فوتو: istockphoto.com
باستى جاڭالىقتاردىڭ ءبىرى – تىكەلەي وندىرۋشىدەن ساتىپ الۋ كولەمىنىڭ ارتۋى. الداعى جىلى 400-دەن استام ءدارى-دارمەك دەلدالداردىڭ قاتىسۋىنسىز, تىكەلەي زاۋىتتاردان الىنادى. بۇل كورسەتكىش وتكەن جىلمەن سالىستىرعاندا 2,7 ەسە ارتىق.
مۇنداي ءوسىم دەنساۋلىق ساقتاۋ ءمينيسترىنىڭ №110 بۇيرىعىمەن ەنگىزىلگەن جاڭا ساتىپ الۋ ەرەجەلەرىنىڭ ارقاسىندا مۇمكىن بولدى. ەندى وندىرۋشىلەردەن تىكەلەي باعا ۇسىنىستارىن سۇراۋعا باسىمدىق بەرىلەدى. بۇل باعانى تومەندەتۋگە, ساتىپ الۋ پروتسەسىنىڭ اشىقتىعىن ارتتىرۋعا جانە قۇنىن قالىپتاستىرۋدى باقىلاۋدى كۇشەيتۋگە باعىتتالعان.
«ساتىپ الۋ بۇرىنعىداي حالىقارالىق ۇيىمدار – بۇۇدب, يۋنيسەف جانە ستوپ تب ارقىلى جۇزەگە اسىرىلادى. حالىقارالىق ينستيتۋتتار ارقىلى ساتىپ الىناتىن پوزيتسيالاردىڭ سانى 87%-عا (23-تەن 43-كە دەيىن) ۇلعايدى. مۇنداي مەحانيزم باسەكەگە قابىلەتتى الەمدىك باعالار ەسەبىنەن ايتارلىقتاي ۇنەمدەۋدى قامتاماسىز ەتەدى, ال بوساتىلعان قاراجات پاتسيەنتتەردى قوسىمشا ءدارى-دارمەكپەن قامتاماسىز ەتۋگە باعىتتالادى», دەلىنگەن حابارلامادا.
ساتىپ الىنعان ونىمدەر بىرىڭعاي ديستريبيۋتور قويمالارىنا وسى جىلدىڭ جەلتوقسانىندا, ال ەمحانالار مەن اۋرۋحانالارعا 2026 جىلدىڭ قاڭتارىندا جەتكىزىلە باستايدى.
مەديتسينالىق ۇيىمدارعا قانداي ءدارى قاجەت ەكەنىن اتاۋى, دوزاسى جانە جەتكىزۋ مەرزىمدەرى بويىنشا وتىنىمدەر انىقتايدى. مەملەكەتتىك قاراجاتتى ءتيىمدى پايدالانۋ ءۇشىن تىكەلەي ساتىپ الۋعا باسىمدىق بەرىلەدى.
«2024 جىلى ساتىپ الۋ ەرەجەلەرىنە جاڭا تەتىك – باعا ۇسىنىستارىن سۇراتۋدى بەكىتەتىن وزگەرىستەر ەنگىزىلدى. وسىنىڭ ارقاسىندا وندىرۋشىلەر تىكەلەي ساتىپ الاتىن پرەپاراتتاردىڭ سانى 2025 جىلعى ناۋقانمەن سالىستىرعاندا 5 ەسەدەن استام ءوستى», دەپ حابارلادى مينيسترلىكتىڭ ءباسپاسوز قىزمەتى.
اشىقتىقتى ساقتاۋ ءۇشىن بارلىق ساتىپ الۋ حابارلامالارى «سك-فارماتسيا» سايتىندا جاريالانادى. سونداي-اق, جەتكىزۋشىلەرمەن بەلسەندى كەلىسسوزدەر جۇرگىزىلىپ, باعا تالداۋى جاسالادى. 2025 جىلعى ساتىپ الۋ ناتيجەسىندە مەملەكەت 70 ملرد تەڭگەدەن استام قاراجات ۇنەمدەگەن.
حالىقتى دارىمەن ۇزدىكسىز قامتۋ ءۇشىن 2027 جىلعا ارنالعان ساتىپ الۋ جۇمىستارى 2026 جىلدىڭ مامىرىندا باستالماق.
