ۆيدەودان الىنعان سكرينشوت
ۆيدەودا نە بولعان؟
الەۋمەتتىك جەلىلەر مەن باق-تا جەدەل جاردەم قىزمەتكەرلەرى ورىندىقتا ۇيىقتاپ جاتقان ەر ادامدى اياقپەن يتەرىپ تاستاعان ۆيدەو تارادى. روليك اۆتورلارى قازاقستاننىڭ جەدەل جاردەم قىزمەتكەرلەرى ناۋقاستى قاراۋسىز قالدىرىپ, كومەك كورسەتپەستەن دالادا تاستاپ كەتتى دەپ مالىمدەدى.
«جۇرگىزىلگەن تالداۋ بۇل ۆيدەوداعى ادامداردىڭ قازاقستان جەدەل جاردەم قىزمەتكەرلەرى ەمەستىگىن كورسەتتى. ولاردىڭ فورماسىندا مەملەكەتتىك جانە ۆەدومستۆولىق بەلگىلەر جوق. ال بۇل – ەلىمىزدەگى بارلىق جەدەل جاردەم بريگادالارى ءۇشىن مىندەتتى تالاپ. سونىمەن قاتار كيىمنىڭ ءتۇسى مەن ۇلگىسى ەلىمىزدە قولدانىلاتىن بىرىڭعاي ستاندارتقا سايكەس كەلمەيدى», دەلىنگەن مينيسترلىك حابارلاماسىندا.
ۆەدومستۆو ءسوز بولعان ۆيدەونىڭ ۇستىنە ادەيى باسقا اۋديو قوسىلعانىن, ول كادرداعى جاعدايدى شىنايى ەتىپ كورسەتىپ, ەموتسيالىق كەرنەۋدى كۇشەيتكەنىن اتاپ ءوتتى.
«مۇنداي تەحنيكالاردى قولدانۋ – بۇرمالانعان شىندىقتى ۇسىنۋ جانە اۋديتوريانىڭ ەموتسيونالدىق قىسىمىن كۇشەيتۋ ماقساتىندا جاسالعان مانيپۋلياتسيالىق ءادىس. بۇل روليكتىڭ ماقساتى اقپارات بەرۋ ەمەس, كەرىسىنشە, نەگاتيۆتى كۇشەيتىپ, شۇعىل قىزمەتتەردىڭ بەدەلىنە نۇقسان كەلتىرۋ ەكەنىن تاعى دا دالەلدەيدى», دەدى مينيسترلىك.
اسىلىندا قاي جاقتا بولعان وقيعا؟
سونىمەن قاتار, بۇل وقيعانىڭ 2024 جىلدىڭ 11 ناۋرىزىندا رەسەيدىڭ ۆولگوگراد قالاسىندا بولعانى جانە سول كەزدە رەسەيلىك اقپارات قۇرالدارىندا كەڭىنەن جاريالانعانى انىقتالدى. تەكسەرۋ ناتيجەسىندە كىنالى تۇلعالار جاۋاپكەرشىلىككە تارتىلعان.
«وسىلايشا, ەسكىرگەن ءارى تولىق تەرگەلگەن وقيعانى قازاقستان قىزمەتتەرىمەن بايلانىستىرۋ – ازاماتتاردى ادەيى جاڭىلىستىرۋ ارەكەتى», دەپ تۇيىندەدى دەنساۋلىق ساقتاۋ مينيسترلىگى.
مينيسترلىك پابليك ادمينيستراتورلارى مەن اقپاراتتىق رەسۋرس يەلەرىن جاريالانىم الدىندا دەرەككوزدەردى مۇقيات تەكسەرۋگە شاقىردى. سونداي-اق ەل ازاماتتارىنىڭ شىنايى اقپارات الۋ قۇقىعىن قۇرمەتتەپ, مەملەكەتتىك, الەۋمەتتىك جانە مەديتسينالىق قىزمەتكەرلەردى ادەيى قارالايتىن ماتەريالداردى تاراتپاۋ قاجەتتىگىن ەسكەرتتى.
