فورۋم قوناقتارى ءۇشىن مازمۇندى ىسكەرلىك باعدارلاما ۇسىنىلعان. وندا تسيفرلاندىرۋ, كولىك جانە لوگيستيكا, ونەركاسىپ پەن ەنەرگەتيكا سالالارىنداعى ەكىجاقتى ىنتىماقتاستىقتى نىعايتۋ, ايماقتاردا جوعارى تەحنولوگيالىق جۇمىس ورىندارىن قۇرۋعا باعىتتالعان سەرىكتەستىك مۇمكىندىكتەرى, اتومدىق جانە ءداستۇرلى ەنەرگەتيكا سالالارى بويىنشا ماماندار دايارلاۋ, زاماناۋي اگروتەحنولوگيالاردى وقىتۋ سەكىلدى وزەكتى تاقىرىپتار تالقىلانىپ جاتىر.
«جىل سايىن وتكىزىلەتىن فورۋم – قازاقستان مەن رەسەي اراسىنداعى ستراتەگيالىق سەرىكتەستىككە نەگىزدەلگەن ءوزارا سەنىم مەن ءتيىمدى ىنتىماقتاستىقتىڭ بەرىكتىگىنىڭ ايعاعى. ەكى ەل اراسىندا ءوزارا ساۋدا-ساتتىق كولەمىن ۇلعايتۋ جانە ينۆەستيتسيالىق ىنتىماقتاستىقتى كەڭەيتۋ باعىتىندا جۇمىستار ءالى دە جالعاسادى. سونداي-اق كوپتەگەن ماسەلە ىنتىماقتاستىق جونىندەگى ۇكىمەتارالىق كوميسسيا تاراپىنان قاراستىرىلماق», دەيدى باتىس قازاقستان وبلىسىنىڭ اكىمى ناريمان تورەعاليەۆ قۇتتىقتاۋ سوزىندە.
ءوڭىر باسشىسىنىڭ ايتۋىنشا, بيىلعى فورۋم «جۇمىسشى ماماندىقتار – ەكونوميكانى دامىتاتىن قوزعاۋشى كۇش» تاقىرىبىنا ارنالعان.
«بۇل ماماندىقتار ونەركاسىپ, ەنەرگەتيكا, كولىك جانە لوگيستيكا سالالارىنىڭ دامۋىنا سەرپىن بەرىپ قانا قويماي, ساۋدا-ەكونوميكالىق ىنتىماقتاستىقتىڭ بەرىك نەگىزىن قالىپتاستىرادى», دەيدى اكىم.
وسىعان وراي فورۋم اياسىندا «تسيفرلىق ەكونوميكا جانە جاساندى ينتەللەكت: تەحنولوگيالىق سەرپىلىس ءۇشىن ماماندار دايارلاۋ», «ەنەرگەتيكا جانە ونەركاسىپ: جاڭا ەكونوميكاعا قاجەتتى جاڭا قۇزىرەتتەر», «كولىك جانە لوگيستيكا – جۇمىسشى كادرلار ترانزيتتىك ەكونوميكانى دامىتاتىن قوزعاۋشى كۇش», «كولىك جانە لوگيستيكا – جۇمىسشى كادرلار ترانزيتتىك ەكونوميكانى دامىتاتىن قوزعاۋشى كۇش» سەكىلدى تاقىرىپتار بارىنشا تالقىلانباق.
حالىقارالىق جيىنعا وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ, «م.تىنىشپاەۆ اتىنداعى ALT University» ۋنيۆەرسيتەتى, سەيفۋللين اتىنداعى قازاتزۋ, جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى, Astana IT University, پاۆلودار قالاسى اقپاراتتىق تەحنولوگيالار كوللەدجى, باسقا دا تانىمال ءبىلىم وردالارىنىڭ باسشىلارى, رەسەي جاعىنان رەسەي تسيفرلىق مينيسترلىگى جاساندى ينتەللەكت جانە اۋقىمدى دەرەكتەردى دامىتۋ دەپارتامەنتىنىڭ ديرەكتورى سەرگەي سەرگيەنكو, رازۋموۆسكي اتىنداعى ساراتوۆ مەملەكەتتىك مەديتسينا ۋنيۆەرسيتەتى, يۋ.ا. گاگارين اتىنداعى ساراتوۆ مەملەكەتتىك تەحنيكالىق ۋنيۆەرسيتەتىنىڭ قولدانبالى اقپاراتتىق تەحنولوگيالار جانە كوممۋنيكاتسيالار ينستيتۋتى, وزگە دە جوو باسشىلارى قاتىسىپ جاتىر.
