جاڭا قىزمەت 2023 جىلدان بەرى ساران قالاسىندا جۇمىس ىستەپ كەلە جاتقان №8 پسيحولوگيالىق-پەداگوگيكالىق تۇزەتۋ كابينەتى بازاسىندا اشىلدى. بۇعان دەيىن اتا-انالار ەرتە تۇزەتۋ كومەگىن الۋ ءۇشىن جەكە ورتالىقتارعا جۇگىنۋگە نەمەسە قاراعاندىعا بارۋعا ءماجبۇر بولاتىن.
كابينەت «دارا» قورى مەن «شەۆرون» كومپانياسىنىڭ قولداۋىمەن جۇزەگە اسىرىلىپ جاتقان «مۇمكىندىكتەر ۋاقىتى» جوباسى اياسىندا قۇرىلدى.
ء«بىزدىڭ باستى مىندەتىمىز — بالانىڭ دامۋ ەرەكشەلىكتەرىن دەر كەزىندە بايقاپ, اتا-انالاردىڭ الاڭداۋشىلىقتان سەنىمدىلىككە قاراي جول تابۋىنا كومەكتەسۋ. قىزمەتتىڭ اشىلۋى – قالاداعى ينكليۋزيۆتى ءبىلىم بەرۋ جۇيەسى ءۇشىن ماڭىزدى قادام, ويتكەنى ەندى ەڭ كىشكەنتاي بالالار دا كاسىبي قولداۋدى ۋاقىتىلى الا الادى», دەيدى №8 تپپك باسشىسى قۇرالاي قۇلماعامبەتوۆا.
ساباق وتكىزۋ ءۇشىن جايلى دامىتۋشى ورتا جاساقتالدى: عيمارات دەمەۋشىلىك كومەكتىڭ ەسەبىنەن جوندەلىپ, قاجەتتى جابدىقتارمەن قامتاماسىز ەتىلدى. بولمە بەس ايماققا بولىنگەن: تانىمدىق, قيمىل-قوزعالىس, كوممۋنيكاتيۆتىك, سونداي-اق ءوز-وزىنە قىزمەت كورسەتۋ جانە الەۋمەتتىك ءوزارا ارەكەتتەسۋ ايماقتارى. مۇنداي ءتاسىل ءار بالاعا جەكە مارشرۋت قۇرىپ, قاجەتتى داعدىلاردى قالىپتاستىرۋعا مۇمكىندىك بەرەدى.
كابينەت تولىققاندى جۇمىسىن جاڭا جىلدان باستايدى. ەكى ترانسديستسيپلينارلىق مامان دايارلىقتان ءوتىپ جاتىر جانە لوگوپەديا, دەفەكتولوگيا جانە پسيحولوگيا باعىتتارى بويىنشا ساباق جۇرگىزەتىن بولادى. ەگەر اتا-انالار بالاسىنىڭ سويلەۋى كەشىگۋىن, قارىم-قاتىناستاعى قيىندىقتاردى, ۇيقىنىڭ بۇزىلۋىن نەمەسە دامۋداعى وزگە دە كەشەۋىلدەۋدى بايقاسا, بۇل جەرگە جولداماسىز كەلە الادى. قىزمەتتەردىڭ بارلىعى تەگىن ۇسىنىلادى.
«دارا» قورىنىڭ «ەرتە قولداۋ» جوباسىنىڭ جەتەكشىسى ايگۇل تابەرگەنوۆا مۇنداي قىزمەتتەر تيىمدىلىگى دالەلدەنگەن زاماناۋي ءتاسىلدى ەنگىزەتىنىن ايتادى: ول بالانىڭ دامۋىنا اسا ماڭىزدى كەزەڭدە اسەر ەتىپ, قوعامعا بەيىمدەلۋىنە ىقپال ەتەدى ءارى اتا-انالاردى قولدايدى.
«مۇمكىندىكتەر ۋاقىتى» جوباسى قازاقستاندا ەكىنشى جىل جۇزەگە اسىرىلىپ كەلەدى. العاشقى ەرتە قولداۋ كابينەتتەرى قاراعاندى مەن شاحتينسكىدە اشىلعان. 2026 جىلعا دەيىن مۇنداي قىزمەتتەردى قاراعاندى وبلىسىنداعى بارلىق تپپك مەن وڭالتۋ ورتالىقتارىندا قۇرۋ جوسپارلانىپ وتىر.
