جۇرت كۇتكەن جاۋاپتى ۇدەدەن شىعىپ جۇرگەن ماماننىڭ ءبىرى – قوستانايداعى «وزات» مەكتەپ-ليتسەي-ينتەرناتى ديرەكتورىنىڭ ورىنباسارى, 2023 جىلدىڭ ۇزدىك مۇعالىمى جاحانگير گاپپاروۆ. جاحانگير ۇستازدىق ءوزىنىڭ بالا كەزىنەن ارمانداعان, ءاۋ باستان جان قالاۋىمەن تاڭداپ العان ماماندىعى ەكەنىن ايتادى. بۇگىندە 7-11 قازاق سىنىپتارىنا فيزيكا پانىنەن ساباق بەرىپ جۇرگەن جاڭاشىل مۇعالىمنىڭ اۆتورلىق ادىستەمەلەرى دە بارشىلىق.
«ساباق بارىسىندا ويىن ەلەمەنتتەرىن پايدالانامىن. بۇل – بالاعا ساباق مازمۇنىن جەڭىل ءارى ۇعىنىقتى تۇسىندىرۋگە ۇتىمدى ءادىستىڭ ءبىرى. ماسەلەن, كادىمگى قاعاز ۇشاقتى جاساپ, مودەلدەۋ جانە ۇشىرۋ ارقىلى بالالارعا جىلدامدىق, جول سياقتى فيزيكالىق شامالاردى ناقتى تاجىريبە جانە ويىن ەلەمەنتىن ساباقتاستىرا وتىرىپ تۇسىندىرگەن ءتيىمدى. ساباق بارىسىندا ودان بولەك اۆتورلىق جۇمىسىمدى قولدانامىن. كۇندەلىكتى ومىرمەن بايلانىستىرىلىپ جاسالعان ەسەپتەر جيناعىم بار. بالالاردىڭ قىزىعۋشىلىعىن ارتتىرۋ ءۇشىن فيزيكا ءپانىن ءتۇرلى كوميكستەر ارقىلى وقىتىپ ءجۇرمىن. مۇعالىم ادام ۇنەمى ىزدەنىس ۇستىندە جۇرەدى. ىزدەنبەگەن مۇعالىم ساپالى ءبىلىم بەرە المايدى, جاقسى شاكىرت تاربيەلەپ شىعارا المايدى», دەيدى بىلىكتى ۇستاز.
جاحانگير ابدىرازاق ۇلى پەداگوگيكالىق قىزمەتپەن قاتار, جاس مۇعالىمدەردى دايارلاۋ ىسىنە دە بەلسەندى اتسالىسادى. جاس ماماندارعا كۇندەلىكتى ساباقتا پايدالاناتىن وقۋ ادىستەمەلەرىن ۇيرەتىپ, باي تاجىريبەسىمەن بولىسۋدەن جالىققان ەمەس.
«الەمدە سان ءتۇرلى ماماندىق بار. بىراق ۇستازدىق – ولاردىڭ ىشىندە ەڭ جاۋاپتى ءارى قادىرلىسى. سەبەبى مۇعالىم – جاس ۇرپاققا باعىت-باعدار بەرەتىن, ولاردىڭ بولاشاعىنا ىقپال ەتەتىن تۇلعا. وسى جاۋاپكەرشىلىكتى سەزىنە وتىرىپ, ءوز ءومىرىمدى ۇستازدىققا ارنادىم. ساباق بارىسىندا ۇنەمى زاماناۋي ءادىس-تاسىلدەر مەن ءداستۇرلى وقىتۋدىڭ ماردىمدى ادىستەرىن ساباقتاستىرامىن. زاماناۋي ءادىس-تاسىلدەر بالانىڭ جان-جاقتى قالىپتاسۋىنا, جاڭا تەحنولوگيانىڭ ءتىلىن جەتىك مەڭگەرىپ, ونى ەركىن قولدانا بىلۋىنە كومەكتەسەدى. كوبىنە, قازىرگى زامان تالابىنا ساي وقۋشىنى ويلاندىراتىن, ىزدەندىرەتىن ادىستەردى قولدانۋعا تىرىسامىن. ينتەراكتيۆتى تەحنولوگيالاردى, عىلىمي-زەرتتەۋ ەلەمەنتتەرىن دە ءجيى پايدالانامىن. اسىرەسە جوبالىق جۇمىس ارقىلى وقۋشىلاردىڭ شىعارماشىلىعىن دامىتۋعا ەرەكشە كوڭىل ءبولىپ وتىرۋ قاجەت. ءاربىر ساباقتا وقۋشىنىڭ وزىندىك ويىن ايتۋىنا, دەربەس شەشىم قابىلداۋىنا جاعداي جاساۋ – مۇعالىمگە باستى قاعيدا بولعانى ابزال», دەيدى جاحانگير.
