جاۋھار ونەر شەبەرلەرى سۇلۋلىق پەن سەزىمنىڭ بيىك ۇلگىسىن پاش ەتتى. تالعامى بيىك كورەرمەن American Ballet Theatre (نيۋ-يورك) ترۋپپاسىنىڭ پريما-بالەريناسى حلويا ميسسەلداين مەن Staatsballett Berlin ترۋپپاسىنىڭ پرەمەرى مارتين تەن كورتەنااردىڭ ونەرىنە ءتانتى بولدى.
قويىلىمعا دەيىن جۋرناليستەردىڭ قاتىسۋىمەن وتكەن ءباسپاسوز ماجىلىسىندە شەتەلدىك مەيماندار ءوز اسەرلەرىمەن ءبولىسىپ, Berlin Ballet Company كوركەمدىك جەتەكشىسى ارشاك گالۋميان قازاق جەرىندە ونەر كورسەتۋ بالەت شەبەرلەرىنە ايرىقشا شابىت بەرەتىنىن ءارى جاڭا مۇمكىندىكتەرگە جول اشاتىنىن اتاپ ءوتتى. جوبا پروديۋسەرى دانيار شمانوۆ فەستيۆال اۋقىمى جىل سايىن كەڭەيىپ كەلە جاتقانىن, ونەر مەن مادەنيەتتىڭ ءورىسىن كەڭەيتۋ جوبانىڭ نەگىزگى ماقساتى ەكەنىنە توقتالدى.
«Freedom Festival — ونەردى, وزىندىك بولمىستى جانە بالەتكە دەگەن باتىل كوزقاراستى بىرىكتىرەتىن داستۇرگە اينالدى. بيىل ءبىز كلاسسيكا مەن زاماناۋي حورەوگرافيانى, قازاقستاندىق ونەرپازدار مەن شەتەلدىك ترۋپپالاردى توعىستىرا وتىرىپ, ۇيرەنشىكتى شەكارالاردى كەڭەيتەمىز. مۇنداي ۇندەستىك — فەستيۆالدىڭ نەگىزى – ونەردىڭ ءتىرى تىنىسىن, ديالوگقا, شابىت پەن بىرىگۋگە دەگەن ۇمتىلىسىمىزدى كورسەتەدى», – دەيدى Freedom Finance Global ديرەكتورلار كەڭەسىنىڭ توراعاسى سەرگەي لۋكيانوۆ.
ءداستۇر بويىنشا فەستيۆال اياسىندا زاماناۋي ونەر كورمەسى ۇسىنىلدى. بيىلعى فەستيۆالدىڭ ارنايى قوناعى – حالىقارالىق ارت-ساحنالاردا قازاقستان مەن وزبەكستان اتىنان شىعىپ جۇرگەن تانىمال سۋرەتشى ازيزا شادەن. ول وزبەكستان مادەنيەت پەن ونەردى دامىتۋ قورىنىڭ قولداۋىمەن جاسالعان, العاش رەت بۇحارا بيەننالەسىندە كورسەتىلگەن بەينەينستاللياتسياسىن ۇسىندى. بۇل جۇمىس قازاق كورەرمەنىنە العاش رەت جول تارتىپ وتىر.
