مامان ادامداردىڭ ءجيى ناۋقاستانۋىن ماۋسىممەن بايلانىستىردى.
– وتپەلى ماۋسىمدا ۆيرۋستىق ينفەكتسيا جيىلەيدى. قازاقستاندا تۇماۋ جىل سايىن قاراشا ايىنان باستالىپ, ءساۋىر ايىنىڭ ورتاسىنا دەيىن سوزىلادى. قازىر ماۋسىمدىق ا تۇماۋى تاراپ جاتىر دەگەنمەن, بيىل جەدەل رەسپيراتورلىق ۆيرۋستىق اۋرۋلار دەڭگەيى وتكەن جىلمەن سالىستىرعاندا ارتقان جوق, – دەدى اسەل قىدىراليەۆا.
الايدا كەيبىر وڭىرلەردەگى بالالار مەن ەرەسەكتەرگە ارنالعان ينفەكتسيالىق ستاتسيونارلاردا ناۋقاستار سانى ۋاقىتشا كوبەيىپ كەتۋى مۇمكىن.
– ءبىر مەزەتتە كوپ ادامنىڭ مەديتسينالىق كومەككە جۇگىنۋى – قالىپتى قۇبىلىس. ءىرى قالالاردا وسىنداي كورىنىس بايقالاتىنى راس. بيىل 1 ملن 279 مىڭعا جۋىق جەدەل رەسپيراتورلىق ۆيرۋس جاعدايى تىركەلگەن, ولاردىڭ جارتىسىنان كوبى 14 جاسقا دەيىنگى بالالار. وتكەن جىلمەن سالىستىرعاندا سىرقاتتانۋشىلىق 19%-عا تومەن, – دەدى مامان.
دسم وكىلىنىڭ ايتۋىنشا, ا تۇماۋى – جاڭا ۆيرۋس ەمەس, بۇرىننان بەلگىلى ماۋسىمدىق تۇماۋدىڭ ءبىر ءتۇرى. دەگەنمەن, ول حالىقتىڭ ءالسىز توپتارى ءۇشىن قاۋىپتى سانالادى.
– قاۋىپ توبىنا بالالار, جۇكتى ايەلدەر جانە قانت ديابەتى, جۇرەك-قان تامىرلارى, تىنىس الۋ جولدارىنىڭ اۋرۋلارى بار ادامدار كىرەدى. مۇنداي كەزدە پروفيلاكتيكا جۇرگىزۋ وتە ماڭىزدى, – دەدى مامان.
اسەل قىدىراليەۆانىڭ سوزىنشە, ۆيرۋستىڭ تارالۋى جىلدام جۇرەدى. بەلگىلەرى – جوعارى تەمپەراتۋرا, قۇرعاق جوتەل, السىزدىك پەن باس اۋرۋى. ولار تۇماۋ جۇقتىرعاننان كەيىن 1-2 كۇن ىشىندە ءبىلىنۋى مۇمكىن.
– باستى قورعانىس شارالارىنىڭ ءبىرى – ۆاكتسيناتسيا. ەلدە 2 ميلليوننان استام دوزا ءدارى ساتىپ الىنعان, كەز كەلگەن ادام ەكپە الا الادى, – دەدى مامان.
الايدا دسم وكىلى ەكپە اۋرۋدان قورعايتىن جالعىز امال ەمەس ەكەنىن ايتتى.
– بىرىنشىدەن, ۇيقى مەن دەمالىس ماڭىزدى. ۇيقىنىڭ جەتىسپەۋى جانە ۇنەمى شارشاپ ءجۇرۋ يممۋنيتەتتى السىرەتەدى, ەشقانداي دارۋمەن بۇل تاپشىلىقتى وتەي المايدى. ەكىنشىدەن, دۇرىس تاماقتانۋ قاجەت. اعزاعا جەتكىلىكتى مولشەردە اقۋىز ءتۇسۋى كەرەك. ۇشىنشىدەن, جىلى ءارى ىلعالدى ورتا ماڭىزدى. قۇرعاق اۋا تىنىس جولدارىنىڭ شىرىشتى قاباتىن قۇرعاتۋى مۇمكىن, ال ول سۋىق تيۋ مەن ۆيرۋستان قورعايتىن العاشقى قالقان. ءۇيدى ءجيى جەلدەتىپ, ءشوپ شايىن ءىشىپ ءجۇرۋ يممۋنيتەتتى كۇشەيتەدى, – دەدى مامان.
