سۋرەتتەردى تۇسىرگەن – ۆالەري بۋگاەۆ
كەنشىلەر قالاسىندا فەرروسيليتسي ءوندىرىسى بويىنشا الەمدەگى ەڭ ءىرى جانە ەڭ زاماناۋي كاسىپورىنداردىڭ ءبىرى – «EkibastuzFerroAlloys» زاۋىتى اشىلدى. زاۋىتتىڭ قۇرىلىسىنا 92 ملرد تەڭگە ينۆەستيتسيا باعىتتالعان. جىلدىق قۋاتتىلىعى – 240 مىڭ توننا جوعارى ساپالى FeSi75 فەرروسيليتسي ءونىمى. بۇل ءونىم الەمدە بولات, شويىن جانە اليۋميني قورىتپالارىن ءوندىرۋ ءۇشىن جوعارى سۇرانىسقا يە. ال كاسىپورىننىڭ ىسكە قوسىلۋى قازاقستاننىڭ فەرروسيليتسي ءوندىرىسى بويىنشا الەمدىك توپ-2-گە ەنۋىنە مۇمكىن بەرەدى. وسىلايشا, ەلىمىزدىڭ جاھاندىق مەتاللۋرگياداعى جەتەكشى پوزيتسياسىن نىعايتا تۇسەدى.
مەملەكەت باسشىسى قاسىم-جومارت توقاەۆ مۇنداي جوبالار ەلىمىزدىڭ ەكونوميكاسى ءۇشىن وتە ماڭىزدى ەكەنىن اتاپ وتكەن. «مەملەكەتىمىزدىڭ مىقتى بولۋى ءۇشىن الدىمەن وڭىرلەرىمىز مىقتى بولۋى كەرەك. قازاقستاندى دامىعان ونەركاسىبى بار مەملەكەتكە اينالدىرۋ ءبىز ءۇشىن اسا ماڭىزدى», دەگەن ەدى پرەزيدەنت. ءوندىرىس ورنى ءوڭىر دامۋىنا قۋاتتى سەرپىن بەرىپ قانا قويماي, ەكىباستۇز قالاسىنىڭ ەكونوميكالىق ءوسىمىنىڭ نەگىزگى تەتىكتەرىنىڭ بىرىنە اينالادى. ال وڭىرگە تارتىلعان ينۆەستيتسيالار مەن جاڭا سەرپىندى وندىرىستەردىڭ ىسكە قوسىلۋىنىڭ ارقاسىندا پاۆلودار وبلىسى 2027 جىلعا قاراي رەسپۋبليكالىق سۋبۆەنتسيالاردى الۋدان باس تارتىپ, قارجىلىق دەربەستىككە قول جەتكىزۋدى جانە الداعى ۋاقىتتا دونور-ايماق مارتەبەسىن الۋدى جوسپارلاپ وتىر.
جوبا 2022–2025 جىلدارى جۇزەگە اسىرىلىپ, قۇرىلىس كەزەڭىندە 1,5 مىڭ ادامدى جۇمىسپەن قامتىعان. ەندىگى ارادا تۇراقتى وندىرىستە 800-دەي مامان ەڭبەك ەتە الادى. زاۋىتتىڭ اشىلۋ سالتاناتىنا قاتىسقان ءوڭىر باسشىسى اسايىن بايحانوۆ اۋقىمدى ءارى تىڭ جوبا ەل پرەزيدەنتى ايقىنداعان نەگىزگى مىندەتتەر – شيكىزات ەكسپورتىنا تاۋەلدىلىكتى ازايتىپ, قايتا وڭدەۋ سەكتورىن جەدەل دامىتۋ جانە وڭىرلىك ەكونوميكانىڭ جاڭا درايۆەرلەرىن قالىپتاستىرۋ باعىتىندا جۇزەگە اسىرىلىپ وتىرعانىن اتاپ ءوتتى.
