ءاليا رۇستەموۆا 1970 جىلى الماتى وبلىسىندا دۇنيەگە كەلگەن. الماتى مەملەكەتتىك مەديتسينا ۋنيۆەرسيتەتىن, ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىن تامامداعان.
ەڭبەك جولىن 1992 جىلى تالعار اۋداندىق اۋرۋحاناسىندا تەراپەۆت-دارىگەر بولىپ باستاعان. الماتىداعى №7 ەمحانادا, №5 قالالىق كلينيكالىق اۋرۋحانادا تەراپەۆت بولىپ جۇمىس ىستەگەن, سونداي-اق قالاداعى مەديتسينالىق عىلىمي ۇيىمداردا ورديناتۋرا مەن اسپيرانتۋرادان وتكەن.
2000 جىلدان باستاپ تالعارداعى مەديتسينالىق مەكەمەلەردە باس دارىگەردىڭ ورىنباسارى, الماتى وبلىسى دەنساۋلىق ساقتاۋ باسقارماسىنىڭ باس مامانى, مەديتسينالىق قىزمەت كورسەتۋ سالاسىن باقىلاۋ كوميتەتىنىڭ الماتى وبلىسىنداعى اۋماقتىق بولىمشەلەرىندە باسشىلىق لاۋازىمداردى اتقارعان.
كەيىن قىزىلوردا وبلىسى بويىنشا مەديتسينالىق قىزمەتتەردى تولەۋ كوميتەتى دەپارتامەنتىنىڭ ديرەكتورى, الماتى قالاسى دەنساۋلىق ساقتاۋ باسقارماسى باسشىسىنىڭ ورىنباسارى, الماتى قالاسى بويىنشا مەديتسينالىق جانە فارماتسەۆتيكالىق قىزمەتتى باقىلاۋ كوميتەتى دەپارتامەنتىنىڭ ديرەكتورى, استاناداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىندا يننوۆاتسيالىق دامۋ ءبولىمىنىڭ مەڭگەرۋشىسى, عىلىمي حاتشى قىزمەتتەرىن اتقارعان.
2015-2022 جىلدارى سولتۇستىك قازاقستان وبلىسىندا مەديتسينالىق قىزمەتتى باقىلاۋ جانە قوعامدىق دەنساۋلىقتى قورعاۋ سالاسىنداعى دەپارتامەنتتەردىڭ باسشىسى, باسشىسىنىڭ ورىنباسارى, استاناداعى ەڭبەك, الەۋمەتتىك قورعاۋ جانە كوشى-قون كوميتەتى دەپارتامەنتى باسشىسىنىڭ ورىنباسارى, سونداي-اق ەلوردا قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى بولعان.
2023 جىلدىڭ قىركۇيەگىنەن بەرى استانانىڭ قوعامدىق دەنساۋلىق ساقتاۋ باسقارماسىنىڭ باسشىسى قىزمەتىن اتقاردى.
