فوتو: قىرمىزى جۇماعاليقىزى
كەيىنگى جىلدارى استانادا 21 مەديتسينالىق نىسان پايدالانۋعا بەرىلگەن. دەسە دە جىل سايىن تۇرعىندار سانىنىڭ وسۋىنە بايلانىستى مەديتسينالىق مەكەمەلەرگە سۇرانىس ارتىپ كەلەدى.
سۇرانىستى وتەۋ ماقساتىندا وسى جىلدىڭ سوڭىنا دەيىن «نۇرلى جول» تەمىرجول ۆوكزالىنىڭ جانىندا اۋىسىم سايىن 350 كەلۋشىنى قابىلداۋعا قاۋقارلى جەكەمەنشىك كلينيكا اشۋ جوسپارلانعان. كلينيكا تۇرعىندارعا مەملەكەتتىك تاپسىرىس شەڭبەرىندە مەديتسينالىق كومەك كورسەتەدى.
ال كەلەر جىلى «سامۇرىق-قازىنا» قورىنىڭ قاراجاتى ەسەبىنەن №2 قالالىق كوپسالالى اۋرۋحاناسىندا قابىلداۋ-دياگنوستيكالىق كەشەنىنىڭ, سارىارقا اۋدانىندا 250 ورىندىق پەريناتالدىق ورتالىقتىڭ قۇرىلىسى اياقتالادى.
سونداي-اق ۇلتتىق شۇعىل مەديتسينانى ۇيلەستىرۋ ورتالىعىندا بالالارعا ارنالعان 200 ورىندىق تراۆماتولوگيا ورتالىعى سالىنادى.
«الداعى ءۇش جىلدا 11 دەنساۋلىق ساقتاۋ نىسانىن سالۋ جوسپارلانىپ وتىر. الماتى اۋدانىندا پەريناتالدىق ورتالىق, جاڭا زاماناۋي كوپسالالى اۋرۋحانا, جاڭا ءارى تولىققاندى 6 ەمحانا (ەكەۋى – مەملەكەتتىك) جانە جەدەل مەديتسينالىق كومەك كورسەتەتىن 3 قوسالقى ستانتسيا پايدالانۋعا بەرىلەدى», دەدى جەڭىس قاسىمبەك.
