك نارىعىن دامىتۋعا ارنالعان جاڭا تۇجىرىمدامالاردىڭ ىسكە اسىرىلىپ جاتقانىن ايتتى. ونىڭ ايتۋىنشا, بۇل شارالار ينكليۋزيۆتى ساياساتتى كۇشەيتىپ, ورنىقتى دامۋ ماقساتتارىنا جەتۋدى جەدەلدەتەدى.
ۇلتتىق ەكونوميكا مينيسترلىگىنىڭ وكىلى نۇرگۇل جاننازاروۆا مەملەكەت پەن جەكە سەكتوردىڭ كۇش بىرىكتىرگەن جاعدايدا ۇلتتىق جانە جاھاندىق دەڭگەيدە ايقىن ناتيجەگە قول جەتكىزۋگە بولاتىنىن اتاپ ءوتتى. ورتاق ماقساتقا ۇمتىلعان قادامدار ەلدىڭ دامۋىن تۇراقتى ەتەتىنى ايتىلدى.
قازاقستانداعى بۇۇ تۇراقتى ۇيلەستىرۋشىسى رادنااراگچا سارانگو قازاقستاننىڭ سوڭعى جىلدارى ورنىقتى دامۋ ماقساتتارى بويىنشا ايتارلىقتاي ىلگەرىلەگەنىن جانە بۇل باعىتتا ۇكىمەت پەن بۇۇ اراسىنداعى ارىپتەستىك ءوز جەمىسىن بەرىپ جاتقانىن مالىمدەدى.
فورۋم قورىتىندىسى ورتالىق ازيانى جاڭا جىبەك جولى ۇلگىسىمەن دامىتۋدىڭ بەرىك نەگىزى قالانعانىن كورسەتتى. جاسىل تەحنولوگيالار, ينكليۋزيۆتى ساياسات جانە جاۋاپتى بيزنەس ءوڭىردىڭ جاڭا دامۋ باعىتىنا اينالماق.
