سۋرەتتى تۇسىرگەن – يگور بۋرگاندينوۆ
باۋىر باسقان «Egemen Qazaqstan» گازەتىمەن ەلۋ جىلدان اسا سىرلاسپىن. حات تاسۋشى تاڭەرتەڭ كەلگەنشە اسىعامىن. قولىما تيگەن بەتتە ارعىماققا ۇزەڭگى سالعانداي قۋات الامىن. باسىلىمداعى جاس جۋرناليستەردىڭ قالام تارتىسىنا سۇيسىنەمىن. سوزدەرى سالماقتى, ۇشقىر وي, الداعى بولاشاققا دەگەن ىنتىزار كوڭىل سەرپىلىسىن سەزىنەسىڭ. سودان سوڭ كوپتەن بەرى بەرىلىپ كەلە جاتقان جۋرناليستەر باعانىنا كوز جۇگىرتىپ, ولاردىڭ تالعامپاز ويلى قالام سىلتەسىنە ءسۇيسىنىپ, قايتالاپ وقيتىنىم بار.
جاقىندا پوشتا بولىمشەسىنە بارىپ, كەلەر جىلدىڭ باسپاسوزىنە جازىلدىم. گازەت قۇنى قىمباتتاپتى. باعانىڭ كوتەرىلۋى زاڭدىلىق, قازىر باسپاحانا, پوشتا, قاعاز – ءبارى قىمباتتاپ جاتىر. بۇعان تاڭىرقاۋعا بولمايدى. ءوزىم «Egemen Qazaqstan» گازەتىنە ءبىر جىلعا جازىلدىم.
الداعى جىلدان كۇتەر ءۇمىت كوپ. گازەت الىستاعى اۋىلداردىڭ تىنىس-تىرشىلىگىن تەرەڭىرەك قوزعاسا دەگەن تىلەك بار. ەلدە باياعىداي مىڭعىرعان مال جوق. كوپ اۋىل قاڭىراپ قالىپ جاتىر. بىلىكتى مەحانيزاتور, شوفەر اتاۋلى ازايدى, جاستاردىڭ ءبارى قالادا. قولى جەتكەندەرى ءارتۇرلى جۇمىس ىستەيدى, باسقاسى – تاكسيدە. اۋىلدا كارى-قۇتان عانا قالدى. سوعان قاراماستان, بۇگىندە اس, قۇدايى, مەرەيتويدىڭ ءبارى باسەكەگە اينالدى. اۋىلدا وتىرىپ, قالا ورتالىعىنداعى مەيرامحاناعا تاپسىرىس بەرىپ, جيعان-تەرگەنىن شاشادى. وسىلاردى كورىپ, جانىڭ اۋىرادى. ايتا بەرسەڭ, وي, قوزعار تاقىرىپ كوپ. مەنىڭ ايتپاعىم – وسى سەكىلدى اۋىلدىڭ حال-احۋالى سۇيىكتى گازەتىمىزدە ءجيى كوتەرىلسە دەگەن تىلەك.
اعايىنعا ايتارىم, «Egemen Qazaqstan» گازەتىنە جازىلۋدى ۇمىتپاعايسىز. شىنايى ىقىلاسىمدى بۇكپەسىز ايتىپ, وقىرمان قاۋىمعا قاتاردان قالماي, الداعى جىلعا جازىلۋدى پارىز سانا دەگىم كەلەدى. ال, سەن نە دەيسىڭ, جاناشىر وقىرمان؟
قايىربەك مىرزاحمەت ۇلى,
قازاقستاننىڭ قۇرمەتتى ءجۋرناليسى
قىزىلوردا
