مۇگەدەكتىگى بار دەمەسەڭىز, ولاردىڭ ىزدەنىسى كوڭىل توعايتادى. ءۇش مىڭعا جۋىق وقىرمان كوركەم ادەبيەت اۋىلىنان الىستاعان ەمەس. كىتاپحانا جۇمىسىن ينكليۋزيۆتى باعىتتا ۇيىمداستىرۋ ءۇشىن ماڭىزدى جوبالار جۇزەگە اسىرىلىپ جاتىر. مۇگەدەكتىگى بار ازاماتتارعا ينكليۋزيا باعىتىندا 13 جوبا, 2 ۇيىرمە جۇمىس ىستەيدى. «Tiflo-اسحانا» جوباسى اياسىندا «اناما ارنالعان اق داستارقان», «ينكليۋزيا جانە تەاتر» جوباسى اياسىندا «جۇرەكپەن وقىعان شىعارمام» اتتى العاشقى ينكليۋزيۆتىك تەاتر بايقاۋى ۇيىمداستىرىلدى. سوڭعىسىنا وڭىرىمىزدەگى زاعيپ بالالار مەن جاسوسپىرىمدەر قاتىستى.
وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسى مۇگەدەكتىگى بار ازاماتتارعا شەكتەۋسىز مۇمكىندىكتەر ۇسىنىپ, ولاردىڭ بولاشاققا دەگەن سەنىمىن نىعايتۋ ءۇشىن ايانباي ەڭبەك ەتىپ كەلەدى. مۇندا مۇگەدەكتىگى بار 4 قىزمەتكەر جۇمىس ىستەيدى.
اۋەلى كىتاپحانا وقىرمانى بولعان تيفولوگيا ءبولىمىنىڭ مەڭگەرۋشىسى ەربول اققاي ۇلى قازىر وسىندا ەڭبەك ەتىپ جاتىر. باستاپقىدا برايل قارپىن ۇيرەنىپ باستاعان ەدى. قازىر ول كىتاپحانا كەلۋشىلەرىنە ءوز بىلگەنىن ۇيرەتىپ ءجۇر. ەربول اۋەلى زاعيپ بالالارعا ارنالعان مەكتەپ وقۋلىقتارىن برايل قارپىنە اۋدارۋدى قولعا الدى. كىتاپحانا وقىرماندارىنىڭ سۇرانىسىنا قاراي مەرەيتوي يەلەرىنىڭ شىعارمالارىن اۋدارىپ, قازىرگى تاڭدا ەكى مىڭعا جۋىق كىتاپ ءتارجىمالادى.
ەربول اققاي ۇلىنىڭ كاسىبي شەبەرلىگى مەن جۇمىسىنا دەگەن سۇيىسپەنشىلىگى ونى سالاداعى ۇزدىك مامانداردىڭ بىرىنە اينالدىردى. ول زاعيپ جاندارعا برايل قارپىندە كىتاپتار اۋدارىپ قانا قويماي, ولارعا كومپيۋتەرلىك ساۋاتتىلىقتى ۇيرەتىپ, ءاربىر وقىرمانمەن جەكە جۇمىس ىستەپ, ونىڭ رۋحاني قاجەتتىلىكتەرىن تۇسىنۋگە تىرىسادى. وسىلايشا, ەربول اققاي ۇلى الەۋمەتتىك ينكليۋزيانى ىلگەرىلەتۋگە ءوز ۇلەسىن قوسىپ وتىر.
جامبىل وبلىسى
