سۋرەتتى تۇسىرگەن – ەسەنجول يسابەك
پاۆلودار اۋدانى ەجەلدەن اگروكەشەندەگى جەتىستىكتەرىمەن تانىمال. اۋداننىڭ ەگىس القابى بيىل 123 مىڭ گەكتاردان استى. بۇل وتكەن جىلمەن سالىستىرعاندا 7 مىڭ گەكتارعا ارتىق. اۋىل شارۋاشىلىعىن ءارتاراپتاندىرۋ اياسىندا كۇنباعىس, ارپا, قاراقۇمىق جانە كارتوپ القاپتارى ەداۋىر ۇلعايتىلدى. قازىر ديقاندار 30 مىڭ تونناعا جۋىق استىق پەن 130 مىڭ توننادان استام كارتوپ جيناپ ۇلگەردى. نەگىزى سۋارمالى ەگىنشىلىكتى دامىتۋ بويىنشا اتالعان اۋماق وبلىستاعى كوشباسشى اۋدان بولىپ سانالادى. تەك بيىل جاڭادان 936 گەكتار سۋارمالى ەگىس القابى ىسكە قوسىلدى. جاقىن بولاشاقتا سۋارمالى ەگىس القابى 18 مىڭ گەكتارعا جەتكىزىلۋگە ءتيىس. بۇل ونىمدىلىكتى ارتتىرۋ جانە ەگىس القاپتارىن كەڭەيتۋ ءۇشىن بەرىك نەگىز بولاتىنىنا ءسوز جوق.
كەيىنگى ۋاقىتتا بۇل وڭىردە اۋىل شارۋاشىلىعى ونىمدەرىن قايتا وڭدەۋگە ءمان بەرىلە باستادى. ماسەلەن, كەمەڭگەر اۋىلىندا «jielong holdings» كومپانياسى قۋاتتىلىعى جىلىنا 90 مىڭ توننا شيكىزاتتى قۇرايتىن ماي ەكستراكتسياسى زاۋىتىنىڭ قۇرىلىسىن جۇرگىزىپ جاتىر. ينۆەستيتسيا كولەمى 4 ميلليارد تەڭگەنى قۇرايدى, ال كاسىپورىن ىسكە قوسىلعاننان كەيىن 80 جاڭا جۇمىس ورنى قۇرىلادى. كومپانيا ديرەكتورى كي كي حانىم جوبانىڭ بارلىق كەزەڭدەرىندە وبلىس اكىمدىگىنەن قاجەتتى قولداۋ الىپ جاتقانىن اتاپ ءوتتى.
– قۇرىلىس كەزەڭىندە ءبىز سىرتقى كوممۋنيكاتسيالاردى جۇرگىزۋ ماسەلەلەرىندە كومەكتى سەزىندىك. ءبىز بارلىق جۇمىستى اياقتاپ, كەلەسى جىلى ءوندىرىستى ىسكە قوسۋدى جوسپارلاپ وتىرمىز. وبلىس باسشىلىعىنا ءبىزدىڭ باستامامىزعا قولۇشىن سوزىپ, نازار اۋدارعانى ءۇشىن العىسىمدى بىلدىرگىم كەلەدى, – دەيدى ول.
جىلىنا 60 مىڭ توننا شيكىزاتتى قايتا وڭدەيتىن ءارى 30 مىڭ تونناعا دەيىن دايىن ءونىم شىعاراتىن تاعى ءبىر ماڭىزدى جوبانى «كەمەڭگەر ماي» كومپانياسى ىسكە اسىرىپ وتىر. كاسىپورىنعا سالىناتىن ينۆەستيتسيانىڭ كولەمى – 2 ملرد تەڭگە كولەمىندە, 25 جاڭا جۇمىس ورنى قۇرىلاتىن بولادى. اتالعان كومپانيا باسشىسى يبراگيم حالياپوۆ ايماقتىڭ دامۋىن جىلدار بويى باقىلاعاننان كەيىن شىعىس قازاقستان وڭىرىنەن وسىندا كوشىپ كەلۋگە شەشىم قابىلداعانىن جەتكىزدى.
– ءبىز جيىرما جىلدان استام ۋاقىت شىعىس قازاقستان وبلىسىندا جۇمىس ىستەدىك. پاۆلودار وبلىسىنىڭ قالاي دامىپ جاتقانىن ءاردايىم مۇقيات قاداعالاپ, وڭ وزگەرىستەردى كورىپ, قولايلى ينۆەستيتسيالىق احۋالدى سەزىندىم. سوندىقتان وتباسىمىزبەن بىرگە كوشىپ كەلىپ, ءوندىرىس اشۋعا شەشىم قابىلدادىق. بۇگىن بۇل قادامنىڭ دۇرىس بولعانىنا كوزىم جەتىپ وتىر. ايماق بيلىگى ديالوگكە اشىق, بيزنەستى قولدايدى ءارى وركەندەۋىمىز ءۇشىن اۋاداي قاجەت بارلىق جاعدايدى جاساۋعا ىنتالى. وسىنداي اتموسفەرادا جۇمىس ىستەپ, جاڭا جوبالاردى ىسكە قوسسام, بولاشاققا ينۆەستيتسيا سالسام دەيمىن. ەرتىس بويى – بۇل مۇمكىندىكتەر ايماعى عانا ەمەس, سونىمەن قاتار ءومىر ءسۇرۋ مەن جوسپار قۇرۋ ءۇشىن جايلى ولكە, – دەپ اتاپ ءوتتى ينۆەستور.
اتاپ وتەرلىگى, پاۆلودار اۋدانى كارتوبىمەن دە تانىمال. مۇنداعى ديقاندار كەيىنگى ۋاقىتتا قىتىرلاق (chips) وندىرىسىنە ارنالعان كارتوپ وسىرۋگە دە ماماندانعان. مىسالى, «اگروسويۋز» فەرمەرلىك شارۋاشىلىعى ءوز ءونىمىن حالىقارالىق «PepsiCo» كومپانياسىنا وتكىزەدى. بۇل جەرگىلىكتى فەرمەرلەرگە جاڭا نارىقتاردى باعىندىرۋعا جانە ولاردى جاھاندىق ءوندىرىس تىزبەكتەرىنە بىرىكتىرۋگە سەبەپكەر. سونداي-اق مۇندا جينالعان ءونىمدى ساقتاۋدىڭ زاماناۋي ينفراقۇرىلىمى قۇرىلعان. سىيىمدىلىعى 15 مىڭ توننا كوكونىس قويماسى ءونىمدى ساقتاۋعا, ونىڭ ۇزدىكسىز جەتكىزىلۋىن قامتاماسىز ەتۋگە مۇمكىندىك بەرەدى. بولاشاقتا اۋماقتا قىتىرلاق ءوندىرىسىن جولعا قويۋعا ىنتالى ينۆەستورلار بولسا, وبلىس بيلىگى قولداۋعا دايىن ەكەندەرىن ءبىلدىرىپ وتىر. ينۆەستيتسيا تارتۋ, ەكسپورتقا باعدارلاۋ – ءوڭىردىڭ ستراتەگيالىق باسىمدىعى. جاڭا كاسىپورىندار اۋىل تۇرعىندارى ءۇشىن جاڭا جۇمىس ورىندارىن اشىپ قانا قويماي, جاڭا ونىمدەر شىعارىپ, كىرىستى ارتتىرادى ءارى وبلىس ەكونوميكاسىن نىعايتادى.
پاۆلودار وبلىسى,
پاۆلودار اۋدانى
