پيلوتسىز ۇشۋ اپپاراتتارى جولداعى ءتارتىپتى باقىلاۋدىڭ ءتيىمدى قۇرالىنا اينالدى. كامەراسى بار دروندار ەرەجەنىڭ بۇزىلۋىن سول ساتتە تىركەپ, كۇردەلى جول ۋچاسكەلەرىن جوعارىدان باقىلايدى. جينالعان دەرەكتەر جىلدام پوليتسياعا جەتكىزىلەدى.
20 شاقىرىمعا دەيىنگى ۇشۋ قاشىقتىعى ماگيسترالداردى دا, قولجەتىمسىز اۋماقتاردى دا تولىق پاترۋلدەۋگە مۇمكىندىك بەرەدى. وسىنداي قاداعالاۋ ناتيجەسىندە التى مىڭنان استام زاڭبۇزۋشىلىق انىقتالدى. اۋەدەن باقىلاۋ جول-كولىك وقيعالارىنىڭ الدىن الىپ, قاۋىپتى جاعدايعا دەر كەزىندە ارەكەت ەتۋگە جول اشادى.
كونتسەرتتەر, سپورتتىق ماتچتار جانە مەرەكەلىك ءىس-شارالار كەزىندە دروندار قوعامدىق ءتارتىپتى قامتاماسىز ەتەتىن نەگىزگى قۇرالعا اينالدى. كامەرالار حالىق كوپ جينالعان جەرلەردەگى جاعدايدى باقىلاپ, كۇماندى ارەكەتتەردى ەرتە انىقتايدى. پوليتسيا جاساقتارى قاجەتتى اۋماققا تەز جەتە الادى.
پيلوتسىز اپپاراتتار جەدەل قىزمەت كەزىندە دە ءجيى قولدانىلادى. ولار وقيعا ورنىن قاراۋعا, جوعالعان ادامداردى ىزدەۋگە, قىلمىس ىزدەرىن تۇسىرۋگە جانە جاعدايدى ناقتى ۋاقىت رەجيمىندە باقىلاۋعا كومەكتەسەدى. اەروفوتوتۇسىرىلىم مەن بەينەتىركەۋ دالەلدەردىڭ ساپاسىن ارتتىرىپ, تەرگەۋ جۇمىسىن جەدەلدەتەدى.
شىمكەنتتە وتكەن «قاراسورا» جانە «قۇقىقتىق ءتارتىپ» ءىس-شارالارى وسىنىڭ ايعاعى. درون ارقىلى سينتەتيكالىق ەسىرتكى ساتتى دەگەن كۇدىكپەن جۇرگەن 44 جاستاعى ايەلدىڭ قوزعالىسى باقىلانىپ, ول قىلمىس ۇستىندە ۇستالدى. كولىكتىڭ جۇكسالعىشىنان ەكى كەلىدەن استام ەسىرتكى تابىلدى.
پيلوتسىز اپپاراتتاردى پايدالانۋ – ىشكى ىستەر مينيسترلىگىنىڭ تسيفرلىق جاڭعىرتۋ باعدارلاماسىنىڭ ءبىر بولىگى. دروندار پوليتسيانىڭ كۇندەلىكتى جۇمىسىن جەڭىلدەتىپ, قوعامدىق ءتارتىپتى قورعاۋعا, جول قاۋىپسىزدىگىن ارتتىرۋعا جانە قىلمىستاردى تەز اشۋعا ناقتى كومەك كورسەتىپ وتىر.
