«Freedom Broker» قارجىلىق تالداۋ دەپارتامەنتىنىڭ ديرەكتورى ەرلان ابدىكارىموۆتىڭ ايتۋىنشا, جاساندى ينتەللەكت ينۆەستيتسيالىق سالاداعى ساراپشىلاردى تولىق الماستىرا المايدى. ونىڭ پىكىرىنشە, قور نارىعى – شەشىمدەردى تولىعىمەن الگوريتمدەرگە جۇكتەۋگە كەلمەيتىن كۇردەلى جۇيە. سەبەبى ول قاتىسۋشىلاردىڭ ەموتسياسى مەن ارەكەتىنە تىكەلەي تاۋەلدى ءارى رەفلەكسيۆتى سيپاتقا يە: ينۆەستورلاردىڭ شەشىمى نارىقتىڭ باعىتىنا تىكەلەي اسەر ەتەدى. ساراپشى جي-ءدىڭ ەسەپتەردى وڭدەۋ مەن دەرەكتەردى جيناقتاپ ۇسىنۋ سياقتى ستاندارتتى ۇدەرىستەردى اۆتوماتتاندىرۋدا ءتيىمدى قۇرال ەكەنىن مويىنداي وتىرىپ, ءىرى ينۆەستيتسيالىق قورجىنداردى باسقارۋ ىسىندە ادام فاكتورى ءالى دە شەشۋشى ءرول اتقاراتىنىن اتاپ ءوتتى. كليەنتتەر الگوريتمنىڭ عانا ەمەس, ناقتى ماماننىڭ كاسىبي كوزقاراسىن دا كورگىسى كەلەدى.
«فريدوم بانك قازاقستان» اق ديرەكتورلار كەڭەسىنىڭ مۇشەسى ايدوس جۇماعۇلوۆتىڭ ايتۋىنشا, ءىت-سالاسىنىڭ وتاندىق نارىقپەن ينتەگراتسيالانۋ ۇدەرىسى باياعىدا باستالىپ كەتكەن. بۇل سەگمەنتتىڭ قوزعاۋشى كۇشى – ينۆەستيتسيا. ساراپشى باسەكەلەستىكتى قولدايتىنىن ءارى زاماناۋي تەحنولوگيالاردى ۋاقىتىندا مەڭگەرىپ, ءتيىمدى قولدانعاندار عانا نارىقتا جەڭىسكە جەتەتىنىن ايتتى.
ايدوس جۇماعۇلوۆتىڭ پىكىرىنشە, نارىققا جاڭا ويىنشىلار جىلدام قوسىلىپ جاتىر. مۇنداي قارقىننىڭ وزىندە ەڭ جاڭا تەحنولوگيانىڭ ءوزى ينتەگراتسيانىڭ شاپشاڭدىعىنا ىلەسە الماي قالاتىن جاعدايلار جيىلەگەن. سوندىقتان بۇگىن قانداي ستراتەگيا باسىمدىققا يە بولاتىنىن ناقتى بولجاۋ قيىن. بىراق وزگەرىستەرگە دەر كەزىندە بەيىمدەلىپ, باعىتىن جىلدام تۇزەگەندەر عانا بۇل ۇدەرىستەن ۇتاتىنى ءسوزسىز.
ا.جۇماعۇلوۆ «7-20-25» مەملەكەتتىك باعدارلاما اياسىنداعى تسيفرلىق يپوتەكانى مىسالعا كەلتىردى. نەبارى ءۇش اپتا ىشىندە بانك وسى سەگمەنتتەگى نارىقتىڭ 30%-ىن يەلەنە الدى. «قاعاز قۇجاتتارى, قاشىقتىقتاعى KYC, دەرەكتەر بازاسى جانە سكورينگ جوق كەزدە تسيفرلاندىرۋعا كوشۋدىڭ ارقاسىندا ۇيىم كرەديت بەرۋ مەرزىمىن 30-60 كۇننەن ءبىر تاۋلىككە دەيىن قىسقارتا الدى. مىسالى, «Freedom Bank»-تەگى جىلجىمايتىن م ۇلىكتى باعالاۋ بار-جوعى ءبىر سەكۋندقا سوزىلادى», دەدى ساراپشى.
يپوتەكالىق نەسيەلەۋدەگى تابىستى تاجىريبە تسيفرلىق اۆتونەسيە مەن شاعىن جانە ورتا بيزنەستى قارجىلاندىرۋ سياقتى ونىمدەردى ودان ءارى دامىتۋعا نەگىز بولدى. بۇل ۇدەرىستە سكورينگ جۇيەسىندەگى جاساندى ينتەللەكت پەن زاماناۋي تەحنولوگيالار نەگىزگى قۇرالعا اينالىپ وتىر.
