پاۆلودار وبلىسىنىڭ استىق وسىرۋشىلەرى جيىن-تەرىندى جوعارى ناتيجەمەن اياقتاپ جاتىر. بيىل تاعى دا رەكوردتىق استىق جينالدى. ديقاندار 836,8 مىڭ گەكتار القاپتان 1 ملن 105,8 مىڭ توننا ءداندى داقىل جيناپ, قامباعا قۇيىپ جاتىر. ورتاشا ونىمدىلىك گەكتارىنا 13,2 تسەنتنەردى كورسەتتى.
– اۋىل شارۋاشىلىعى داقىلدارىنان ەڭ جوعارى ونىمدىلىك كارتوپتان ءتۇستى – گەكتارىنان 296 توننا, سونداي-اق گەكتارىنان 13,7 تسەنتنەر بيداي, 10,9 تسەنتنەر قاراقۇمىق جينالدى. ديقاندار قازىردىڭ وزىندە 357 مىڭ توننادان استام بيدايدى تاجىكستان, وزبەكستان, اۋعانستان, قىرعىزستان, تۇرىكمەنستان, ازەربايجان مەملەكەتتەرىنە ەكسپورتتادى, – دەيدى وڭىرلىك اۋىل شارۋاشىلىعى باسقارماسىنىڭ باسشىسى ءادىل يسين.
كارتوپ داقىلى 30,2 مىڭ گەكتاردان جينالىپ, جالپى كولەمى 894,8 مىڭ توننا ءونىم قامبالارعا قۇيىلعان. پاۆلودار كارتوبى ساپاسىمەن ەرەكشەلەنەدى ءارى ەلىمىزبەن قاتار, كورشىلەس مەملەكەتتەردە جوعارى باعالانادى. جەرگىلىكتى فەرمەرلەردىڭ ءونىمىن قازىردىڭ وزىندە سىرت ەلدەردەن ساتىپ الىپ جاتقاندار بار.
– 88 534,8 توننا كارتوپ سىرتقا ەكسپورتتالدى. ونىڭ ىشىندە نەگىزگى ەكسپورتتاۋشى ەل – وزبەكستان, ولار 85,9 مىڭ توننا كارتوپ ساتىپ الدى. ال رەسەيگە 1512 توننا, تۇرىكمەنستانعا 1020 توننا, قىرعىزستانعا 22 توننا جونەلتىلدى, – دەپ قوستى باسقارما باسشىسى.
وبلىستاعى ەگىن شارۋاشىلىعىن قولداۋعا جالپى سوماسى 6,1 ملرد تەڭگە سۋبسيديا بولىنگەن. قاراجات مينەرالدى تىڭايتقىشتار مەن پەستيتسيدتەردىڭ, اۋىل شارۋاشىلىعى تاۋارىن وندىرۋشىلەرگە سۋ جەتكىزۋ قىزمەتىنىڭ قۇنىن سۋبسيديالاۋعا, باسىمدى وسىمدىك شارۋاشىلىعىن دامىتۋدى سۋبسيديالاۋعا, تۇقىم شارۋاشىلىعىن دامىتۋدى قولداۋعا باعىتتالعان. قازىر ەگىن شارۋاشىلىعىن سۋبسيديالاۋعا قوسىمشا بيۋدجەتتىك قاجەتتىلىك 7,98 ملرد تەڭگەنى قۇراپ وتىر.
پاۆلودار وبلىسى
