گرانت يەگەرلەرىنىڭ ەڭ كوپ سانى تالعار اۋدانىندا تىركەلدى. سونداي-اق ىلە, ەڭبەكشىقازاق, قاراساي اۋداندارى مەن قوناەۆ قالاسى دا جوعارى ناتيجەلەر كورسەتكەن.
سالا ماماندارىنىڭ ايتۋىنشا, بيىل پەداگوگيكالىق باعىت ەڭ تانىمال ماماندىقتاردىڭ ءبىرى بولعان – 1 440 تۇلەك وسى سالانى تاڭداعان. ودان كەيىن 770 جاس مەديتسينالىق ماماندىقتارعا, 543-ءى اگرارلىق باعىتقا قۇجات تاپسىرعان. قالعان 4 928 تۇلەك ينجەنەريا, IT جانە الەۋمەتتىك-ەكونوميكالىق ماماندىقتاردى تاڭداعان.
ءوڭىر ءۇشىن بيىلعى ماڭىزدى جاڭالىقتاردىڭ ءبىرى – 27 تۇلەكتىڭ قىتاي حالىق رەسپۋبليكاسىنداعى سينتسزيان ۋنيۆەرسيتەتىنەن تەگىن ءبىلىم الۋعا گرانت يەلەنۋى. شەتەلگە اتتانعان جاستار تالعار, ىلە, ەڭبەكشىقازاق, قاراساي, جامبىل اۋداندارى مەن قوناەۆ, پەن الاتاۋ قالالارىنان. بۇل
– الماتى وبلىسى مەن قىتاي اراسىنداعى ىنتىماقتاستىق ناتيجەسىندە جۇزەگە اسىپ جاتقان حالىقارالىق ءبىلىم بەرۋ باعدارلاماسىنىڭ ءبىر بولىگى.
شەتەلدە ءبىلىم الىپ جۇرگەن ستۋدەنتتەردىڭ ءوزى بۇل مۇمكىندىكتى ۇلكەن قولداۋ دەپ باعالايدى.«الماتى وبلىسى اكىمدىگى بەرگەن گرانتتىڭ ارقاسىندا قىتايدا وقۋعا مۇمكىندىك الدىم. بۇل – ساپالى ءبىلىم الىپ, ەلگە كەلىپ ءوزىم تاڭداعان ماماندىق بويىنشا قىزمەت ەتۋگە اشىلعان جول», – دەيدى سينتسزيان ۋنيۆەرسيتەتىنىڭ ستۋدەنتى ءنۇرالي قىدىرحان.
سينتسزيان مەديتسينالىق ۋنيۆەرسيتەتىندە وقىپ جۇرگەن قاراقات تۇرعىنباي دا جاعدايدىڭ جاقسى ەكەنىن ايتادى.
«بولمەدە ەكى ستۋدەنت تۇرامىز, وقۋ بازاسى وتە مىقتى. ءتۇرلى ەلدەن كەلگەن جاستارمەن تانىسىپ, تاجىريبە الماسىپ ءجۇرمىز. بۇل بولاشاقتا بىلىكتى مامان بولۋعا ۇلكەن ىقپال ەتەدى», – دەيدى ول.
سينتسزيان قارجى جانە ەكونوميكا ۋنيۆەرسيتەتىنىڭ ستۋدەنتى اياۋلىم ارىستانبەكوۆا حالىقارالىق ءبىلىم بەرۋدىڭ جاڭا مۇمكىندىكتەر اشاتىنىن اتاپ ءوتتى.
«الەمدىك دەڭگەيدەگى ۋنيۆەرسيتەتتە وقۋ – ۇلكەن مارتەبە. الماتى وبلىسى مەن قىتاي اراسىنداعى كەلىسىمدەردىڭ ناتيجەسىندە كوپتەگەن ستۋدەنت تەگىن وقىپ جاتىر. بۇل بىلىممەن ەلگە ورالىپ, وتانعا قىزمەت ەتۋگە نيەتتىمىز», – دەيدى ول.
سونىمەن قاتار, وبلىس اكىمىنىڭ جەرگىلىكتى بيۋدجەت ەسەبىنەن بولىنگەن 30 گرانتى دا بيىل تالاپكەرلەرگە قولجەتىمدى بولدى. ونىڭ 17-ءسى مەديتسينا سالاسىنا (ونىڭ ىشىندە 12 – ينتەرناتۋرا), 7 گرانت اگرارلىق باعىتقا, 6 گرانت پەداگوگيكالىق ماماندىقتارعا بەرىلگەن.
ءوڭىر بيلىگىنىڭ ايتۋىنشا, بۇل گرانتتار الماتى وبلىسىنىڭ كادرلىق الەۋەتىن ارتتىرۋعا, اۋىلدىق وڭىرلەرگە بىلىكتى ۇستازدار مەن دارىگەرلەردى تارتۋعا جانە جاستاردىڭ جوعارى بىلىمگە قولجەتىمدىلىگىن كەڭەيتۋگە باعىتتالعان.
الماتى وبلىسى.
