قويىلىم الىشەر ناۋاي اتىنداعى مەملەكەتتىك اكادەميالىق ۇلكەن تەاتر ساحناسىندا العاش رەت كورسەتىلدى. پرەمەرانى مادەنيەت جانە اقپارات ءمينيسترى ايدا بالاەۆا تاماشالادى. سونداي-اق قۇرمەتتى قوناقتار رەتىندە ورتالىق ازيا ەلدەرى مادەنيەت مينيسترلىكتەرىنىڭ باسشىلارى مەن ازەربايجاننىڭ مادەنيەت ءمينيسترى شاقىرىلدى.
حاميت شاڭعاليەۆتىڭ مۋزىكاسى رەجيسسەر داۆيدە ليۆەرمورەنىڭ كوركەمدىك شەشىمىمەن ۇيلەسە وتىرىپ, كورەرمەندى التىن وردا داۋىرىنە جەتەلەيتىن اسەرلى اتموسفەرا جاساي الدى. كورەرمەن التىن وردا تاريحىنداعى وقيعالار اياسىندا ءوربيتىن تراگەديالاردى كوزبەن كورىپ, سول كەزەڭنىڭ رۋحىن تەرەڭ سەزىنە الادى. التىن وردا – تۇركى حالىقتارى تاريحىندا ەرەكشە ورنى بار رۋحاني مۇرانىڭ قاينار كوزى.
وپەرانى ساحنالاۋ جۇمىسى حالىقارالىق عىلىمي ىنتىماقتاستىقتىڭ ۇلگىسىنە اينالدى. جوباعا قازاقستان, رەسەي,تۇركيا عالىمدارى اتسالىستى. التىن وردانى زەرتتەۋ ورتالىعىنىڭ جەتەكشىسى يلنۋر ميرگاليەۆ, ىستانبۇلداعى مارمارا ۋنيۆەرسيتەتىنىڭ پروفەسسورى يلياس كەمالوعلۋ جانە تاريح عىلىمدارىنىڭ كانديداتى نۇرلان اتىعاەۆ, مارالتاي ىبىراەۆ جازعان وپەرا ليبرەتتوسى دراماتۋرگ الماس ءنۇسىپتىڭ پەساسى نەگىزىندە ازىرلەنگەن.
ال رەجيسسەرى داۆيدە ليۆەرمورە – الەمدىك وپەرا ونەرىندەگى مايتالمان اتى اڭىزعا اينالعان انشىلەرمەن جانە الەمنىڭ جەتەكشى تەاترلارىمەن جۇمىس ىستەگەن تۇلعا. ونىڭ قويىلىمدارى لا سكالا, ريم وپەراسى, تۋريندەگى تەاترو رەدجيو جانە گەنۋياداعى كارلو فەليچە تەاترلارىندا ساحنالانعان. مەتردىڭ جوباعا قاتىسۋى وپەرانى حالىقارالىق دەڭگەيگە كوتەردى.
مۋزىكالىق جەتەكشى ءارى قويۋشى ديريجەرى – قازاقستاننىڭ ەڭبەك سىڭىرگەن قايراتكەرى, اباي اتىنداعى تەاتردىڭ باس ديريجەرى نۇرجان بايبوسىنوۆ.
تاشكەنتتەگى پرەمەرا قازاق جانە وزبەك مادەنيەتى مەن تاريحىنىڭ تەرەڭ ۇندەستىگىن پاش ەتكەن شىعارماشىلىق ديالوگكە اينالدى. بۇل سينتەز ەكى حالىقتىڭ مىزعىماس ورتاق تاريحي جادىن, رۋحاني جاقىندىعىن ايشىقتاعان وزىندىك «ونەر كوپىرىن» قالىپتاستىردى. بۇعان دەيىن وپەرا الماتى, ىستانبۇل, قازان قالالارىندا ساحنالانىپ, كورەرمەننىڭ ىستىق ىقىلاسىنا يە بولعان ەدى.
