فوتو: ەرلان ءالىمحانوۆتىڭ جەكە ءارحيۆى
«MEGADRONE360» دەپ اتالاتىن دروندى جاساۋعا شامامەن ەكى جىل ۋاقىت كەتكەن, جانە ول تولىقتاي اقش-تا ازىرلەنگەن. ناتيجەسىندە جوبا درون تەحنولوگيالارى سالاسىنداعى 200-دەن استام امەريكالىق كومپانيامەن باسەكەدە فينالعا ءوتتى.
ەرلان ءالىمحانوۆتىڭ ايتۋىنشا, درونىنىڭ بىرەگەيلىگى ونىڭ مودۋلدىك قۇرىلىمىندا جانە 360 گرادۋسقا اينالاتىن پلاتفورماسىندا. مۇنداي مۇمكىندىك دروندى اسكەري دە, ازاماتتىق تا سالالاردا پايدالانۋعا جول اشادى. قۇرىلىمى توتەنشە جاعدايلارعا ارنالعان ءارتۇرلى مودۋلدەردى ورناتۋعا مۇمكىندىك بەرەدى. مىسالى, ادامداردى قۇتقارۋ جانە ەۆاكۋاتسيالاۋ كەزىندە, اۋەدەگى اينالمالى پروجەكتور رەتىندە, ءدارى-دارمەك جەتكىزۋگە, جۇك تاسىمالداۋعا نەمەسە ءورت سوندىرۋگە قولدانۋعا بولادى. ءورت كەزىندە مودۋلدىك پلاتفورما قۇرعاق ۇنتاقتى حيميالىق ءورت ءسوندىرۋ زاتتارىن اتقىلايتىن مەحانيزممەن جابدىقتالعان.
دروننىڭ قولدانۋ سالاسى وتە كەڭ: وتشاشۋ ۇشىرۋدان باستاپ اۋىر بەينەكامەرا ورناتۋعا دەيىن.
قازىرگى ۋاقىتتا ونىڭ فۋنكتسيونالدىعىن كەڭەيتۋ باعىتىندا جۇمىستار جۇرگىزىلىپ جاتىر. سونىڭ ىشىندە ءموبيلدى كۇن ەلەكتر ستانتسياسىن ازىرلەۋ جانە جەرمەن جۇرەتىن روبوت رەجيمىن قوسۋ جوسپارى بار.
«امەريكا قارۋلانۋ جاعىنان الەمدەگى جەتەكشى ەل. ءبىزدىڭ قاتىسۋىمىز جانە كومپانيامىزدىڭ توپ-10 فيناليست قاتارىنا ەنۋى مەن ءۇشىن عانا ەمەس, بۇكىل قازاقستان ءۇشىن ۇلكەن جەتىستىك. جوبامدى تانىستىرۋ بارىسىندا مەنىڭ قازاقستاننان شىققانىمدى ەرەكشە اتاپ ءوتتىم. امەريكالىقتار ءبىزدىڭ ەلدە دە جوعارى تەحنولوگيالار يندۋسترياسى دامىپ جاتقانىن ءبىلسىن», دەدى ەرلان ءالىمحانوۆ.
ەرلان ءالىمحانوۆ شىعىس قازاقستان وبلىسىنىڭ لەنينوگورسك قالاسىندا دۇنيەگە كەلگەن, بۇكىل ءومىرىن الماتىدا وتكىزگەن. قازاق اۋىلشارۋاشىلىق ينستيتۋتىن ينجەنەر-مەحانيك ماماندىعى بويىنشا اياقتاپ, كاسىبي جولىن ونەركاسىپتىك ديزاينعا ارناعان.
2021 جىلى اقش-تىڭ تالانتتار ۆيزاسىنا (EB-1A) ءوتىنىم بەرىپ, كەيىن كاليفورنيا شتاتىنىڭ فريمونت قالاسىنا قونىس اۋدارعان. دروندارمەن اينالىسۋدان بولەك, اقش-تا حالىق تۇتىناتىن تاۋارلاردىڭ 3D-ديزاينەرى بولىپ جۇمىس ىستەيدى.