– وتكەن ايدا عانا ەكىباستۇزدا جۇمىس ىستەيتىن ءۇش فەرروقورىتپا زاۋىتىنىڭ بىرەۋىن ىسكە قوستىق. ال بۇگىن «EkibastuzFerroAlloys» زاۋىتىنىڭ اشىلۋىنا كۋا بولىپ وتىرمىز. بۇل – وڭىرىمىزدە تولىققاندى مەتاللۋرگيالىق كلاستەر قالىپتاستىرۋعا جانە وبلىستىڭ يندۋستريالىق دامۋىنىڭ جاڭا كەزەڭىن باستاۋعا جاسالعان تاعى ءبىر ۇلكەن قادام. جاڭا زاۋىت قازاقستاندى فەرروقورىتپا ءوندىرىسى بويىنشا الەمدىك كوشباسشىلار قاتارىنا شىعارۋعا مۇمكىندىك بەرەدى, دەدى ول.
جوبا اكتسيونەرلەرىنىڭ ءبىرى داۆيد كەمەرتەليدزە: «زاۋىت باستاپقىدان-اق جوعارى تەحنولوگيالى, ەكسپورتقا باعىتتالعان كاسىپورىن رەتىندە جوبالانعان. ءونىم 52 ەلگە ەكسپورتتالادى. قازاقستاننىڭ ۇلەس دەڭگەيى – 96%, بۇل جوعارى دەڭگەيدەگى لوكاليزاتسيانى جانە وتاندىق وندىرۋشىلەرگە دەگەن سەنىمدى كورسەتەدى», دەدى. ال اكتسيونەرلەردىڭ ايتۋىنشا, كاسىپورىن «جاسىل مەتاللۋرگيا» قاعيداتتارىنا نەگىزدەلگەن جانە ەڭ وزىق ەكولوگيالىق تەحنولوگيالاردى قولدانادى. گازدى تازارتۋ 99,8% دەڭگەيىندە. بارلىق شىعاتىن گاز كوپساتىلى سۇزگى جۇيەسىنەن وتەدى, ال جينالعان شاڭ قۇندى قوسالقى ءونىم – ميكروكرەمنەزەم بولىپ قايتا وڭدەلىپ, الەمدىك نارىقتارعا ەكسپورتتالادى. مۇنداي مودەل قورشاعان ورتاعا اسەردى بارىنشا ازايتىپ, زاۋىتتى ءوز ساناتىنداعى ەڭ ەكولوگيالىق كاسىپورىنداردىڭ بىرىنە اينالدىرادى. زامانعا ساي زاۋىتتىڭ باستى ماقتانىشى – ارقايسىسىنىڭ قۋاتتىلىعى 94,5 مۆا بولاتىن ءتورت يننوۆاتسيالىق رۋدوتەرميالىق ەلەكتر پەشتەرى. بۇل – الەمدىك تاجىريبەدە بالاماسى جوق سوڭعى ۇلگىدەگى جابدىقتار.
وسىلايشا, ەنەرگەتيكا جانە كومىر وندىرىسىمەن تانىمال ەكىباستۇز شاھارى بۇگىندە ەنەرگيا, مەتاللۋرگيا, ماشينا جاساۋ جانە تسيفرلىق تەحنولوگيالار توعىسقان كوپسالالى ونەركاسىپ ورتالىعىنا اينالىپ وتىر. جاڭا زاۋىت تۇراقتى جۇمىس ورىندارىن قامتاماسىز ەتىپ, ينجەنەر كادرلارىن دامىتىپ, يننوۆاتسيالار ەنگىزەدى. سونداي-اق جەرگىلىكتى مامانداردىڭ كاسىبي بىلىكتىلىگىن ارتتىرا وتىرىپ ءوڭىردىڭ يندۋستريالىق دامۋىنىڭ تىرەگىنە اينالادى. كاسىپورىن ءوڭىر بيۋدجەتىنە ەلەۋلى ۇلەس قوسىپ, شاعىن جانە ورتا بيزنەستىڭ, لوگيستيكا مەن سەرۆيستىك قىزمەتتەردىڭ دامۋىنا سەرپىن بەرۋگە ءتيىس.
پاۆلودار وبلىسى,
ەكىباستۇز قالاسى
