فوتو: وقۋ-اعارتۋ مينيسترلىگى
مەموراندۋم شەڭبەرىندە تاراپتار ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ وقۋ پروتسەسىنە عىلىمي, يننوۆاتسيالىق جانە تسيفرلىق تەحنولوگيالاردى, سونىمەن بىرگە جي ەنگىزۋ, STEM باعىتتارىن دامىتۋ جانە جاس عالىمدارعا قولداۋ كورسەتۋ بويىنشا بىرلەسكەن جوبالاردى ىسكە اسىرۋعا كەلىستى.
«مەملەكەت باسشىسىنىڭ تاپسىرماسىنا سايكەس ەلىمىزدە عىلىمدى دامىتۋعا ايرىقشا باسىمدىق بەرىلىپ وتىر. بۇل مەموراندۋم – بولاشاق زياتكەرلىك الەۋەتتى قالىپتاستىرۋ جولىنداعى ناقتى قادام. بۇگىندە ەرتە جاستان عىلىمعا باۋلۋ ماقساتىندا ءبىلىم بەرۋ ۇيىمدارىندا STEM-زەرتحانالار, زاماناۋي پاندىك كابينەتتەر مەن ءتۇرلى شەبەرحانالار ارقىلى زەرتتەۋ ينفراقۇرىلىمى قالىپتاستىرىلىپ جاتىر. بيىل مەكتەپ وقۋشىلارى 80-گە جۋىق حالىقارالىق جانە رەسپۋبليكالىق عىلىمي جوبالار بايقاۋلارىنا قاتىستى. بۇل بولاشاق عالىمداردى تاربيەلەۋ باعىتىنداعى جۇمىستاردى ساپالى جالعاستىرۋدىڭ وزەكتىلىگىن كورسەتەدى», دەدى جۇلدىز سۇلەيمەنوۆا.
وقۋ-اعارتۋ مينيسترلىگىنىڭ مالىمەتىنشە, 2025 جىل باسىنان بەرى حالىقارالىق وليمپيادالار مەن عىلىمي بايقاۋلاردا 1 564 وقۋشى 171 التىن, 312 كۇمىس, 394 قولا, بارلىعى 879 مەدال يەلەنگەن.
سونداي-اق ەلىمىزدە حالىقارالىق بەدەلدى عىلىمي بايقاۋلاردا جەڭىسكە جەتكەن وقۋشىلار مەن ولاردىڭ پەداگوگتەرىنە ءبىر رەتتىك مەملەكەتتىك سىياقى تولەۋ جۇيەسى ەنگىزىلىپ جاتىر. بۇعان دەيىن مۇنداي ىنتالاندىرۋ حالىقارالىق پاندىك وليمپيادالاردان ورىن العان بالالار ءۇشىن مۇمكىن بولىپ كەلگەن ەدى.
