وپەراتسيانى مەديتسينالىق ورتالىقتىڭ كارديوحيرۋرگتەرى قىتايدان كەلگەن ماماندارمەن بىرلەسە وتىرىپ, حالىقارالىق عىلىمي-تاجىريبەلىك كونفەرەنتسيا اياسىندا جۇزەگە اسىردى.
– تۋا بىتكەن جۇرەك اقاۋى – جۇرەكشەلىك پەردە اقاۋى بار 28 جاستاعى ناۋقاسقا سوڭعى ۇلگىدەگى روبوتتىق حيرۋرگيالىق جۇيە ارقىلى وتا جاسالدى. وپەراتسيا ءداستۇرلى ءادىس – ستەرنوتومياسىز, ياعني كەۋدە سۇيەگىن اشپاي, شاعىن تىلىك ارقىلى ءوتتى. قازىرگى ۋاقىتتا ناۋقاستىڭ جاعدايى جاقسى, – دەلىنگەن حابارلامادا.
مەديتسينالىق ورتالىقتىڭ مالىمەتىنشە, بۇل وتا – جوعارى تەحنولوگيالى كارديوحيرۋرگيانى دامىتۋ مەن حالىقارالىق مەديتسينالىق ىنتىماقتاستىقتى نىعايتۋ جولىنداعى ماڭىزدى قادام.
كونفەرەنتسيا اياسىندا شەتەلدىك ساراپشىلار دا كونسۋلتاتسيالار وتكىزدى. ماسكەۋدەن كەلگەن مەديتسينا عىلىمدارىنىڭ دوكتورى, كارديولوگ ءارى فۋنكتسيونالدى دياگنوستيكا مامانى ولگا دجيوەۆا ورتالىقتىڭ كارديولوگتارىمەن بىرگە ناۋقاستاردى قابىلدادى. ال جاپونياداعى اۋليە ماريا اۋرۋحاناسىنىڭ گەماتولوگيا ءبولىمىنىڭ مەڭگەرۋشىسى, پروفەسسور Jeon Yungwoo توعىز پاتسيەنتكە كەڭەس بەردى.
ايتا كەتسەك, استانادا وتكەن ءىرى حالىقارالىق عىلىمي-تاجىريبەلىك كونفەرەنتسيا ءوز جۇمىسىن اياقتادى. باعدارلاما كارديوحيرۋرگيا, ونكولوگيا, يادرولىق مەديتسينا, نەيروحيرۋرگيا, تەراپيا, تسيفرلاندىرۋ, فارماتسەۆتيكالىق رەتتەۋ, مەيىربيكەلىك ءىس, كوشباسشىلىق جانە مەديتسينالىق كومەكتىڭ ساپاسىن باسقارۋ سياقتى وزەكتى تاقىرىپتاردى قامتىدى.
فورۋمعا جەتەكشى كلينيكالار مەن عىلىمي ينستيتۋتتاردىڭ, سونداي-اق قازاقستانداعى جوعارى وقۋ ورىندارىنىڭ وكىلدەرى جانە وننان استام ەلدەن كەلگەن شەتەلدىك ساراپشىلار قاتىستى.
كونفەرەنتسيا تاجىريبە الماسۋعا, يننوۆاتسيالىق مەديتسينالىق جانە ءبىلىم بەرۋ تەحنولوگيالارىن دامىتۋعا ارنالعان ماڭىزدى الاڭعا اينالدى.
بارلىعى ءتورت مىڭعا جۋىق ادام كونفەرەنتسيانىڭ ونلاين جانە وفلاين فورماتتارىندا وتكەن ءىس-شارالارعا قاتىستى. سەسسيالاردىڭ تىكەلەي ترانسلياتسيالارىن قاراۋ سانى ءتورت مىڭنان استى.
