بۇگىندە مۋزەيدىڭ باعا جەتپەس مۇراسى سانالاتىن ساۋكەلە مۋزەيگە 90-جىلدارى كەلىپ تۇسكەن.
«ايەل ادامعا ارنالعان باسكيىمدەردىڭ ىشىندەگى ەڭ اشەكەيلىسى دە, كۇردەلىسى دە – وسى ساۋكەلە. تورعاي ۇلگىسىندە جاسالعان بۇل ساۋكەلەدەگى ءاربىر ورنەكتىڭ وزىندىك ءمانى بار. مىسالى, تومەنگى جاعىنداعى قاتار-قاتار ورنالاسقان ورنەكتەر ادام بالاسىنىڭ جاڭا عانا ءتاي-ءتاي باسقان قادامىن كورسەتەدى. ودان جوعارى ساۋكەلەنىڭ ورتا تۇسىندا اشەكەيگە تولى, اسەرلى كورىنەتىن ويۋ-ورنەكتەر جاستىق شاق, جارقىن كەزەڭدى – ادام ءومىرىنىڭ ەڭ ءماندى ساتتەرىن بەينەلەيدى. ساۋكەلەنىڭ جوعارعى جاعىندا اشەكەي-مونشاقتاردىڭ سيرەۋى – ءومىردىڭ بازارى تارقاعان شاقتى مەڭزەيدى. ماڭداي تۇستان باستاپ اسپانعا قاراي شانشىلا سوزىلعان مۇنارا سىندى اشەكەي ادام جانىنىڭ كوككە كوتەرىلىپ بارا جاتقانىن بەينەلەيتىن نىشان. ال ساۋكەلەگە تاعىلعان جەلەك قالىڭدىقتىڭ توركىننەن جاڭا جۇرتقا بارىپ, جاڭادان ءومىر پەردەسىن اشاتىنىن نۇسقايدى. ءبىر عاجابى, قاراپايىم عانا قالىڭدىق ساۋكەلەسىنە ادام ءومىرىنىڭ بۇكىل فيلوسوفياسى سىيىپ كەتكەن», دەيدى مۋزەي مامانى باتىرلان ساعىنتاەۆ.
باتىرلاننىڭ ايتۋىنشا, تورعاي وڭىرىندە كەزىندە ايەلدەردىڭ باسىنا تاعاتىن سۇلاما نەمەسە ساۋكەلە جاۋلىق دەپ اتالعان باسكيىم ۇلگىسى دە بولعان. ونىڭ نەگىزىن بىرنەشە قابات قاعازدان جاساعان قاتتى قاڭقا قۇراعان. ءتۇرى جوعارىدان قيىلعان كونۋس سياقتى. بيىكتىگى – 40-50 سم. قاپتاما ماتاسىنىڭ ارتقى شەتى ەمىن-ەركىن ارقاعا ءتۇسىپ كەتەدى. مۇنداي جاۋلىقتار كوبىنە مارجان, مونشاق, كۇمىسپەن اشەكەيلەنگەن.
قوستاناي وبلىسى
