2040 جىلعا دەيىن الەمدىك اۋە نارىعى ەكى ەسەلەنەدى دەگەن بولجام بار. قازاقستان وسى مۇمكىندىكتى مەيلىنشە ءتيىمدى پايدالانۋ ءۇشىن اۆياتسيانىڭ الداعى ءۇش جىلعا ارنالعان دامۋ جوسپارىن جاڭارتتى. ICAO ءاۋديتى ەلىمىزدىڭ ستاندارتتارعا سايكەستىگىن 95,7% دەپ باعالاپ, قازاقستاندى الەمدەگى ەڭ قاۋىپسىز اۆياتسيالىق ايماقتاردىڭ قاتارىنا قوستى. بۇل حالىقارالىق اۋە تاسىمالى ءۇشىن ماڭىزدى سەنىم كورسەتكىشى.
جوسپارعا اۋەجاي ينفراقۇرىلىمىن جاڭارتۋ, جاڭا جولاۋشىلار جانە جۇك تەرمينالدارىن سالۋ, مارشرۋتتاردى كەڭەيتۋ, ۇشاق پاركىن ارتتىرۋ جانە شەتەلدىك وقۋ ورتالىقتارىن تارتا وتىرىپ, بىلىكتى ماماندار دايارلاۋ كىرەدى. ەلىمىزدىڭ ەكى ءىرى قالاسى – استانا مەن الماتى ەندى ورتالىق ازياداعى باستى اۆياتسيالىق حابقا اينالۋعا باعىت الدى. ەلوردادا ەكىنشى ۇشۋ-قونۋ جولاعى سالىنباق, ال الماتى اۋەجايىندا Horizon باعدارلاماسى بويىنشا جۇك حابى مەن سەرۆيستىك ەكوجۇيە قۇرىلماق.
ىشكى باعىتتار دا نازاردا. بيىلدىڭ وزىندە جولاۋشىلار سانى 13 ملن-نان اسقان. اۆياتسيا سالاسىنداعى ءاربىر 100 جۇمىس ورنى وزگە سالالاردا 610 قوسىمشا جۇمىس ورنىن تۋدىراتىنى حالىقارالىق تالداۋمەن دالەلدەنگەن. بۇل سالانىڭ ەكونوميكالىق مۋلتيپليكاتور رەتىندەگى ءرولى ايقىن ەكەنىن كورسەتەدى.
كەڭەستە جۇك تاسىمالىن دامىتۋ پەرسپەكتيۆالارى دا بەلگىلەندى. سونىمەن قاتار پرەمەر-مينيستر اۆياوتىن نارىعىنداعى ءتيىمسىز دەلدالداردى انىقتاپ, رەتتەۋدى تاپسىردى. بۇل قادام اۋە بيلەتتەرىنىڭ باعاسىنا دا ىقپال ەتۋى مۇمكىن.
اۆتوجول سالاسى دا نازاردان تىس قالمادى. جولداردىڭ جاعدايىن جاقسارتۋ, جابىن ساپاسىن ارتتىرۋ, ينفراقۇرىلىمدىق جوبالاردى جۇيەلى ءارى جاۋاپكەرشىلىكپەن ورىنداۋ مىندەتتەلدى.
قازاقستان وسىلايشا كولىك جۇيەسىن جاڭاشا قۇرىپ, ەلدىڭ ترانزيتتىك الەۋەتىن كۇشەيتەتىن شەشىمدەر قابىلداۋعا كىرىستى. ەكى مەگاپوليستىڭ اۋەجايلارى جاڭا تىنىس الىپ, رەسپۋبليكا ايماقتارىنىڭ ءوزارا بايلانىسى بۇرىنعىدان دا نىعايا تۇسپەك.
