«جەدەل جاردەمگە» – جەدەل جاردەم اتىراۋدا وسى سالاعا دەپ 20 شەتەلدىك كولىك بەرىلدى

ەل-جۇرتتىڭ قىتىعىنا تيەتىن, وكپە-رەنىشىن تۋدىراتىن ءجايتتىڭ ءبىرى –«جەدەل جاردەمنىڭ» كەشىگۋى. باسى اۋىرىپ, بالتىرى سىزداعان جانعا ۇنەمى ساعاتتاپ كەشىگىپ جەتەتىن «جەدەل جاردەم» «ساۋىقپاي-اق» قويدى. «جەدەل جاردەم» باسشىلارىنان ۇدايى «كولىك جەتىسپەيدى» دەگەن سىلتاۋ العا تارتىلادى. شىنىمەن سولاي ما, الدە باسقا سەبەبى بار ما؟ قالاي بولعاندا دا, بۇل ماسەلە اتىراۋ وبلىسىنىڭ اكىمى باقتىقوجا ىزمۇحامبەتوۆتىڭ حالىق الدىنداعى ەسەبىندە بيىل تاعى دا كوتەرىلدى. مىنە, ەندى ارادا 5 ايعا جۋىق مەرزىم وتكەندە, دالىرەك ايتقاندا, كەشە وبلىس اكىمى ب.ىزمۇحامبەتوۆ اتىراۋ قالالىق «جەدەل جاردەم» قىزمەتىنە 20 جاڭا كولىكتى تابىس ەتتى. جاڭانىڭ اتى –جاڭا, بۇرىنعىداي كوز ۇيرەنگەن رەسەيلىك «ۋاز» ەمەس, وڭتۇستىك كورەيادان شىعارىلعان شەتەلدىك كولىكتەر كوزدىڭ جاۋىن الارداي جۇتىنىپ تۇر. –«جەدەل جاردەم» قىزمەتىن جەتىلدىرۋ جونىندە حالىقتىڭ تاراپىنان ۇدايى ۇسىنىس ءتۇسىپ تۇرادى. بيىلعى ەسەپ بەرۋ جيىنىندا دا بۇل ماسەلە كوتەرىلگەن ەدى. جەرگىلىكتى بيۋدجەتتەن بولىنگەن قارجىعا 20 جاڭا كولىكتى ساتىپ الدىق. ەندى «جەدەل جاردەم» قىزمەتى حالىقتىڭ شاقىرۋلارىنا كەشىكپەي جەتۋى ءتيىس, –دەپ تۇيىندەدى ويىن ءوڭىر باسشىسى. ءيا, اتىراۋداي قالاعا 20 «جەدەل جاردەم» كولىگى از ەمەس. ەندى «جەدەل جاردەم» دارىگەرلەرى «كولىك تاپشى» دەگەن سىلتاۋمەن كەشىگۋدى دوعاراتىن شىعار. ارينە, مۇنى ۋاقىت كورسەتەدى. جولداسبەك شوپەعۇل, «ەگەمەن قازاقستان». اتىراۋ. سۋرەتتى تۇسىرگەن راحىم قويلىباەۆ.