فوتو: اقوردا
«قۇرمەتتى پرەزيدەنت, قۇتتىقتاۋىڭىز ءۇشىن ۇلكەن راحمەت! ءسىزدىڭ قولداۋىڭىز بەن سەنىمىڭىزدى ءاردايىم سەزىنەمىن», دەپ جازدى گولوۆكين الەۋمەتتىك جەلىدەگى پاراقشاسىندا.
بۇعان دەيىن پرەزيدەنت قاسىم-جومارت توقاەۆ گەننادي گولوۆكيندى World Boxing حالىقارالىق فەدەراتسياسىنىڭ پرەزيدەنتى بولىپ سايلانۋىمەن قۇتتىقتاعان ەدى.
ايتا كەتەيىك, گەننادي گولوۆكين 23 قاراشادا World Boxing ۇيىمىنىڭ باسشىسى بولىپ سايلاندى. ونىڭ كانديداتۋراسى ريمدە (يتاليا) وتكەن كونگرەسس بارىسىندا ماقۇلداندى. بۇل لاۋازىمعا ەكى ۇمىتكەر بولعانىمەن, سايلاۋعا جىبەرىلگەن جالعىز كانديدات – گەننادي گولوۆكين بولدى.
گەننادي گولوۆكين – قازاقستاننىڭ ەڭبەك سىڭىرگەن سپورت شەبەرى, 2003 جىلعى الەم چەمپيونى جانە 2004 جىلعى وليمپيادا ويىندارىنىڭ كۇمىس جۇلدەگەرى. پروفەسسيونالدىق رينگتە ول 45 جەكپە-جەك وتكىزىپ, 42 رەت جەڭىسكە جەتتى, ونىڭ 37-ءسى – نوكاۋت. ەكى رەت جەڭىلىپ, ءبىر جەكپە-جەكتە تەڭ ناتيجەگە قول جەتكىزگەن.
World Boxing – 2023 جىلى قۇرىلعان, الەمدىك دەڭگەيدە اۋەسقوي بوكستى دامىتۋ جانە رەتتەۋ مىندەتىن اتقاراتىن حالىقارالىق ۇيىم.
2024 جىلعى قىركۇيەكتە گولوۆكين ۇيىمنىڭ وليمپيادالىق كوميسسياسىن باسقاردى. ونىڭ ەڭبەگىنىڭ ارقاسىندا ءتۇرلى ەلدەردىڭ فەدەراتسيالارى World Boxing-ءتى مويىنداپ, بوكس 2028 جىلعى جازعى وليمپيادا ويىندارىنىڭ باعدارلاماسىندا ساقتالىپ قالدى.
