فوتو: kolesa.kz
اتالعان ماسەلەنى بولاتبەك اليەۆ Facebook-تاعى پاراقشاسىندا كوتەردى.
بۇل شەكتەۋ بۇرىن بولعان, بىراق بيلىك 2019 جىلى ونى ءتيىمدى ەمەس جانە قولدانۋعا جارامسىز دەپ تانىپ, كۇشىن جويعان ەدى. بىراق 2022 جىلى بۇل تىيىمدى قايتا ەنگىزدى, بىراق 2026 جىلعا دەيىن كەيىنگە قالدىردى.
«تىيىم جولدى قورعاۋ ءۇشىن قاجەت سياقتى كورىنەدى. ىس جۇزىندە ول كاسىبي ەمەس جانە بۇرىن وز تيىمسىزدىگىن كورسەتكەن شەشىم», دەيدى ب.اليەۆ.
دەپۋتاتتىڭ ايتۋىنشا قازاقستانعا كىرەتىن ار جۇك كولىگى سەرتيفيكات الادى. دەمەك مەملەكەت تەحنيكانى ستاندارتقا ساي دەپ تانىپ, پايدالانۋعا رۇقسات بەرەدى. بيلىك مۇنداي ماشيناعا تىيىم سالسا, بۇل رەتتەۋ ەمەس, وز شەشىمىنەن باس تارتۋ بولادى. مەملەكەت 2022 جىلدان كەيىن شەكتەۋدى قايتا ەنگىزەتىنىن ءبىلدى, سول كەزدە سەرتيفيكات بەرۋ ءراسىمىن قايتا قاراپ, مىڭداعان تەحنيكانىڭ كىرۋىنە جول بەرمەي, سودان كەيىن عانا پايدالانۋعا تىيىم سالۋى كەرەك ەدى.
جۇككوتەرگىشتىگى 25 توننادان اساتىن ءارى جۇكتى ءوزى تۇسىرەتىن ءۇش وستى كولىكتەر – جولدا كوپ كەزدەسەتىن HOWO, Shacman, XCMG, Dongfeng ونىمدەرى.
بولاتبەك اليەۆ تىيىمنىڭ تەك جۇكتى ءوزى تۇسىرەتىن كولىككە قاتىستى بولۋى قيسىنسىز دەيدى. سەبەبى ءۇش وستى شاسسي بۇگىندە بەتون ارالاستىرعىش, كونتەينەر تاسىعىش, استىق تاسىعىش جانە بورتتىق جۇك كولىكتە بار. تەحنيكالىق تۇرعىدا بۇلار ءبىر اۆتوموبيل. بىراق نەگە ەكەنى بەلگىسىز, تىيىم تەك جۇكتى ءوزى تۇسىرەتىن كولىككە قاتىستى.
«جولدار بۇزىلىپ جاتسا, وعان شاناق ەمەس, ساپاسىز قۇرىلىس پەن باقىلاۋ جۇيەسىنىڭ السىزدىگى كىنالى. بىزدە وستىك جۇكتەمە نورماسى (8-10 توننا), سالماق ولشەۋ جۇيەسى جانە كولىك ينسپەكتسياسى بار. باقىلاۋ جۇمىس ىستەمەسە, ونى قايتا ىسكە قوسۋ كەرەك, اۆتوموبيل كلاسىنا تىيىم سالۋ دۇرىس شەشىم ەمەس. اكىمشىلىك ءتارتىپ ورناتۋدىڭ ورنىنا تاسىمالداۋشىلاردى كىنالاۋ وڭاي», دەدى ءماجىلىس دەپۋتاتى.
ول قازىر ەلدە شامامەن 36 500 جۇكتى ءوزى تۇسىرەتىن ءۇش وستى كولىك بار دەيدى. بيلىك ولارعا تىيىم سالسا, ونداعان مىڭ ادام جۇمىسسىز قالادى, ونداعان مىڭ وتباسى زارداپ شەگەدى. بۇل ماشينالار كوپتەگەن سالادا جۇمىس ىستەيدى. شەكتەۋ ەكونوميكاداعى بىرنەشە سەكتوردىڭ جۇمىسىن توقتاتىپ, تەحنيكا تاپشىلىعىن تۋعىزادى, شىعىن ارتىپ, مەملەكەتتىك جوبالاردىڭ اياقتالۋىنا توسقاۋىل بولادى.
بولاتبەك اليەۆ جۇكتى ءوزى تۇسىرەتىن ءۇش وستى كولىككە قاتىستى تىيىمدى الىپ تاستاپ, «اۆتوموبيل كولىگى تۋرالى» زاڭنىڭ 38-2-بابىن تۇزەتۋدى جانە وستىك جۇكتەمەنى باقىلاۋ پروتسەسسىن كۇشەيتۋدى ۇسىندى.
