سۋرەت: instagram.com/sportschool2pavlodar/
امانگەلدى اقساقال – اڭىزعا اينالعان تۇلعا. بيىل 85 جاسقا اياق باسقان ارداگەر كەڭەس وكىمەتى تۇسىندا ەركىن كۇرەستىڭ شەبەرى اتانىپ, تالاي مارتە بايراقتى دودالاردا توپ جارعان. سپورتشى اكەسىنەن ەرتە ايىرىلعان. اكەسى 1937 جىلى «حالىق جاۋى» دەگەن جالامەن ۇستالىپ كەتكەن سوڭ, بالالار ۇيىندە تاربيەلەنەدى. وندا ءوزى قاتارلاس بالالارمەن ج ۇلىسىپ ءجۇرىپ, كۇرەستىڭ نەگىزگى تاسىلدەرىن العاشقى مۇعالىمدەرىنەن ۇيرەنە باستايدى. كەيىن پاۆلودار قالاسىنا كەلىپ, جوعارى سپورتتىق ءبىلىم الادى. سپورتتاعى ورلەۋ جولىن وبلىستا باستاعان اعامىز شەبەرلىگىنىڭ ارقاسىندا رەسپۋبليكاعا تانىلىپ, ەل سپورتىنىڭ تاريحىندا وشپەس ءىز قالدىردى. 1959 جىلى وبلىستار اراسىندا وتكەن الاماندا جارتىلاي اۋىر سالماقتا سىنعا ءتۇسىپ, فينالدا اتاقتى ابىلسەيىت ايحانوۆپەن بەلدەسكەن. سول باسەكەدە پاۆلودار وبلىسىنىڭ پايداسىنا كۇمىس جۇلدەنى ولجالايدى.
– كەزىندە «قايرات» سپورت قوعامىنىڭ مۇشەسى بولا ءجۇرىپ, جارتىلاي اۋىر سالماقتا وبلىستا ءبىرىنشى بولدىم, تىڭ ولكەلەرى اراسىنداعى جارىستا چەمپيون اتاندىم. كەيىن رەسپۋبليكالىق جارىستاردا جەڭىس تۇعىرىنان كورىنىپ, 1961–1962 جىلدارى وداقتىق جارىستارعا قاتىستىم. قازاق جاستارى اراسىندا ەركىن كۇرەستەن تۇڭعىش سپورت شەبەرى اتاعىن الدىم. كوپ جىلدار شاكىرت تاربيەلەۋمەن اينالىستىم. ولاردىڭ اراسىندا ەركىن كۇرەستەن وبلىسقا تانىمال سپورتشى سەرىك سەرعازين, كەزىندە سپورت ارداگەرلەرى اراسىندا الەم چەمپيونى اتانعان ومار جانارعاليەۆ, ءوڭىردىڭ قۇرمەتتى باپكەرى ورازالى مۇحامەتالىنوۆ, وليمپيادا جۇلدەگەرى داۋلەت شابانباي, تاعى باسقالارىن اتاپ وتۋىمە بولادى, – دەيدى ارداگەر.
– ەركىن كۇرەس بيىلدان باستاپ ەرتىس-بايان وڭىرىندە باسىمدىق بەرىلگەن سپورت تۇرلەرى قاتارىنا ەنىپ وتىر. ەندى قارجىلاندىرۋ جاعى ۇلعايادى دەگەن سەنىمدەمىز. وبلىس كولەمىندە ەركىن كۇرەسپەن شۇعىلداناتىن بالالار سانى 4 مىڭنىڭ ۇستىندە. بارلىق اۋدان-قالادا ەركىن كۇرەس سەكتسيالارى جۇمىس ىستەپ تۇر, – دەيدى ەركىن كۇرەستەن وبلىستىڭ اعا باپكەرى, جارىستىڭ باس تورەشىسى ەرمىرزا سىزدىقوۆ.
جالپى, وڭىرلەردەگى سپورت مەكتەپتەرىندە جاتتىعاتىنداردىڭ دەنى اۋىل بالالارى. مۇنداي وڭىرلىك اشىق باسەكەلەر ارقىلى جاسوسپىرىمدەردىڭ اراسىنان مىقتىلارى ىرىكتەلەدى. باسەكە سوڭىندا امانگەلدى اقساقال تۋرنير كەلەشەكتە رەسپۋبليكالىق دەڭگەيگە كوتەرىلسە دەگەن تىلەگىن جەتكىزدى.
پاۆلودار
