اتاپ ايتساق, «RG BRANDS Kazakhstan», «Coca-Cola Almaty Bottlers», «Hamle Company LTD», «Asia Agro Food», «Efes Kazakhstan», «Kagazy Recycling», «Kelun – Kazpharm» سياقتى كاسىپورىندار بار. اۋداندا جاڭا ينۆەستورلاردى تارتۋ باعىتىندا جۇيەلى جۇمىستار جۇرگىزىلىپ جاتىر.
بيىلعى قاڭتار-قىركۇيەك ايلارىندا نەگىزگى كاپيتالعا تارتىلعان ينۆەستيتسيانىڭ 85 پايىزى جەكەمەنشىك ينۆەستيتسيالار ەسەبىنەن جۇزەگە اسىرىلدى. بۇل – اۋداننىڭ ينۆەستيتسيالىق تارتىمدىلىعى جوعارى, بيزنەس جۇرگىزۋ ءۇشىن قولايلى ءوڭىر ەكەنىن كورسەتەدى. اتالعان كەزەڭدە 10-عا جۋىق ءىرى جوبالار ىسكە قوسىلىپ, شامامەن 2300 جاڭا جۇمىس ورنى اشىلدى. كوكوزەك اۋىلىندا وڭتۇستىك كورەيالىق «KT&G» كومپانياسىنىڭ زاۋىتى ىسكە قوسىلىپ, 140 جۇمىس ورنى قۇرىلدى. يساەۆ اۋىلىندا «فوكۋس لوگيستيك» كەشەنىنىڭ 1-ءشى جانە 2-كەزەڭدەرى ىسكە قوسىلىپ, جالپى 1500 ادام جۇمىسپەن قامتىلدى. كەشەن تولىق قۋاتىمەن جۇمىس ىستەگەن جاعدايدا, 4,5 مىڭ جاڭا جۇمىس ورنى قۇرىلادى. اۋداننىڭ بيۋدجەتىنە جىل سايىن 5 ملرد تەڭگەدەن استام سالىق تۇسۋگە ءتيىس. بۇدان بولەك, جۋىردا «Apple Logistics» كەشەنىنىڭ ءبىرىنشى كەزەڭى اياقتالىپ, 148 ادام تۇراقتى جۇمىسقا ورنالاستى. سونداي-اق «Neo Milk» كومپانياسى ەشكى, بيە, تۇيە ءسۇتىن قۇرعاتىپ وندىرەتىن زاۋىتتىڭ قۇرىلىسىن اياقتاپ, 50 ادامدى جۇمىسپەن قامتىدى.
«Raw Production Ltd» قۇس ەتىن قايتا وڭدەۋ زاۋىتى ىسكە قوسىلىپ, 100 ادام تۇراقتى جۇمىسقا ورنالاستىرىلدى. بۇعان قوسا «بورالداي كونتەينەر تەرمينالى» قۇرىلىسى تولىقتاي اياقتالىپ, 70 جۇمىس ورنى اشىلدى.
«پرەزيدەنت قاسىم-جومارت توقاەۆ «ينۆەستيتسيا تارتۋ – ورتالىق اتقارۋشى ورگانداردىڭ عانا مىندەتى ەمەس, جەرگىلىكتى بيلىك پەن اكىمدەردىڭ دە جاۋاپكەرشىلىگى», دەپ اتاپ وتكەن ەدى. وسى تالاپ ۇدەسىنەن شىعىپ, اۋدانىمىزدا ينۆەستيتسيالىق احۋالدى جاقسارتۋ ءۇشىن ناقتى شارالار قابىلدانىپ, جاڭا جوبالاردى ىسكە اسىرۋ جۇمىستارى بەلسەندى تۇردە جۇرگىزىلىپ جاتىر. بيىل جالپى قۇنى 100 ملرد تەڭگەدەن اساتىن 20-عا جۋىق جاڭا ءىرى ينۆەستيتسيالىق جوبا ىسكە اسىرىلۋدا», دەيدى قاراساي اۋدانىنىڭ اكىمى جاسۇلان ەستەنوۆ.