جاس تا بولسا, ءبىلىم بەرۋ سالاسىنداعى ءبىراز بيىكتى باعىندىرعان جاحانگير ۇستازدىڭ حالىقارالىق, رەسپۋبليكالىق, وبلىستىق عىلىمي جوبالار كونكۋرستارىندا جوعارعى جەتىستىككە جەتىپ جۇرگەن, پاندىك وليمپيادالاردا جۇلدەگە ىلىككەن, ءتۇرلى باعىتتاعى عىلىمي جوبالارعا قاتىسىپ, ۇزدىك ناتيجەلەرگە قول جەتكىزىپ جۇرگەن دارىندى شاكىرتتەرى بارشىلىق. مۇنداي جوعارعى كورسەتكىش – ۇستاز بەن شاكىرت اراسىنداعى بىرلەسكەن ىزدەنىستىڭ جەمىسى ەكەنى انىق. جاحانگيردىڭ تالاپتى شاكىرتتەرىنىڭ قاتارىندا فيزيكا ءپانى بويىنشا كوپتەگەن حالىقارالىق عىلىمي بايقاۋدىڭ جەڭىمپازى قايرات شاياحمەت, وبلىستىق عىلىمي جوبالار كونكۋرسىنىڭ بىرنەشە دۇركىن جەڭىمپازى تيمۋر ءجۇسىپوۆ سىندى دارىندى وقۋشىلار بار.
«قازىر 9-سىنىپتا وقيمىن. ۇستازىم جاحانگير ابدىرازاق ۇلىنىڭ جەتەكشىلىگىمەن حالىقارالىق بايقاۋعا دايىندالىپ جاتىرمىن. فيزيكا – وتە قىزىق عىلىم. مەنىڭ ويىمشا, بۇل – ءالى اشىلماعان جاڭالىعى كوپ عىلىم», دەيدى تيمۋر ءجۇسىپوۆ.
«ۇستازى جاقسىنىڭ ۇستانىمى جاقسى», مۇعالىمى دۇرىس ساباق بەرمەسە, تىڭداۋشىسىن ءوز پانىنە قىزىقتىرا الماسا, شاكىرتىنىڭ جۇرەگىنە ءبىلىم شامىن جاعىپ, وعان ۇلگى-ونەگە كورسەتە الماسا, تيمۋر دا فيزيكاعا مۇنشاما ىنتىق بولماس پا ەدى دەگەن ويعا قالدىق.
جاحانگيردىڭ ءوزى دە جىل سايىن كوپتەگەن پەداگوگيكالىق كونكۋرستان قالماي, جەڭىس تۇعىرىنان ءجيى كورىنىپ ءجۇر. سوندىقتان وبلىستىق ءبىلىم باسقارماسىنىڭ قولقا سالۋىمەن مۇعالىمدەرگە ارنالعان ءتۇرلى بىلىكتىلىك ارتتىرۋ كۋرستارىندا ترەنەرلىك قىزمەتتى قوسا اتقارادى.
«ەڭ باستى ماقساتىم – ەلىمىزدىڭ ءبىلىمدى, باسەكەگە قابىلەتتى جاستارىن تاربيەلەۋ. شاكىرتتەرىمنىڭ جەتىستىگى – ەڭ ۇلكەن تابىسىم. سوندىقتان الداعى ۋاقىتتا دا جاڭا ءارى ءتيىمدى ادىستەردى قولدانىپ, تاجىريبەمدى دامىتىپ, جاس بۋىنعا ساپالى ءبىلىم بەرۋگە بار كۇش-جىگەرىمدى جۇمساي بەرەمىن», دەيدى مارتەبەلى مۇعالىم.
قوستاناي وبلىسى