وڭىرارالىق ىنتىماقتاستىق فورۋمى اياسىندا ەكى ەلدىڭ ەرىكتى جاستارى دا باس قوسىپ, ىنتىماقتاستىق ماسەلەسىن تالقىلادى. جيىنعا رەسەي فەدەراتسياسىنان جاستار دەلەگاتسياسى, قازاقستاننىڭ استانا, الماتى, شىمكەنت قالالارى مەن وبلىستارىنان جينالعان جاس كوشباسشىلار كەلگەن.
فورۋمنىڭ باستى ماقساتى – قازاقستان مەن رەسەي اراسىنداعى تاتۋ كورشىلىك پەن ءوزارا سەنىمدى نىعايتۋ, وڭىرلەر اراسىنداعى الەۋمەتتىك, ەكونوميكالىق, مادەني جانە گۋمانيتارلىق بايلانىستاردى تەرەڭدەتۋ. سونىمەن قاتار جاستاردىڭ, كاسىپكەرلەر مەن ازاماتتىق قوعام وكىلدەرىنىڭ بەلسەندى ىنتىماقتاستىعىن دامىتۋعا باعىتتالعان.
«جاستار ءۇشىن جۇمىسشى ماماندىقتاردىڭ تارتىمدىلىعى مەن ۇردىستەرى» جانە «ۆولونتەرلىك قىزمەت سالاسىنداعى تاجىريبە الماسۋ: جاقسى كورشىلىك» اتتى قوس سەكتسيادا ەكى ەلدىڭ ەڭبەك نارىعىنداعى ۇردىستەر, كاسىپكەرلىك بەلسەندىلىكتى ارتتىرۋ جولدارى, ەكولوگيالىق جاۋاپكەرشىلىك پەن ۆولونتەرلىك مادەنيەتتى دامىتۋدىڭ ءتيىمدى تاسىلدەرى تالقىلاندى.
قازاقستان مەن رەسەي اراسىنداعى وڭىرارالىق ىنتىماقتاستىق فورۋمى بيىل ون ءبىرىنشى مارتە ءوتىپ جاتسا, قازاقستان-رەسەي ىسكەرلىك كەڭەسى قۇرىلعانىنا بيىل مەرەيلى 10 جىل بولعان ەكەن.
«باتىس قازاقستان وبلىسى ەۋروپا مەن ازيانىڭ قيىلىسىندا ورنالاسقان, قازاقستاننىڭ ورتالىق جانە وڭتۇستىك ايماعى, سونداي-اق ورتالىق ازيا ەلدەرى ءۇشىن باتىس قاقپا دەۋگە بولادى. ورال قالاسى – ەۋروپادا ورنالاسقان قازاقستانداعى جالعىز قالا. باتىس قازاقستان وبلىسى رەسەي فەدەراتسياسىنىڭ بەس وڭىرىمەن: ورىنبور, سامارا, ساراتوۆ, ۆولگوگراد جانە استراحان وبلىسىمەن شەكتەسەدى. سوندىقتان اقجايىق ءوڭىرى كوپ جىل بويى ەكى ەلدىڭ ەكونوميكالىق مۇددەسىن بايلانىستىراتىن جانە شەكارالاس ايماقتاردىڭ تۇراقتى دامۋىن قامتاماسىز ەتەتىن ماڭىزدى كوپىرگە اينالدى. 2025 جىلدىڭ قاڭتار-تامىز ايلارىندا باتىس قازاقستان وبلىسى مەن رەسەي فەدەراتسياسى اراسىنداعى سىرتقى ساۋدا اينالىمى 504,4 ميلليون دوللارعا جەتتى. 2024 جىلدىڭ سايكەس كەزەڭىمەن سالىستىرعاندا 9,8%-عا وسكەنى كورىنىپ تۇر», دەيدى باتىس قازاقستان وبلىسىنىڭ كاسىپكەرلەر پالاتاسى وڭىرلىك كەڭەسىنىڭ توراعاسى مۇرات جاكىباەۆ.
باتىس قازاقستان وبلىسى – ەلىمىزدىڭ دامىعان يندۋستريالدى-اگرارلىق وڭىرلەرىنىڭ ءبىرى. وڭىردە 2025-2030 جىلدارى جالپى قۇنى شامامەن 2,2 ترلن تەڭگەگە تەڭ 70-تەن استام جوبانى جۇزەگە اسىرۋ جوسپارلانىپ وتىر. بۇل 9 مىڭنان اسا جاڭا جۇمىس ورنىن اشۋعا مۇمكىندىك بەرەدى. وبلىس اۋماعىندا الەمدەگى ەڭ ءىرى مۇناي, گاز جانە گاز كوندەنساتى كەن ورنى – قاراشىعاناق ورنالاسقان.
باتىس قازاقستان وبلىسى