نەگىزگى جوبالار قاتارىندا «MP Solutions» لوگيستيكالىق كەشەنىنىڭ قۇرىلىسى (14 ملرد تەڭگە), «Jiang nan Kazakhstan» كومپانياسى ونەركاسىپتىك لوگيستيكالىق ايماق (10 ملرد تەڭگە), «العا ماكس» پوليستيرولبەتون پليتالارىن وندىرەتىن زاۋىتى (5 ملرد تەڭگە), «Atek group» اۆتوكلاۆتى كىرپىش زاۋىتىنىڭ قۇرىلىس جوبالارى (1,2 ملرد تەڭگە) بار.
ودان بولەك, «Casرian Beverage Holding» الكوگولسىز سۋسىندار شىعاراتىن جاڭا زاۋىت سالۋ ءۇشىن دايىندىق جۇمىستارىن جۇرگىزىپ جاتىر. جوباعا 15,8 ملرد تەڭگە ينۆەستيتسيا تارتىلادى. بۇل باستامالار اۋداننىڭ ينۆەستيتسيالىق تارتىمدىلىعىن ارتتىرىپ, جاڭا ءوندىرىس ورىندارىن اشۋعا جانە جۇمىسسىزدىقتى ازايتۋعا ايتارلىقتاي سەرپىن بەرمەك.
بيىل تامىز ايىنان ىسكە قوسىلعان «Burunday container terminal» (بورالداي كونتەينەر تەرمينالى) جشس وپەراتسيالىق ديرەكتورى اسقار ءجۇمادىلوۆتىڭ ايتۋىنشا, كوپسالالى كونتەينەرلىك تەرمينالعا الىس-جاقىن شەتەلدەن تاۋلىگىنە 100-120 كونتەينەر كەلىپ, ونى ۋاقتىلى قابىلداپ, جۇكتەردى ءتۇسىرىپ, ساقتاپ, سۇرىپتاۋعا مۇمكىندىك جاسالعان. جۇكتىڭ نەگىزگى بولىگىن – شەتەلدەن تاسىمالداناتىن اۆتوكولىكتەر قۇرايدى. مۋلتيمەديالىق تەرمينالدىڭ باستى ايىرماشىلىعى – تۇتىنۋشىعا «جەكە كابينەت» اشىلىپ, سول ارقىلى 24 ساعات ءوز جۇگىن باقىلاي الاتىنىندا.
جالپى اۋماعى 16,5 شارشى مەترگە ورنالاسقان كونتەينەرلىك الاڭ حالىقارالىق ستاندارتتارعا ساي جابدىقتالعان ءارى تولىقتاي اۆتوماتتاندىرىلعان. ماماندار بۇل نىسان – الماتى اگلومەراتسياسى مەن باسقا ايماقتار ءۇشىن حالىقارالىق جانە ىشكى جۇك تاسىمالىن وڭتايلاندىراتىنىن ايتادى. سونداي-اق لوگيستيكالىق كومپانيالار مەن وندىرۋشىلەرگە قويمالاۋ, كەدەندىك جانە ەكسپەديتورلىق قىزمەتتەردى ءبىر جەردەن الۋىنا مۇمكىندىك بەرەدى. تەرمينالدا بۇگىندە 40 ادام ەڭبەكپەن قامتىلعان. تولىق قۋاتتىلىعى جۇزەگە اسقاندا جۇمىسشىلار سانىن 150 ادامعا جەتكىزۋ جوسپارلانعان.
جارمۇحانبەت اۋىلىندا ورنالاسقان «Almaty Turmystyq Tehnika Zavody» (الماتى تۇرمىستىق تەحنيكالىق زاۋىتى) جشس زاماناۋي تۇرمىستىق تەحنيكا وندىرۋمەن اينالىسىپ كەلەدى. 2021 جىلى ىسكە قوسىلعان كاسىپورىننىڭ ونىمدەرى «Dauscher» ساۋدا ماركاسىمەن تانىمال.
جوبانىڭ ماقساتى – ىشكى نارىقتىڭ قاجەتتىلىكتەرىن وتەۋگە جانە يمپورتقا تاۋەلدىلىكتى ايتارلىقتاي تومەندەتۋگە قابىلەتتى تۇرمىستىق تەحنيكانىڭ تولىققاندى, تاۋەلسىز ءوندىرىسىن قۇرۋ. بۇگىندە كاسىپورىن گاز بەن ەلەكتر پليتالارىن, پەشتەردى, شاعىن پەشتەردى شىعارادى. الداعى ۋاقىتتا توڭازىتقىشتار, مۇزداتقىشتار مەن تەلەديدارلار شىعارۋ جوسپارلانسا, بۇگىننىڭ وزىندە العاشقى تاپسىرىستار قابىلدانىپ, تۇتىنۋشىلار تىلەگىن قاناعاتتاندىرعان.
