ماكس رايۆ تورتكۇل الەمدەگى تاڭعاجايىپ تابيعات پەيزاجدارىن سۋرەتكە ءتۇسىرىپ, ءوزىنىڭ ارنايى سايتىنا جاريالايدى. ونىڭ ىشىندە قازاقستانعا ارنالعان ءبولىم بار. بۇل سايتتاعى سۋرەتتەردىڭ باسىم كوپشىلىگىندە ماڭعىستاۋدىڭ تۋريستىك ورىندارى كورىنىس تاۋىپتى. ولاردىڭ قاتارىندا قارىنجارىق ويپاتى, بوقتى تاۋى جانە بوزجىرا شاتقالى بار.
قارىنجارىق ويپاتى ماڭعىستاۋ وبلىسىنىڭ وڭتۇستىك-شىعىس بولىگىندە, ءۇستىرت قورىعى اۋماعىندا, قاراقيا اۋدانىنداعى اققۇدىق اۋىلىنان شىعىسقا قاراي 24,4 شاقىرىم جانە باسعۇرلى ويپاتىنان شىعىسقا قاراي 72,2 شاقىرىم جەردە ورنالاسقان. بۇل ويپات شامامەن 70 ميلليون جىل بۇرىن كۇشتى ۆۋلكاندىق جارىلىس ناتيجەسىندە پايدا بولعان. ءۇستىرتتىڭ وڭتۇستىگىنەن باتىسقا قاراي ايماقتاعى ەڭ اۋقىمدى كەندىرلى سورى جاتىر. سورعا ونەرە جۇرناق تاۋلارىنان اعاتىن ونەرە بۇلاعى قۇيادى.
بوقتى تاۋى تەڭىز دەڭگەيىنەن 8 مەتر بيىكتىكتە ورنالاسقان. شوگىندى تاۋ تراپەتسيا ولشەمىمەن جانە قاباتتارىنىڭ سان الۋان تۇسىمەن ەرەكشەلەنەدى. تاۋ جىنىستارىنىڭ ءارتۇرلى قاباتى ايقىن كورىنەدى, ەتەك جاعى اق, سارعىش بولىپ باستالىپ, قىزعىلت, قىزىل رەڭگە الماسادى. ال ورتاڭعى جاعىنان جوعارى قاراي بىردەن قوڭىر تۇسكە اۋىسادى. ول ۇزدىكسىز جەل مەن ەروزيانىڭ اسەرىنەن بۇگىنگى بەينەسىنە يە بولعان.
عالىمداردىڭ ايتۋىنشا, بوزجىرا شاتقالى ميلليونداعان جىلدار بۇرىن تاۋ تۇزىلىمدەرىنىڭ بۇزىلۋىنان پايدا بولعان. اكتاستان قۇرالعان ءۇستىرت لاندشافتى, بيىكتىگى 250 مەترگە دەيىن جەتەتىن جارتاستارمەن ەرەكشەلەنەدى.
