شاعىن درونعا ورناتىلعان قۇرىلعىلار سۋتەگى يوندارىن (pH), ەلەكتروتكىزگىشتىك, ەرىگەن زاتتاردىڭ جالپى مولشەرىن جانە باسقا دا ماڭىزدى كورسەتكىشتەردى ولشەي الادى. دەرەكتەر كومپيۋتەرگە نەمەسە سمارتفونعا سىمسىز بايلانىس ارقىلى تىكەلەي جىبەرىلەدى.
قازىر توتەنشە جاعدايلاردىڭ الدىن الۋ مەن سالدارىن جويۋ, پروفيلاكتيكالىق جۇمىستاردى شەشۋ كەزىندە ۇشقىشسىز باسقارىلاتىن ۇشاق اپپاراتتارىن قولدانۋ يدەياسى بارعان سايىن تانىمال بولا تۇسۋدە. جوبا جەتەكشىسى, فيزيكا ءپانىنىڭ مۇعالىمى جاسۇلان مەڭدىباەۆتىڭ ايتۋىنشا, بۇل يدەيا ەكەۋارا اڭىمەلەسىپ وتىرعاندا پايدا بولىپتى.
– بىردە قايسار قازىرگى قوعام درونداردى ءتۇرلى سالادا جاپپاي قولدانىپ جاتقانىن, اسىرەسە ونى اتا-اناسى اۋىل شارۋاشىلىعىندا ءتيىمدى تۇردە قولدانىپ جۇرگەنىن اسەرلەنە وتىرىپ اڭگىمەلەدى. بۇل اڭگىمە بىزگە ۇلكەن يدەيا بەردى. جاڭادان جوبا جاسايمىز, ونى درون ارقىلى ىسكە اسىرامىز دەگەن شەشىمگە كەلدىك. ءوڭىرىمىزدىڭ حالقى ەكولوگيا ماسەلەلەرىنە ەرەكشە الاڭدايدى. اسىرەسە سۋ مەن اۋا تازالىعىن, قورشاعان ورتانىڭ قاۋىپسىزدىگىن ۇنەمى تەكسەرىپ وتىرۋ ومىرلىك ماڭىزدى دۇنيە. وزەن مەن كولدىڭ لاستانۋى اعىندى سۋدىڭ, تىڭايتقىشتىڭ, وندىرىستىك قالدىقتتىڭ اسەرىنەن بولۋى مۇمكىن. سوندىقتان درونىمىز وزەن-كولدەردىڭ تازالىعىن, قۇرامىن تەكسەرۋى كەرەك دەگەن ۇيعارىم جاسادىق, – دەيدى جوبا جەتەكشىسى.
جوبا يەلەرى ساپالى پروتوتيپ جاساۋ وڭايعا سوقپاعانىن ايتادى. ەڭ باستى مىندەتتەردىڭ ءبىرى – ولشەگىش تەستەردى درونعا سەنىمدى ءارى ۇقىپتى بەكىتۋ قاجەت بولعان. بۇل تۇستا ولار 3D پرينتەردىڭ كومەگىنە جۇگىنگەن. قۇرىلعى ارقىلى بەكىتكىش جاساپ, تەستەردى درونعا ورناتادى. بۇل تەستەر سمارتفونعا سيگنالدار جىبەرىپ, سۋدىڭ قۇرامى تۋرالى اقپارات بەرەدى. باستاپقىدا قاجەتتى اناليزاتوردى تابۋ دا كوپ ۋاقىتتى العان ەكەن. ەكەۋى بارلىق مۇمكىندىكتى پايدالانىپ, اقىرى ناتيجەگە قول جەتكىزگەن.
– قايسار ەكەۋىمىز جاساپ شىعارعان پروتوتيپ زاۋىتتىق بالامادان ارزان. قۇرىلعى سۋدىڭ تازالىعى ماڭىزدى بولاتىن كەز كەلگەن سالادا قولدانىلۋى مۇمكىن. قاراپايىم ادام ءۇشىن باعاسى قولجەتىمدى, – دەپ قوستى جاسۇلان مەڭدىباەۆ.
ۇستاز بەن وقۋشى بۇگىندە دروندى ءساتتى تۇردە سىناپ ۇلگەرگەن. باياناۋىلداعى سابىندىكول, جاسىباي, تورايعىر كولدەرىندە, سونداي-اق ەرتىس پەن ۋسولكا وزەندەرىندە زەرتتەۋ جۇمىستارىن جۇرگىزىپ, سۋدىڭ قۇرامىن تەكسەرىپ كورگەن. كولدەردەگى كورسەتكىش سىن كوتەرەرلىك دەڭگەيدە, ال وزەن سۋلارىنىڭ پارامەترلەرى قالىپتى نورماعا ساي ەكەنىن انىقتاعان.
ايتىپ وتەيىك, قايسار بۇگىندە 13 جاستا. ايتۋىنشا, روبوتتەحنيكامەن, ءتۇرلى اپپاراتتاردى قۇراستىرۋمەن اۋەستەنەدى. مەكتەپتە گەوگرافيا ءپانىن, سونىڭ ىشىندە گەولوگيانى ءسۇيىپ وقيدى. كەلەشەكتە ول درون قۇراستىرۋ سالاسىندا ماماندانۋدى قالايتىنىن جەتكىزدى.
پاۆلودار وبلىسى