زاۋىتتىڭ وندىرىستىك قۋاتى كەزەڭ-كەزەڭىمەن جۇزەگە اسىرىلىپ جاتىر. جىل سايىن جاڭا جوعارى تەحنولوگيالىق تسەحتار, ونىڭ ىشىندە مەتالل وڭدەۋ, اۆتوماتتاندىرىلعان سىرلاۋ, ەمالداۋ تسەحتارى, سونداي-اق پوليستيرول كوبىك قاپتاماسىن ءوندىرۋ ۋچاسكەسى پايدالانۋعا بەرىلەدى. كاسىپورىننىڭ قۋاتتىلىعى جىلىنا 200 مىڭ بىرلىككە دەيىن ءونىم شىعارۋدى, 200-دەن استام جۇمىس ورنىن اشۋدى كوزدەيدى.
بۇگىندە «Almaty Turmystyq Tehnika Zavody» جشس ونىمدەرى Technodom, Sulpak, Mechta, Fora سىندى ەلىمىزدىڭ ءىرى ساۋدا جەلىلەرىندە ۇسىنىلعان. سونداي-اق بەس فيرما ساۋدا نۇكتەلەرىنىڭ جەلىسى جۇمىس ىستەيدى.
«اتتز» جشس ديرەكتورى ارسەن كۇشتاەۆ كاسىپورىندى كەڭەيتە وتىرىپ, وتاندىق تۇتىنۋشىلاردىڭ ساپالى دا سەنىمدى ءارى باسەكەگە قابىلەتتى تۇرمىستىق تەحنيكاعا قول جەتكىزۋىن قامتاماسىز ەتۋ – باستى ماقسات ەكەنىن ايتتى.
قۋاتى تولىق ىسكە قوسىلعاندا تاۋلىگىنە 200 مىڭ تۇرمىستىق تەحنيكا تۇرلەرىن شىعارۋدى دىتتەگەن زاۋىتتا بيىل 65 مىڭ تەحنيكا شىعارسا, كەلەر جىلى ءونىمدى ەسەلەپ, 130 مىڭعا جەتكىزۋ جوسپارلانعان. ءار شاڭىراقتىڭ تۇرمىسىن جەڭىلدەتۋگە سەپتىگىن تيگىزەر تەحنيكالاردى جاساۋدا ەۋروپانىڭ تانىمال كومپانيالارىنان بولشەكتەر ساتىپ الىناتىندىعىن العا تارتتى.
ء«بىز وندىرگەن تەحنيكانىڭ 50 پايىزى رەسەي, قىرعىزستان مەن وزبەكستانعا ەكسپورتقا جونەلتىلەدى. «قازاقستاندا جاسالعان» دەگەن برەندتى تۇتىنۋشىلار جىلى قابىلداپ جاتىر. وندىرىستە ەل بويىنشا 2-ورىندامىز. باستى قاعيدامىز – ادام اعزاسىنا زيانسىز جوعارى ساپادا ءارى قولجەتىمدى بولۋ. وسى سەبەپتى, كەي بولشەكتەر شەتەلدەن الىنادى. مىسالى, پەشكە كەرەك اينەكتى گەرمانيادان, ەلەكتورنيكانى يسپانيادان, وتتىقتارىن يتاليادان, ەمالدىڭ بوياۋلارىن رەسەيدەن, ال مەتالل ونىمدەرى وزىمىزدە وندىرىلەدى», دەيدى زاۋىت ديرەكتورى ارسەن كۇشتاەۆ. بۇل كۇندە 100 شاقتى ادام ەڭبەك ەتەتىن زاۋىتتىڭ ينۆەستيتسيا كولەمى 7,5 ملن دوللار. بىلتىر 2,5 ملن دوللار سالىنىپ, جاڭا تسەحتار ىسكە قوسىلدى.
الماتى وبلىسى