«الگوريتمدەر كليەنتتىڭ سەنىمدىلىگىن باعالاۋدا ءداستۇرلى تاسىلدەردى تولىق الماستىرا الادى», دەدى ا.جۇماعۇلوۆ.
راسىندا, زاماناۋي ەكوجۇيە – پايدالانۋشىلارعا ءبىر الاڭدا ءتۇرلى قىزمەتتى ۇسىناتىن عانا ەمەس, سونداي-اق جاڭا تەحنولوگيالارمەن جابدىقتالعان ىڭعايلى ينفراقۇرىلىم. وتكەن جىلى «Freedom Bank» جان-جاقتى قىزمەت كورسەتەتىن «Freedom SuperApp» ءموبيلدى قوسىمشاسىن ىسكە قوستى. بۇل پلاتفورما ءبىر مەزگىلدە ء«بىر تەرەزە» قاعيداتى بويىنشا جۇمىس ىستەيتىن بىرىڭعاي الاڭعا, حولدينگ ونىمدەرىن بىرىكتىرۋگە, سونىمەن قاتار كليەنتپەن ءوزارا ارەكەتتەستىكتىڭ جاڭا كەزەڭىنە جول اشاتىن ترامپلينگە اينالدى. قاڭتاردا «Freedom Bank» ايتارلىقتاي ءوسىم كورسەتىپ, SuperApp ارقىلى 800 مىڭنان استام كليەنتتى تارتتى. ا.جۇماعۇلوۆتىڭ ايتۋىنشا, ءبىر تاۋلىكتە جۇكتەۋ سانى 73 مىڭعا دەيىن جەتكەن.
«Freedom Finance Insurance» باسقارما توراعاسى ازامات كەرىمباەۆتىڭ ايتۋىنشا, جاساندى ينتەللەكت تەحنولوگيالارىن ەنگىزۋ كومپانيانىڭ كولل-ورتالىعى جۇمىسىن وڭتايلاندىرىپ, قوڭىراۋلار اعىنىن ءتيىمدى باسقارۋعا مۇمكىندىك بەرگەن. باستاپقىدا بۇل بولىمدە 35 قىزمەتكەر جۇمىس ىستەپ, كومپانيانىڭ نارىقتاعى ۇلەسى 10 پايىز شاماسىندا بولعان. الايدا بيزنەس اۋقىمىنىڭ كەڭەيۋىنە بايلانىستى اي سايىنعى قوڭىراۋ سانى 65 مىڭعا دەيىن ارتقان.
سونىمەن قاتار كومپانيا جاساندى ينتەللەكت تەحنولوگيالارىن ەنگىزۋ ارقىلى تۇتىنۋشىلار سۇرانىسىن ءتيىمدى رەتتەۋگە كوشكەن. جي بىرنەشە ساعات ىشىندە مىڭداعان اۋديوجازبانى سارالاپ, وتىنىشتەردىڭ نەگىزگى ءۇش سەبەبىن انىقتاعان: پوليس راسىمدەۋ, ونى قايتا راسىمدەۋ (مىسالى, كولىك نەمەسە جۇرگىزۋشى قوسۋ), ساقتاندىرۋ تولەمىنىڭ مارتەبەسىن ناقتىلاۋ. وسى دەرەكتەر نەگىزىندە كومپانيا اۆتوماتتى تۇردە جاۋاپ بەرەتىن داۋىستىق كومەكشىنى ىسكە قوسقان.
«العاشقى ءۇش ايدا وپەراتور قابىلدايتىن قوڭىراۋ كولەمىن 25 پايىزعا قىسقارتتىق. ەندى كليەنتتەردىڭ كوپشىلىگى بوت ارقىلى قاجەتتى اقپاراتتى الادى, ال كولل-ورتالىق ماماندارى كۇردەلى سۇرانىستارمەن اينالىسادى», دەدى ا.كەرىمباەۆ.
ونىڭ ايتۋىنشا, بۇل باعىتتى جەتىلدىرۋ جالعاسادى. الداعى ۋاقىتتا كومپانيا تۇتىنۋشىلىق وتىنىشتەردىڭ جارتىسىنان كوبىن جاساندى ينتەللەكت كومەگىمەن وڭدەۋدى كوزدەپ وتىر.
الماتى
