جوباعا قاتىسۋشىلار سۇرانىسقا يە تسيفرلىق داعدىلاردى مەڭگەرىپ, تارگەتولوگ ماماندىعىن يگەرە الادى. كۋرس تىڭداۋشىلارعا زاماناۋي كاسىپتى ۇيرەتىپ قانا قويماي, ناقتى جۇمىسقا ورنالاسۋ مۇمكىندىگىن دە بەرەدى.
قازىردىڭ وزىندە تۇلەكتەردىڭ باسىم بولىگى ماماندىق بويىنشا ەڭبەك ەتىپ, ءوز جوبالارىن دامىتىپ كەلەدى.
وقۋ باعدارلاماسى 70% پراكتيكالىق جانە 30% تەوريالىق ساباقتاردان تۇرادى. ستۋدەنتتەر تارگەتتەلگەن جارنامانىڭ نەگىزدەرىن, جارناما پلاتفورمالارىنىڭ جۇمىس پرينتسيپتەرىن مەڭگەرەدى, جارنامالىق كامپانيالاردى قۇرۋدى, ماقساتتى اۋديتوريا مەن باسەكەلەستەردى تالداۋدى, بيۋدجەت جاساۋدى جانە كليەنتپەن دۇرىس كوممۋنيكاتسيا ورناتۋدى ۇيرەنەدى.
كۋرستى تابىستى اياقتاعانداردىڭ ءبىرى – وتباسىلىق پوليگرافيانى دامىتۋعا تارگەت جارناماسىن قولدانىپ جۇرگەن امانگۇل جاقىپوۆا. ونىڭ ايتۋىنشا, وقۋعا جازىلۋ شەشىمى جارنامانى ءوز بەتىنشە باسقارىپ ۇيرەنۋ نيەتىنەن تۋعان.
«مەنى شابىتتاندىرعانى – جارنامانى ءوزىم ورنالاستىرىپ, مامانداردىڭ كومەگىنە جۇگىنبەي-اق جۇمىس ىستەي الاتىنىم», دەيدى ول.
امانگۇل كۋرس باعدارلاماسى ءوزى كۇتكەنىنەن دە پايدالى بولعانىن اتاپ ءوتتى.
«كۋرس پايدالى ءارى قىزىقتى بولدى. بۇعان دەيىن بۇل سالا تۋرالى مۇلدە بىلمەيتىنمىن.ء وزىم جارناما جۇرگىزىپ, پوليگرافيامىزعا جاڭا كليەنتتەر تارتىپ وتىرمىن», دەيدى ول.
تارگەتتى ىسكە قوسقاننان كەيىنگى العاشقى وڭ ناتيجەلەر تەز بايقالىپ, كليەنتتەر سانى ارتقان.
امانگۇل جاڭادان باستاۋشىلارعا «تارگەت العاشىندا ءسال كۇردەلى كورىنۋى مۇمكىن, بىراق قورقۋدىڭ قاجەتى جوق» دەپ كەڭەس بەردى.
«جارنامانى ءوزىڭ جۇرگىزۋ – شىعىندى ۇنەمدەيدى ءارى ءىستى جۇرەكتەن جاساپ, تولىق باقىلاۋعا مۇمكىندىك بەرەدى», دەيدى ول.
سونىمەن قاتار, ول تارگەتتەلگەن جارنامامەن جۇمىس ىستەۋ وزىنە ەرەكشە ءلاززات سىيلايتىنىن ايتتى.
ايتا كەتەيىك, JOLTAP جوباسى استانادا ەكىنشى جىل جۇزەگە اسىرىلىپ جاتىر.
ول قالا تۇرعىندارىنا جۇمىس تابۋعا, تابىسىن كوبەيتۋگە جانە ەڭبەك نارىعىندا سۇرانىسقا يە ماماندىقتاردى مەڭگەرۋگە كومەكتەسەدى. جوبا ىسكە قوسىلعاننان بەرى 36 مىڭ قالا تۇرعىندارىنا قولداۋ كورسەتىلگەن.
جوبانى استانا اكىمدىگى «جاڭا مۇمكىندىك» قوعامدىق قورىمەن بىرلەسىپ جۇزەگە اسىرىپ كەلەدى. نەگىزگى ماقسات – قىسقا مەرزىمدى وقىتۋ جانە جۇمىسپەن قامتۋ, وسى شارالار ارقىلى قالا تۇرعىندارىنىڭ تابىسىن ارتتىرۋعا ىقپال ەتۋ.
