ۇلتتىق ستاتيستيكا بيۋروسى كومپيۋتەر, نوۋتبۋك جانە وزگە دە تسيفرلىق ماشينالار ءوندىرىسى بىلتىر بىردەن 2,3 ەسەگە وسكەنىن ايتادى. الايدا بيىلعى كورسەتكىش كەرى بۇرىلىپ, تومەندەۋ بايقالدى. سوڭعى ون جىلداعى ەڭ جوعارى ءوندىرىس كولەمى 2020 جىلعا تيەسىلى. ول كەزدە پاندەميا سالدارىنان قاشىقتان وقۋ مەن جۇمىس كەڭ تارالىپ, سۇرانىس كۇرت ارتقان بولاتىن. سول جىلى 29,9 مىڭ دانا تەحنيكا ءوندىرىلدى.
قاڭتار مەن تامىز ارالىعىنداعى مالىمەتتەرگە سۇيەنسەك, وتاندىق كاسىپورىندار كومپيۋتەرگە دەگەن ىشكى سۇرانىستىڭ 29,7 پايىزىن عانا وتەي الدى. قالعان 70,3 پايىزى يمپورت ەسەبىنەن جابىلدى. قازاقستانعا 27,6 مىڭ كومپيۋتەر مەن نوۋتبۋك اكەلىنسە, وتاندىق ءوندىرىس كولەمى 11,6 مىڭ دانا بولدى. بۇل وتكەن جىلمەن سالىستىرعاندا 30 پايىزعا از.
ەكسپورت كولەمى دە تومەندەدى. بيىل 577 دانا كومپيۋتەر سىرتقا جونەلتىلدى, بۇل وتكەن جىلعا قاراعاندا 22,6 پايىزعا از. ىشكى نارىقتاعى ساتىلىم دا 30,6 پايىزعا كەمىپ, 38,6 مىڭ دانا دەڭگەيىندە قالىپ وتىر.
يمپورتتىڭ باسىم بولىگى قىتايعا تيەسىلى. ەلىمىزگە اكەلىنگەن كومپيۋتەرلەردىڭ 90,5 پايىزى, ياعني 25 مىڭ دانا قىتايدان جەتكىزىلگەن. قالعان بولىگى وزبەكستان مەن رەسەيدەن كەلگەن. ەكسپورتتا دا نەگىزگى باعىت – قىرعىزستان بولىپ وتىر. 327 دانا تەحنيكا وسى ەلگە جونەلتىلگەن. ودان كەيىنگى ورىنداردا رەسەي مەن وزبەكستان تۇر.
بيىل ەلىمىزگە كومپيۋتەردەن بولەك, 449,8 مىڭ نوۋتبۋك پەن 22,8 مىڭ جەكە كومپيۋتەر جۇيەلەرى يمپورتتالدى. بۇلاردىڭ دا 90 پايىزدان استامى قىتاي وندىرۋشىلەرىنە تيەسىلى.
الەمدىك كورسەتكىشتەر دە قىتايدىڭ ابسوليۋت ۇستەمدىگىن كورسەتەدى. World’s Top Exports سايتىنىڭ دەرەگىنشە, 2024 جىلى الەم بويىنشا كومپيۋتەر ەكسپورتى 532,5 ملرد دوللار بولدى. ونىڭ 160,7 ملرد دوللارى تەك قىتايعا تيەسىلى. بۇل جالپى كولەمنىڭ ۇشتەن ءبىرى. تەك جەكە كومپيۋتەردىڭ ءوزى 6,9 ملن دانا كولەمىندە سىرتقا شىعارىلعان.
قىتايدان كەيىنگى ورىنداردا تايۆان, اقش جانە گونكونگ تۇر. ال قازاقستان كومپيۋتەر ەكسپورتىندا الەم بويىنشا 49 ورىنعا جايعاسقان. ەلىمىزدىڭ بىلتىرعى كومپيۋتەر جانە تسيفرلىق ماشينالار ەكسپورتى 97,7 ملن دوللاردى قۇرادى. بۇل كورسەتكىش قازاقستاندى رەسەي, وزبەكستان جانە قىرعىزستاننان جوعارى ورىنعا شىعارىپ وتىر.
