بيىل ونەركاسىپتىڭ نەگىزگى قوزعاۋشىسى مۇناي سالاسى بولدى. ون ايدا تاۋ-كەن ءوندىرىسى 9,6 پايىزعا ۇلعايدى. ونىڭ ىشىندە مۇناي ءوندىرۋ كولەمى ەڭ جوعارى سەرپىن كورسەتتى. كورسەتكىش ءبىر جىلدا 13,9 پايىزعا ارتقان. اسىرەسە تەڭىز كەن ورنىنداعى ءوندىرىستىڭ كۇشەيۋى ەل ەكونوميكاسىنىڭ جىلدامداۋىنا تىكەلەي اسەر ەتتى.
وڭدەۋ ونەركاسىبىندە دە احۋال جامان ەمەس. بۇل سالا 5,8 پايىز ءوسىم كورسەتتى. ماشينا جاساۋ مەن ازىق-ت ۇلىك ءوندىرىسى ايتارلىقتاي قارقىن الىپ وتىر. ماشينا جاساۋ سالاسى 11,5 پايىز, ازىق-ت ۇلىك ءوندىرىسى 9,1 پايىز وسكەن. بۇل كورسەتكىشتەر وڭدەۋ ونەركاسىبىندەگى جالپى ءوسىمنىڭ نەگىزگى بولىگىن قۇراپ وتىر.
اناليتيكا ورتالىعىنىڭ مامانى سالتانات يگەنباەۆانىڭ ايتۋىنشا, مەتاللۋرگيادا ءوسىم بايقالعانىمەن, قارقىنى باياۋ. سالا كولەمى ۇلكەن بولعانىمەن, جىلدىق ءوسىم 0,7 پايىز دەڭگەيىندە قالدى. قارا مەتاللۋرگيا مەن مەتالل قۇيۋ باعىتتارىنداعى قىسقارۋ جالپى ناتيجەگە اسەر ەتتى. مەتاللۋرگيانىڭ باياۋلاۋى الەمدىك نارىقتاعى وزگەرىستەرگە بايلانىستى. ياعني باعا قۇبىلسا نەمەسە سۇرانىس ازايسا, ءبىزدىڭ كورسەتكىش تە تومەندەيدى.
ەنەرگەتيكا سەكتورىندا شامالى ءوسىم بار. ەلەكتر, گاز جانە جىلۋمەن قامتۋ 2,2 پايىزعا ارتتى. ەلەكتر ەنەرگياسىن ءوندىرۋ جانە تاراتۋ كولەمى وسسە, سۋ جيناۋ مەن قالدىقتاردى وڭدەۋ كەرىسىنشە تومەندەگەن. بۇل باعىتتا ون ايدا 6,3 پايىزدىق قۇلدىراۋ بايقالدى.
جالپى, ونەركاسىپتىڭ ءوسىمى قۋانتادى. بىراق ونىڭ نەگىزىنەن مۇناي سەكتورى ارقىلى قامتاماسىز ەتىلۋى تاۋەكەل تۋعىزادى. ءبىزدىڭ ەكونوميكا مۇناي باعاسىنا جانە سىرتقى نارىقتارداعى جاعدايعا تاۋەلدى. كەز كەلگەن وزگەرىس ونەركاسىپكە بىردەن اسەر ەتەدى.
سوندىقتان ساراپشىلار وڭدەۋ سالاسىن كۇشەيتۋ, كاسىپورىنداردى جاڭارتۋ جانە ءارتاراپتاندىرۋدى ەڭ ماڭىزدى مىندەت دەپ سانايدى. ويتكەنى تۇراقتى ەكونوميكالىق دامۋ ءۇشىن تەك مۇنايعا سەنۋ جەتكىلىكسىز.
